ବାରିପଦା : ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ବାରିପଦା ଆଇଟିଡିଏର ସହକାରୀଯନ୍ତ୍ରୀ ସନ୍ତୋଷ ଦାସଙ୍କୁ ଶେଷରେ ଶନିବାର କଟକ ଭିଜିଲାନ୍ସ ଗିରଫ କରି ଭୁବନେଶ୍ୱର ସ୍ୱତନ୍ତ୍ର ଭିଜିଲାନ୍ସ କୋର୍ଟକୁ ଚାଲାଣ କରିଛି । ଜାମିନ ନମିଳିବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଭିଜିଲାନ୍ସ ଟିମ୍‌ ନେତୃତ୍ୱରେ ଦୁଇ ଦିନ ୧୧ଟି ସ୍ଥାନରେ ୧୦ଜଣ ଡ଼ିଏସପି, ୪ଇନିସ୍‍ପେକ୍ଟର ଓ ୩୦ଜଣ କର୍ମଚାରୀ ଚଢାଉ କରି ମୋଟ ୨କୋଟି ୮୦ ଲକ୍ଷ ୫୬ହଜାର ୮୬୪ ଟଙ୍କାର ସମ୍ପତ୍ତି ଆକଳନ କରିଛନ୍ତି । ଯାହାକି ତାଙ୍କ ଆୟର ୨୪୫ପ୍ରତିଶତ ଅଧିକ । ଏନେଇ ଅଭିଯୁକ୍ତ ଯନ୍ତ୍ରୀ ଓ ତାଙ୍କ ପତ୍ନୀଙ୍କ ନାମରେ କଟକ ଭିଜିଲାନ୍ସ ସେଲରେ କେଶ ନଂ(୮)ରେ ମାମଲା ରୁଜୁ ହୋଇଛି ।

ସ୍ୱତନ୍ତ୍ର ଭିଜିଲାନ୍ସ କୋର୍ଟଙ୍କ ସର୍ଚ୍ଚ ୱରେଣ୍ଟ ବଳରେ ଦୁଇ ଦିନ ଧରି ୧୧ଟି ସ୍ଥାନରୁ ଚଢ଼ଉରେ ମୋଟ ୪୧ଲକ୍ଷ ୭୭ହଜାର ନଗଦ ଟଙ୍କା ଜବତ ହୋଇଥିବା ବେଳେ ୬୫୯ଗ୍ରାମ ସୁନାଗହଣାକୁ ଜବତ ହୋଇଥିଲା । ଏହା ସହିତ ଭୁବନେଶ୍ୱର ବରଗଡ ଓ ବାଲେଶ୍ୱରରେ ଥିବା ଗୋଟିଏ ଲେଖାଏଁ ୪ମହଲା ବିଶିଷ୍ଟ ଘର, ଶୈଳେଶ୍ରୀ ବିହାରରେ ଥିବା ଏକ ଫ୍ଲାଟ, କଳିଙ୍ଗ ବିହାରରେ ଅର୍ଦ୍ଧନିର୍ମିତ ଘର, ବାଲେଶ୍ୱରରେ ୩ଟି ପ୍ଲଟ ଓ ଗୋଟିଏ ଚାରିଚକିଆ ଯାନ ସହିତ ୩ଟି ବାଇକକୁ ଜବତ କରାଯାଇଛି । ଯାହାକି ରାଜ୍ୟ ଭିଜିଲାନ୍ସ ବିଭାଗ ପକ୍ଷରୁ ନଗଦ ଟଙ୍କା ଜବତରେ ସର୍ବାଧିକ ବୋଲି ବିଭାଗ ପକ୍ଷରୁ ଦର୍ଶାଯାଇଛି । ଅଭିଯୁକ୍ତ ଯନ୍ତ୍ରୀ ଶ୍ରୀ ଦାସ ୮ବର୍ଷ ଧରି ଗୋଟିଏ କାର୍ଯ୍ୟାଳୟରେ ଚାକିରୀ କରୁଥିବା ବେଳେ ବହୁ ଦୁର୍ନିତୀରେ ସମ୍ପୃକ୍ତ ଥିବା ଅଭିଯୋଗ ହୋଇଥିଲା । ଠିକାଦାରଙ୍କ ଦସ୍ତଖତ ଜାଲ କରି ଅନେକ ସମୟରେ ଟଙ୍କା ଉଠାଇ ନେଉଥିବା ନେଇ ଠିକାଦାରମାନେ ଅଭିଯୋଗ ହୋଇଥିଲା । ତତସହିତ ସେ ଜିଏସ୍‌ଟି ଠକେଇରେ ସମ୍ପୃକ୍ତ ଥିବା ଅଭିଯୋଗ ରହିଛି ।