ଭୁବନେଶ୍ବର : ରାଜଧାନୀ ଏବେ ନକଲି କାରବାରର ଅମରାବତୀ ପାଲଟିଗଲାଣି। କେଉଁଠି ନକଲି ସାମଗ୍ରୀ ପ୍ରସ୍ତୁତ କରାଯାଇ ବିକ୍ରି କରାଯାଉଛି ତ ଆଉ କେଉଁଠି ରାଜ୍ୟ ବାହାରରୁ ନକଲି ସାମଗ୍ରୀ ଆସୁଛି। ତେବେ କ୍ୟାପିଟାଲ ଥାନା ଅଞ୍ଚଳରୁ ସାମ୍‍ନାକୁ ଆସିଛି ନୂଆଧରଣର ଠକେଇ। ପାୱାର ବ୍ୟାଙ୍କ୍‍ ଭିତରେ କାଦୁଅ ଭର୍ତ୍ତି କରି ବିକ୍ରି କରୁଥିବା ଏକ ଗ୍ୟାଙ୍ଗ୍‍କୁ ଠାବ କରିଛି। ଏହି ଘଟଣାରେ ୨ ଅଣଓଡ଼ିଆ ମହିଳାଙ୍କୁ କ୍ୟାପିଟାଲ୍‍ ଥାନା ପୁଲିସ ଗିରଫ କରିଛି। ଗିରଫ ମହିଳା ମହାରାଷ୍ଟ୍ରର ଆଶାସଞ୍ଜୁ ଯାଦବ (୪୦) ଓ ନିର୍ମଳା ଦେବଦାସ ଯାଦବ(୪୫)। ସେମାନଙ୍କ ଠାରୁ ୧୫ଟି ପାୱାର ବ୍ୟାଙ୍କ ଓ ନଗଦ ୧ହଜାର ଟଙ୍କା ଜବତ କରାଯାଇଛି।

ପୁଲିସର କହିବା ଅନୁସାରେ ଆଜି ଅପରାହ୍ଣରେ ୨ମହିଳା ଆସି ଏସବିଆଇ ମୁଖ୍ୟ ଶାଖା ନିକଟ ୟୁନିଟ୍‍-୧ରେ ଦୋକାନ କରିଥିବା ଜଣେ ବ୍ୟବସାୟୀଙ୍କୁ ୫୦୦ ଟଙ୍କାରେ ପାୱାର ବ୍ୟାଙ୍କ୍‍ କିଣିବାକୁ ପ୍ରବର୍ତ୍ତାଇଥିଲେ। ବ୍ୟବସାୟୀ ମହିଳାଙ୍କ ଠାରୁ ୧ହଜାର ଟଙ୍କାରେ ଦୁଇଟି ପାୱାର ବ୍ୟାଙ୍କ କିଣିଥିଲେ। ଏହାପରେ ବ୍ୟବସାୟୀ ଜଣକ ସିଲ୍‍ ପ୍ୟାକେଟ୍‍ ଚିରି ପାୱାର ବ୍ୟାଙ୍କ ଦ୍ୱାରା ମୋବାଇଲ ଚାର୍ଜିଂ କରିଥିଲେ ମଧ୍ୟ ଚାର୍ଜ ହୋଇ ନ ଥିଲା। ବ୍ୟବସାୟୀଙ୍କ ସନ୍ଦେହ ହେବାରୁ ପାୱାର ବ୍ୟାଙ୍କ୍‍ ଖୋଲି ଦେଖିଲା ବେଳକୁ ପାୱାର ବ୍ୟାଙ୍କ ଭିତର ଅଂଶରେ କାଦୁଅ ରହିଛି। ଏମିତିକି କେବଳ ଖୋଳ ଭିତରେ ଓଜନ ଲାଗିବା ପାଇଁ କାଦୁଅ ଭର୍ତ୍ତି କରାଯାଇଛି।

ଏନେଇ ବ୍ୟବସାୟୀ କ୍ୟାପିଟାଲ ଥାନାରେ ଅଭିଯୋଗ କରିଥିଲେ। ପୁଲିସ ମାର୍କେଟ ପରିସରରେ ଯାଞ୍ଚ କରି ଉଭୟ ଅଭିଯୁକ୍ତ ମହିଳାଙ୍କୁ ଚିହ୍ନଟ କରାଯାଇଥିଲା। ଯାଞ୍ଚ୍‍ରୁ ମହିଳାଙ୍କ ଏକ ବ୍ୟାଗରୁ ୧୫ଟି ପାୱାର ବ୍ୟାଙ୍କ ଠାବ କରାଯାଇଥିଲା। ତେବେ ସମସ୍ତ ପାୱାର ବ୍ୟାଙ୍କ ଖୋଲିବା ପରେ ପ୍ରତ୍ୟେକ ପାୱାର ବ୍ୟାଙ୍କ କାଦୁଅରେ ଭର୍ତ୍ତି ରହିଥିଲା। ପାୱାର ବ୍ୟାଙ୍କ ଭିତରେ ଓଦା କାଦୁଅ ପୂରାଇ କମ୍‍ ମୂଲ୍ୟରେ ବିକ୍ରି କରୁଥିବାର ସେମାନେ ତଦନ୍ତ ବେଳେ ସ୍ୱୀକାର କରିଥିଲେ। ତେବେ ଏଥିରେ ଆଉ କାହାର ସମ୍ପୃକ୍ତି ରହିଛି କ୍ୟାପିଟାଲ ଥାନା ପୁଲିସ ତନାଘନା କରୁଛି।