UG ଓ PG ପରୀକ୍ଷା ନେଇ ଦ୍ୱନ୍ଦ୍ୱରେ ଛାତ୍ରଛାତ୍ରୀ, ଜୁନ ୧୨ ରେ ହୋଇପାରେ ନିଷ୍ପତ୍ତି

ଭୁବନେଶ୍ୱର: ମାଟ୍ରିକ ପରୀକ୍ଷା ହେଲାନି, ବାତିଲ ହେଲା ଯୁକ୍ତ ଦୁଇ ପରୀକ୍ଷା। କ୍ୟାରିୟରର ଗୁରୁତ୍ୱପୂର୍ଣ୍ଣ ପରୀକ୍ଷା ଯେଉଁଠି ବନ୍ଦ ରହୁଛି, UG ଓ PG ଛାତ୍ରଛାତ୍ରୀଙ୍କ ମନରେ ଦ୍ୱନ୍ଦ୍ୱ ଓ ଭୟ ରହିବା ସ୍ୱାଭାବିକ। ଏହାକୁ ଦୂର କରିବା ପାଇଁ ଆସନ୍ତା ଜୁନ ୧୨ ତାରିଖରେ କୂଳପତିମାନଙ୍କ ବୈଠକ ଡକାଇଛନ୍ତି ଉଚ୍ଚଶିକ୍ଷା ମନ୍ତ୍ରୀ। ଲକଡାଉନ ସମୟରେ କିପରି ଥିଲା ଅନଲାଇନ ଶିକ୍ଷାଦାନ, ତାହାର ଫିଡବ୍ୟାକ ନିଆଯିବ। ତାକୁ ଆଧାର କରି UG ଓ PG ପରୀକ୍ଷା ପାଇଁ କୁଳପତିମାନେ ମତାମତ ଦେବେ। ଏହାପରେ ସମସ୍ତ କଲେଜ ଅଧ୍ୟକ୍ଷଙ୍କ ବୈଠକ ବସି ସମାନ ମତାମତ ନେବେ ଉଚ୍ଚଶିକ୍ଷା ମନ୍ତ୍ରୀ। ସବୁ ମତାମତକୁ ତର୍ଜମା କରିବା ସହ ସଂକ୍ରମଣ ସ୍ଥିତିକୁ ଦୃଷ୍ଟିରେ ରଖି ଅନ୍‌ଲାଇନ୍‌ କି ଅଫ୍‌ଲାଇନ୍‌ ପରୀକ୍ଷାର ନିଷ୍ପତ୍ତି ଆସିବ।

ଗତ ବର୍ଷ ସଂକ୍ରମଣ ଯୋଗୁ UG ଓ PG ପରୀକ୍ଷା ବାତିଲ ନେଇ ପ୍ରଥମେ ନିଷ୍ପତ୍ତି ନେଇଥିଲେ ରାଜ୍ୟ ସରକାର। ହେଲେ ସୁପ୍ରିମକୋର୍ଟ ପରୀକ୍ଷା କରିବା ଦିଗରେ ମତ ଦେଲେ। ଯେଉଁଥି ପାଇଁ UGC ପରୀକ୍ଷା କରାଇବାକୁ ସମସ୍ତ ରାଜ୍ୟଙ୍କୁ ସୂଚନା ଦେଇଥିଲେ। ଯାହାକୁ ଭିତ୍ତି କରି PG ଶେଷ ସେମିଷ୍ଟର ପରୀକ୍ଷା ଅନଲାଇନରେ ହୋଇଥିଲା। ହେଲେ UG ଶେଷ ସେମିଷ୍ଟର ଛାତ୍ରଛାତ୍ରୀଙ୍କ ପାଇଁ online ପାଠପଢ଼ାରେ ଇଣ୍ଟରନେଟ ସମସ୍ୟା ଦେଖା ଦେଇଥିଲା। ସେମାନଙ୍କ ପରୀକ୍ଷା ଅଫ୍‌ଲାଇନ୍‌ ମୋଡରେ ହୋଇଥିଲା। ଚଳିତ ଥର UGC କୌଣସି ସ୍ପଷ୍ଟ ନିର୍ଣ୍ଣୟ ନ ଶୁଣାଇଥିବାରୁ ଉଚ୍ଚଶିକ୍ଷା ବିଭାଗ ଓ ଛାତ୍ରଛାତ୍ରୀମାନେ ଆଶଙ୍କାରେ ଦିନ କାଟୁଛନ୍ତି।