ନବରଙ୍ଗପୁର: ଚଳିତ ୨୦୨୪ ନିର୍ବାଚନରେ ନବରଙ୍ଗପୁର ବିଧାନସଭା ନିର୍ବାଚନମଣ୍ଡଳୀରେ ଖୁଡ଼ୀ-ପୁତୁରା ମଧ୍ୟରେ ହେବ ଲଢ଼େଇ। କଂଗ୍ରେସ ପକ୍ଷରୁ ଲଢ଼ି ୯ ଥର ସାଂସଦ ହୋଇ ଇତିହାସ ରଚିଥିବା ସ୍ବର୍ଗତ ଖଗପତି ପ୍ରଧାନୀଙ୍କ ସାନ ଭାଇ ତଥା ନବରଙ୍ଗପୁର ଜିଲ୍ଲାର ପ୍ରଥମ ଜିଲ୍ଲା ପରିଷଦ ଅଧ୍ୟକ୍ଷ ସ୍ବର୍ଗତ ଗୋପୀନାଥ ପ୍ରଧାନୀଙ୍କ ପୁଅ ହେଉଛନ୍ତି ନବରଙ୍ଗପୁର ବିଧାୟକ ସଦାଶିବ ପ୍ରଧାନୀ। ସଦାଶିବଙ୍କ ସ୍ତ୍ରୀ କୌଶଲ୍ୟା ପ୍ରଧାନୀ ଏଥର ବିଜେଡିର ବିଧାୟିକା ପ୍ରାର୍ଥୀ। ଅନ୍ୟପଟେ ସ୍ବର୍ଗତ ଖଗପତି ପ୍ରଧାନୀଙ୍କ ପୁଅ ତଥା ଜିଲ୍ଲା ପରିଷଦ ସଭ୍ୟ ତ୍ରିନାଥ ପ୍ରଧାନୀଙ୍କ ପୁଅ ହେଉଛନ୍ତି ଏଥରର କଂଗ୍ରେସ ପ୍ରାର୍ଥୀ ଦିଲ୍ଲୀପ ପ୍ରଧାନୀ। ତେଣୁ ନବରଙ୍ଗପୁର ଆସନ ଏଥର ଖୁଡ଼ୀ-ପୁତୁରାଙ୍କ ମଧ୍ୟରେ ଲଢ଼େଇ ଦେଖିବାକୁ ଯାଉଛି ବୋଲି ଚର୍ଚ୍ଚା ଜୋର୍‌ ଧରିଛି।

୨୦୧୯ରେ ସରକାରୀ ଚାକିରିରୁ ସ୍ବେଚ୍ଛାକୃତ ଅବସର ନେଇ ରାଜନୈତିକ କ୍ୟାରିୟର୍‌ ଆରମ୍ଭ କରିଥିଲେ ସଦାଶିବ ପ୍ରଧାନୀ। ପ୍ରଥମଥର ନିର୍ବାଚନ ଲଢ଼ି ନିର୍ବାଚନରେ ନବରଙ୍ଗପୁର ବିଧାୟକ ଭାବେ ବିଜୟୀ ହୋଇଥିଲେ। ଏଥର କିନ୍ତୁ ବିଜେଡି ତାଙ୍କୁ ଟିକଟ ନ ଦେଇ ତାଙ୍କ ଧର୍ମପତ୍ନୀ କୌଶଲ୍ୟାଙ୍କ ଉପରେ ଭରସା କରିଛି। ଅନ୍ୟପଟେ ୨୦୨୨ ପଞ୍ଚାୟତ ନିର୍ବାଚନରେ ପାତ୍ରପୁଟ ସମିତି ସଭ୍ୟ ଭାବେ ଲଢ଼ି ବିଜୟୀ ହୋଇଥିଲେ ଦିଲ୍ଲୀପ ପ୍ରଧାନୀ। ପରବର୍ତ୍ତୀ ସମୟରେ ତେନ୍ତୁଳିଖୁଣ୍ଟି ବ୍ଲକ ଅଧ୍ୟକ୍ଷ ପଦ ପାଇଁ ମଧ୍ୟ ଆଶାୟୀ ରହି ଗୋଟିଚାଳନା କରିଥିଲେ। କିନ୍ତୁ ଅଙ୍କ ତାଙ୍କର ସାଥ୍‌ ଦେଇନଥିଲେ। ସେବେଠାରୁ ଦିଲ୍ଲୀପ ନବରଙ୍ଗପୁର ବିଧାନସଭା ଆସନରୁ ନିର୍ବାଚନ ଲଢ଼ିବା ପାଇଁ ମନସ୍ଥ କରିଥିଲେ। ଏବେ ସେ କଂଗ୍ରେସ ପକ୍ଷରୁ ନବରଙ୍ଗପୁର ବିଧାନସଭା ପ୍ରାର୍ଥୀ ଭାବରେ ଲଢ଼େଇ କରୁଛନ୍ତି। ଗୋଟିଏ ପରିବାରର ଖୁଡ଼ୀ-ପୁତୁରା ଦୁଇ ନୂଆ ମୁହଁ ପ୍ରମୁଖ ଦୁଇ ଦଳର ପ୍ରାର୍ଥୀ ହୋଇ ନିର୍ବାଚନ ଲଢ଼ିବା ଏକପ୍ରକାର ରୋଚକ ହେବ ବୋଲି କୁହାଯାଉଛି।