ବ୍ରହ୍ମପୁର: ସଦର ଥାନା ଅଧୀନସ୍ଥ ବଳରାମପଲି ରଙ୍ଗୁଣିପଲି ନିକଟ ଏକ କେନାଲରେ ଜଣେ ଯୁବକ ନିଜ ଶରୀରରେ ପେଟ୍ରୋଲ ଢାଳି ନିଆଁ ଲଗାଇ ଆତ୍ମହତ୍ୟା କରିଛନ୍ତି। ଯୁବକ ଜଣକ ହେଲେ ହିଞ୍ଜିଳି ଥାନା ଅନ୍ତର୍ଗତ ନୂଆ ମକରଝୋଳ ଗ୍ରାମର ଭାସ୍କର ସାହୁଙ୍କ ପୁଅ ଅଶୋକ କୁମାର ସାହୁ।

ସୂଚନା ଅନୁଯାୟୀ, ଅଶୋକ ପୁଚିଲିମା ଗ୍ରାମର ଜଣେ ବିବାହିତା ମହିଳାଙ୍କୁ ଗତ ବାର ବର୍ଷ ହେଲା ପ୍ରେମ କରିଆସୁଥିଲେ। କିନ୍ତୁ ଏବେ ସମ୍ପୃକ୍ତ ମହିଳା ଅନ୍ୟଜଣେ ଯୁବକଙ୍କ ପ୍ରେମରେ ପଡ଼ିଥିବା ଅଶୋକ ଜାଣିପାରିବାରୁ ଉକ୍ତ ମହିଳା ଓ ତାଙ୍କ ନୂଆ ପ୍ରେମିକ ତାଙ୍କୁ ମାରିବାକୁ ଉଦ୍ୟମ କରୁଥିଲେ ବୋଲି ଅଶୋକ ଏକ ହାତଲେଖା ଚିଠିରେ ଉଲ୍ଲେଖ କରିଛନ୍ତି। ଆତ୍ମହତ୍ୟା କରିବା ପୂର୍ବରୁ ଅଶୋକ ଏହି ହାତଲେଖା ଚିଠି ଫେସ୍‍ବୁକ୍‍ ରେ ପୋଷ୍ଟ କରିଛନ୍ତି। ଏଥିରେ ସେ ସ୍ପଷ୍ଟ ଭାବେ ଉଲ୍ଲେଖ କରିଛନ୍ତି ଯେ ‘ମୁଁ ଆଜି ଆତ୍ମହତ୍ୟା କରିବାକୁ ଯାଉଛି। ମୋ ମୃତ୍ୟୁ ପାଇଁ ଜଣେ ମହିଳା ଓ ଜଣେ ପୁରୁଷ ଦାୟୀ ବୋଲି ସେ ଲେଖିଛନ୍ତି।’

ଘଟଣା ପୂର୍ବରୁ ଅଶୋକ ନିଜ ବଡ଼ଭାଇଙ୍କୁ ମଧ୍ୟ ଫୋନ କରିଥିଲେ। ସେ ପହଞ୍ଚିବା ପୂର୍ବରୁ ଅଶୋକ ନିଜ ଶରୀରରେ ପେଟ୍ରୋଲ ଢାଳି ନିଆଁ ଲଗାଇ ଆତ୍ମହତ୍ୟା କରିଥିଲେ। ସଦର ଥାନା ପୁଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ରହ୍ମପୁର ବ୍ୟବଚ୍ଛେଦ ପାଇଁ ପଠାଇଛି। ଏନେଇ ଥାନାରେ ୨୩/୨୦୨୨ରେ ଏକ ମାମଲା ରୁଜୁ ହେଇଛି ବୋଲି ସଦର ଥାନା ଅଧିକାରୀ ମହେନ୍ଦ୍ର କୁମାର ସାହୁ ସୂଚନା ଦେଇଛନ୍ତି।