ଭିଜିଲାନ୍ସ ଜାଲରେ ମହାନଦୀ ନର୍ଦ୍ଦର୍ଣ୍ଣ ଡିଭିଜନ୍‌ର ଅଧୀକ୍ଷଣ ଯନ୍ତ୍ରୀ, ୨୧.୮୮ ଲକ୍ଷ ଟଙ୍କା ଜବତ

କଟକ: ଭିଜିଲାନ୍ସ ପଞ୍ଝାରେ ମହାନଦୀ ନର୍ଦ୍ଦର୍ଣ୍ଣ ଡିଭିଜନ୍‌ର ଅଧୀକ୍ଷଣ ଯନ୍ତ୍ରୀ ପ୍ରସନ୍ନଜିତ୍‌ ଦାସ । ଭିଜିଲାନ୍ସ ବିଭାଗ ପକ୍ଷରୁ ଶୁକ୍ରବାର ବିଳମ୍ବିତ ରାତିରେ ଚଢ଼ାଉ କରାଯାଇ କଟକ ଜଗତପୁର ସ୍ଥିତ ମହାନଦୀ ନର୍ଦ୍ଦନ ଡିଭିଜନର ଅଧୀକ୍ଷଣ ଯନ୍ତ୍ରୀ ପ୍ରସେନଜିତ ଦାସଙ୍କଠାରୁ ୨୧,୮୮,୬୨୦ ଟଙ୍କାର ହିସାବ ବିହୀନ ନଗଦ ଅର୍ଥ ଜବତ କରାଯାଇଛି।

ଭିଜିଲାନ୍ସ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଠିକାଦାରମାନଙ୍କଠାରୁ ବିପୁଳ ପରିମାଣର ଲାଞ୍ଚ ଆଦାୟ କରୁଥିବା ନେଇ ପୂର୍ବରୁ ଗୁଇନ୍ଦା ସୂଚନା ମିଳିଥିଲା। ଏହି ଆଧାରରେ ଗତକାଲି ରାତିରେ ଭୁବନେଶ୍ୱର ଏଜି ଛକ ନିକଟରେ ତାଙ୍କର ସରକାରୀ ବୋଲେରୋ ଗାଡ଼ିକୁ ଭିଜିଲାନ୍ସ ଅଧିକାରୀମାନେ ଅଟକାଇଥିଲେ। ଯାଞ୍ଚ ସମୟରେ ତାଙ୍କ ପାଖରୁ ପ୍ରାୟ ୭,୨୮,୬୨୦ ଟଙ୍କା ଜବତ କରାଯାଇଥିଲା। 

ରାସ୍ତାରେ ଧରାପଡ଼ିବା ପରେ ଆଜି ସକାଳେ ତାଙ୍କର ଏକାଧିକ ଠିକଣାରେ ଏକକାଳୀନ ଚଢ଼ାଉ କରାଯାଇଥିଲା। ବିଶେଷକରି ଭୁବନେଶ୍ୱରର ଘାଟିକିଆ ସ୍ଥିତ ଟ୍ରାଇଡେଣ୍ଟ ଗାଲାକ୍ସି ଆପାର୍ଟମେଣ୍ଟର ଫ୍ଲାଟ୍ ନମ୍ବର ଡି-୪୦୧ ଏବଂ ବରଗଡ଼ ସ୍ଥିତ ତାଙ୍କ ପୈତୃକ ବାସଭବନରେ ଯାଞ୍ଚ କରାଯାଇଥିଲା। ଭଡ଼ା ଘର ଯାଞ୍ଚ ବେଳେ ଆହୁରି ୧୪,୬୦,୦୦୦ ଟଙ୍କା ମିଳିଥିଲା। ଏହାକୁ ମିଶାଇ ସମୁଦାୟ ଜବତ ଅର୍ଥର ପରିମାଣ ୨୧,୮୮,୬୨୦ ଟଙ୍କାରେ ପହଞ୍ଚିଛି। 

ଏତେ ବଡ଼ ପରିମାଣର ନଗଦ ଅର୍ଥ କେଉଁଠୁ ଆସିଲା, ସେ ନେଇ ଶ୍ରୀ ଦାସ ସନ୍ତୋଷଜନକ ଉତ୍ତର ଦେଇପାରିନଥିଲେ। ତେଣୁ ସମସ୍ତ ଟଙ୍କାକୁ ଜବତ କରାଯିବା ସହ ଅଧିକ ପଚରାଉଚରା ପାଇଁ ତାଙ୍କୁ ଅଟକ ରଖାଯାଇଛି। ଏନେଇ ଭୁବନେଶ୍ୱର ଭିଜିଲାନ୍ସ ପକ୍ଷରୁ ଏକ ମାମଲା ରୁଜୁ ହୋଇଛି ଏବଂ ଘଟଣାର ଅଧିକ ତଦନ୍ତ ଜାରି ରହିଛି।