ବିଜେଡିର ପଞ୍ଚାୟତ ଓ ପୌର ନିର୍ବାଚନ ପ୍ରସ୍ତୁତି: ଅଗଷ୍ଟ ୧୫ ସୁଦ୍ଧା ଜିଲ୍ଲା ଓ ବ୍ଲକ କମିଟି ପୁନର୍ଗଠନ ପାଇଁ ଜିଲ୍ଲା ସଭାପତିଙ୍କୁ ନବୀନଙ୍କ ପରାମର୍ଶ

ଭୁବନେଶ୍ୱର: ଆଗାମୀ ପଞ୍ଚାୟତ ଓ ପୌର ନିର୍ବାଚନରେ ପୂର୍ବଥର ପରି ଆଖିଦୃଶିଆ ସଫଳତା ପାଇବାକୁ ବିଜେଡି ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଛି। ଏହିକ୍ରମରେ ବୁଧବାର ଦିଲ୍ଲୀରୁ ଫେରିବା ପରେ ଜିଲ୍ଲା ସଭାପତିମାନଙ୍କ ସହ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ।  ସାଙ୍ଗଠନିକ କାର୍ଯ୍ୟ, ପଞ୍ଚାୟତ ନିର୍ବାଚନ ଏବଂ ରାଜ୍ୟରେ ଜାରି ରହିଥିବା ଏସଆଇଆର ସମ୍ପର୍କରେ ଜିଲ୍ଲା ସଭାପତିମାନଙ୍କ ସହ ନବୀନ ଏହି ଅବସରରେ ବିସ୍ତୃତ ଆଲୋଚନା କରିଛନ୍ତି। 

ବିଜେଡି ସୂତ୍ରରୁ ମିଳିଥିବା ସୂଚନା ଅନୁଯାୟୀ ଅଗଷ୍ଟ ୧୫ ସୁଦ୍ଧା ଜିଲ୍ଲା ଓ ବ୍ଲକ କମିଟି ଗଠନ କରିବାକୁ ନବୀନ ସମସ୍ତଙ୍କୁ ପରାମର୍ଶ ଦେଇଛନ୍ତି। ସେହିପରି ରାଜ୍ୟରେ ଜାରି ରହିଥିବା ଏସଆଇଆରର ଦ୍ୱିତୀୟ ପର୍ଯ୍ୟାୟରେ ଯେପରି ଜଣେ ବି ଯୋଗ୍ୟ ଭୋଟରର ନାମ ବାଦ ନପଡେ ସେଥିପ୍ରତି ସଜାଗ ରହି ଦଳର ବୁଥ୍‌ ସ୍ତରୀୟ ଏଜେଣ୍ଟମାନଙ୍କୁ ସଚେତନ କରାଯିବ। ଏହାକୁ ଗୁରୁତର ସହ ଗ୍ରହଣ କରି ଏସଆଇଆର ଉପରେ ଧ୍ୟାନ କେନ୍ଦ୍ରୀୟ କରିବାକୁ ନବୀନ ପରାମର୍ଶ ଦେଇଛନ୍ତି। ସମ୍ପ୍ରତି ରାଜ୍ୟରେ ବିଜେପି ସରକାରଙ୍କ ବିରୋଧରେ ସାଧାରଣରେ ବ୍ୟାପକ ଜନ ଅସନ୍ତୋଷ ରହିଛି। ଚାଷୀ ଠାରୁ ଆରମ୍ଭ କରି ମହିଳା, ଯୁବକ ସମସ୍ତେ ନିରାଶା ମଧ୍ୟରେ ରହିଛନ୍ତି। ତେଣୁ ଏପରି ସମୟରେ ସାଧାରଣ ଲୋକଙ୍କର ସୁବିଧା, ଅସୁବିଧାରେ ଛିଡ଼ା ହୋଇ ସେମାନଙ୍କୁ ସହାୟତା ପ୍ରଦାନ ସହ ରାଜ୍ୟ ସରକାରଙ୍କର ଦୋଷ, ଦୁର୍ବଳତା ବିରୋଧରେ ସ୍ୱର ଉତ୍ତୋଳନକୁ ତୀବ୍ର କରିବାକୁ ସେ ପରାମର୍ଶ ଦେଇଛନ୍ତି। ବିଜେଡି ସବୁବେଳେ ଛାତ୍ରମାନଙ୍କ ସହ ରହିଛି ଓ ଛାତ୍ରମାନଙ୍କୁ ଆମର ନୈତିକ ସମର୍ଥନ ଜାରି ରହିବ ବୋଲି ନବୀନ ଏହି ଅବସରରେ ସ୍ପଷ୍ଟ କରିଛନ୍ତି। 

  ବୈଠକ ସମ୍ପର୍କରେ ଦଳର ବରିଷ୍ଠ ବିଧାୟିକା ତଥା ପିଏସି ସଦସ୍ୟା ପ୍ରମିଳା ମଲ୍ଲିକ କହିଛନ୍ତି ଯେ ଗତକାଲି ନବୀନ ନିବାସରେ ଅନୁଷ୍ଠିତ ବୈଠକରେ ସଭାପତି ଏକାଧିକ ନିର୍ଦ୍ଦେଶ ଦେଇଥିବା ବେଳେ ଏହାକୁ ଆମେ କାର୍ଯ୍ୟକାରୀ କରିବୁ। ତୃଣମୂଳସ୍ତରରେ  ଆମର ସଂଗଠନ କିଭଳି ସୁଦୃଢ଼ ହବ, ୱାର୍ଡ କମିଟିଠାରୁ ଆରମ୍ଭ କରି ବର୍ତ୍ତମାନ ଯେଉଁ ଏସ୍‌ଆଇଆର ଚାଲିଛି, ସେନେଇ ବ୍ୟାପକ ଆଲୋଚନା ହୋଇଛି। ଏସଆଇଆର କାମ କେମିତି ତ୍ୱରାନ୍ୱିତ ହବ ଏବଂ ଜଣେ ବି ଯୋଗ୍ୟ ଭୋଟର ଯେପରି ତାଲିକାରୁ ବାଦ୍‌ ନ ପଡ଼ନ୍ତି ସେନେଇ ବିଜେଡିର ଏଜେଣ୍ଟମାନେ କିପରି କାର୍ଯ୍ୟ କରିବେ ସେ ବିଷୟରେ ଆଲୋଚନା ହେଲ ବୋଲି ସେ ସୂଚନା ପ୍ରଦାନ କରିଛନ୍ତି। ଅପରପକ୍ଷେ ନବୀନଙ୍କ ସହ ବୈଠକ ପରେ ଆମେ ବେଶ୍‌ ଉତ୍ସାହିତ ଅଛୁ ବୋଲି ଯୋଗ ଦେଇଥିବା ଜିଲ୍ଲା ସଭାପତିମାନେ ମତବ୍ୟକ୍ତ କରିଛନ୍ତି। ନବୀନଙ୍କ ପରାମର୍ଶ ଏବଂ ନିର୍ଦ୍ଦେଶ ଆମକୁ ସଂଗଠନ ସ୍ତରରେ ଅଧିକ କ୍ରିୟାଶୀଳ ଭାବରେ କାର୍ଯ୍ୟ କରିବାକୁ ପ୍ରେରଣା ଦେଇଛି। ଆସନ୍ତା ପଞ୍ଚୟାତ ଓ ପୌର ନିର୍ବାଚନରେ ଦଳ ଗତ ନିର୍ବାଚନ ତୁଳନାରେ ଆହୁରି ଭଲ ପ୍ରଦର୍ଶନ କରିବ ବୋଲି ସେମାନେ ଦୃଢୋକ୍ତି ପ୍ରକାଶ କରିଛନ୍ତି।