ମନୋରଞ୍ଜନ
ଓଡ଼ିଶା
ପ୍ରେମ, ପ୍ରତିଶ୍ରୁତି ପରେ ପ୍ରତାରଣା; ଯୁବକ ଗିରଫ
ବାଲେଶ୍ବର: କଟକ ପୁଅ ଓ ବାଲେଶ୍ଵର ଝିଅ। ଯୁବତୀଙ୍କ ସହ ପ୍ରେମ, ପରେ ବିବାହର ପ୍ରତିଶ୍ରୁତି ଦେଇ ପ୍ରତାରଣା ଦେଇଛି ଯୁବକ। ଏଭଳି ଏକ ଅଭିଯୋଗରେ ଟାଉନ୍ ଥାନା ପୁଲିସ ଯୁବକକୁ ଗିରଫ କରିଛି। ଯୁବକ ଜଣକ ହେଲେ କଟକ ମାହାଙ୍ଗା ଥାନା କୁଆଁପାଳ ଅଞ୍ଚଳର ସନ୍ଦୀପ କୁମାର ମହାନ୍ତି(୨୮)।
ପୁଲିସ ସୂଚନା ମୁତାବକ, ୨୦୦୯ ମସିହାରେ ସନ୍ଦୀପ ବାଲେଶ୍ବରର ଏକ ଘରୋଇ କଲେଜ୍ରେ ପଢ଼ୁଥିଲେ। ସେତେବେଳେ ମାନସିଂହ ବଜାର ନିକଟରେ ଭଡ଼ାରେ ରହୁଥିଲେ। ସେଠାରେ ରହୁଥିବା ସମୟରେ ସ୍ଥାନୀୟ ଅଞ୍ଚଳର ଜଣେ ଯୁବତୀଙ୍କ ସହ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା। ପରସ୍ପର ପରସ୍ପରକୁ ଭଲପାଇ ବସିଲେ। ଏହାର ସୁଯୋଗନେଇ ସନ୍ଦୀପ ଯୁବତୀଙ୍କୁ ବିବାହ କରିବାର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିଲା। ତେବେ କିଛିଦିନ ତଳେ ଯୁବତୀ ବିବାହ ପାଇଁ କହିବାରୁ ସନ୍ଦୀପ ସିଧା ସିଧା ମନାକରିଥିଲା। ଯାହାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏସମ୍ପର୍କରେ କାହାକୁ ନ କହିବା ପାଇଁ ସନ୍ଦୀପ ଧମକଚମକ ଦେଇଥିଲା। ଏନେଇ ଯୁବତୀ ଜଣଙ୍କ ଟାଉନ୍ ଥାନାରେ ଅଭିଯୋଗ ପରେ ପୁଲିସ ଏକ ମାମଲା ରୁଜୁକରି ଘଟଣାର ତଦନ୍ତ କରୁଥିଲା। ତେବେ ଗୁରୁବାର ଦିନ ପୁଲିସ ସନ୍ଦୀପକୁ ଗିରଫ କରି କୋର୍ଟ ଚାଲାଣ କରିଛି।
About The Author
