NIT ରାଉରକେଲା ଗବେଷକଙ୍କ ନୂଆ ଉଦ୍ଭାବନ: ଶୀଘ୍ର ଘା’ ଶୁଖାଇବ ‘ସ୍ମାର୍ଟ ପଟି’, ଯନ୍ତ୍ରଣାରୁ ମିଳିବ ମୁକ୍ତି

ରାଉରକେଲା: ଏନଆଇଟି ରାଉରକେଲା (NIT Rourkela) ର ଗବେଷକମାନେ ଏକ ଅତ୍ୟାଧୁନିକ ସ୍ମାର୍ଟ ଉଣ୍ଡ ଡ୍ରେସିଂ (ସ୍ମାର୍ଟ ଘା' ପଟି) ପ୍ରସ୍ତୁତ କରିବାରେ ବିଶେଷ ସଫଳତା ହାସଲ କରିଛନ୍ତି। ଏହା ସଂକ୍ରମଣକୁ ରୋକିବା ସହ ପଟି କାଢ଼ିବା ସମୟରେ ହେଉଥିବା ଯନ୍ତ୍ରଣାକୁ କମାଇଥାଏ ଏବଂ ଘା'କୁ ଶୀଘ୍ର ଶୁଖାଇବାରେ ସାହାଯ୍ୟ କରିଥାଏ। ପାରମ୍ପରିକ ତୁଳା ଗଜ୍ ତୁଳନାରେ ଏହା ଏକ ବହୁତ ଉନ୍ନତ ଏବଂ ପ୍ରଭାବଶାଳୀ ବିକଳ୍ପ ବୋଲି ପ୍ରମାଣିତ ହୋଇଛି।

ବାୟୋଟେକ୍ନୋଲୋଜି ଏବଂ ମେଡିକାଲ୍ ଇଞ୍ଜିନିୟରିଂ ବିଭାଗର ଆସିଷ୍ଟାଣ୍ଟ ପ୍ରଫେସର ଡ. ପ୍ରସୂନ କୁମାରଙ୍କ ନେତୃତ୍ୱରେ ଏହି ଗବେଷଣା କରାଯାଇଛି। ଟିମ୍ ପକ୍ଷରୁ କାଇଟୋସାନ୍-କୋଟେଡ୍ ତୁଳା ଗଜ୍ ଏବଂ କର୍କ୍ୟୁମିନ୍ (Curcumin) ଥିବା ଇଲେକ୍ଟ୍ରୋସ୍ପନ୍ ନାନୋଫାଇବ୍ରସ୍ ସ୍ତରକୁ ନେଇ ଏହି ସ୍ୱତନ୍ତ୍ର ଡ୍ରେସିଂ ଡିଜାଇନ୍ କରାଯାଇଛି। କର୍କ୍ୟୁମିନ୍ ହେଉଛି ଏକ ପ୍ରାକୃତିକ ଆଣ୍ଟିମାଇକ୍ରୋବିଆଲ୍ (ଜୀବାଣୁ ନାଶକ) ଉପାଦାନ। ନାନୋଫାଇବ୍ରସ୍ ସ୍ତରଟି ପଟିକୁ ଘା'ରେ ଲାଗିଯିବାରୁ ରୋକିଥାଏ ଓ ଟିସୁ ନଷ୍ଟ ହେବାର ଆଶଙ୍କାକୁ କମ୍ କରିଥାଏ। ଏଥିସହ ଏହା ଧୀରେ ଧୀରେ କର୍କ୍ୟୁମିନ୍ ନିର୍ଗତ କରି ଘା'କୁ ଜୀବାଣୁମୁକ୍ତ ରଖିବାରେ ସାହାଯ୍ୟ କରେ।

ଲାବୋରେଟୋରୀ ପରୀକ୍ଷଣରୁ ପ୍ରମାଣିତ ହୋଇଛି ଯେ, ଏହି ନୂତନ ଡ୍ରେସିଂ ଘା'ରେ ଲାଗିଯିବା ସମସ୍ୟାକୁ ଦୂର କରିବା ସହିତ ନୂଆ ଟିସୁ ଗଠନରେ ଅଧିକ ସାହାଯ୍ୟ କରିଥାଏ। ଗବେଷକମାନେ ଏହାର ମୂଲ୍ୟ ଉପରେ ମଧ୍ୟ ବିଶେଷ ଗୁରୁତ୍ୱ ଦେଇଛନ୍ତି। ବଜାରରେ ଏକ ସାଧାରଣ ଗଜ୍ ରୋଲର ମୂଲ୍ୟ ୩୦ ଟଙ୍କା ଥିବାବେଳେ, ଏହି ସ୍ମାର୍ଟ ଭର୍ସନ ବ୍ୟବସାୟିକ ଭିତ୍ତିରେ ଉପଲବ୍ଧ ହେଲେ ଏହାର ମୂଲ୍ୟ ମାତ୍ର ୫୦ ରୁ ୬୦ ଟଙ୍କା ମଧ୍ୟରେ ରହିବ ବୋଲି ଆକଳନ କରାଯାଇଛି। ଯାହାଦ୍ୱାରା ସାଧାରଣ ଲୋକମାନେ ଏହାର ଲାଭ ଉଠାଇପାରିବେ।