କେନ୍ଦ୍ର ଖାଉଟି ମନ୍ତ୍ରୀଙ୍କ ନିକଟରେ ଚାଷୀଙ୍କ ହକ୍‍ ଦାବିକଲା ବିଜେଡି; ବକେୟା ପଡ଼ିଛି ୨୦ ହଜାର କୋଟି

ଭୁବନେଶ୍ୱର: ଓଡ଼ିଶାକୁ ନିରନ୍ତର କେନ୍ଦ୍ର ଅବହେଳାର ସୀମା ଟପିଛି। କୃଷି, ଜଳସେଚନ, ଖଣିଜ ସମ୍ପଦ, ରେଳବାଇ, ଜିଏସ୍‍ଟି ଭାଗ, ହସ୍ତତନ୍ତ ଓ ହସ୍ତ ଶିଳ୍ପ, ଟେଲି ଯୋଗାଯୋଗ ପ୍ରତ୍ୟେକ କ୍ଷେତ୍ରରେ ଓଡ଼ିଶା କ୍ରମାଗତ ଭାବେ କେନ୍ଦ୍ର ଅବହେଳାର ଶିକାର ହୋଇ ଚାଲିଛି। ବିଜେଡି ସାଂସଦ, ରାଜ୍ୟ ସରକାର, ବିଭାଗୀୟ ସଚିବ ଓ ମନ୍ତ୍ରୀ, ମୁଖ୍ୟମନ୍ତ୍ରୀ ଏ ନେଇ କେନ୍ଦ୍ର ନିକଟରେ ଦାବି କରି ଚାଲିଛନ୍ତି; ତଥାପି କେନ୍ଦ୍ର ସରକାରଙ୍କ କୁମ୍ଭକର୍ଣ୍ଣ ନିଦ ଭାଙ୍ଗୁନାହିଁ। ମାତ୍ର ରାଜ୍ୟ ତଥା ରାଜ୍ୟବାସୀଙ୍କ ସ୍ୱାର୍ଥ ସମ୍ବଳିତ ଏସବୁ ପ୍ରସଙ୍ଗ ଉପରେ ଯତ୍ନବାନ ହୋଇ ଧ୍ୟାନ ଦେବା ପାଇଁ ରାଜ୍ୟ ସରକାର କେନ୍ଦ୍ର ସରକାରଙ୍କ ଉପରେ ବାରମ୍ବାର ଚାପ ପକାଇବାକୁ ନିଷ୍ପତ୍ତି ନେଇଛନ୍ତି। ଏହି କ୍ରମରେ ରାଜ୍ୟର ବିଜେଡି ସାଂସଦମାନେ ଗତକାଲି କେନ୍ଦ୍ର ଖାଦ୍ୟ ଓ ଖାଉଟି କଲ୍ୟାଣ ମନ୍ତ୍ରୀ ପୀୟୂଷ ଗୋଏଲଙ୍କୁ ବର୍ଷ ବର୍ଷ ଧରି କେନ୍ଦ୍ର ସରକାରଙ୍କ ଉପରେ ବକେୟା ୨୦ ହଜାର କୋଟି ଟଙ୍କା ପ୍ରଦାନ କରିବାକୁ ଦାବି କରିଛନ୍ତି। ଖାଦ୍ୟ ସୁରକ୍ଷା ରିଆତି ବାବଦରେ ୧୪୨୯୨.୫୧ କୋଟି ଟଙ୍କା ଏବଂ ସୁଧ ବାବଦରେ ଓଡ଼ିଶା ସରକାର ବହନ କରିଥିବା ୬୧୮୭ କୋଟି ଟଙ୍କା ପ୍ରଦାନ କରିବାକୁ ବିଜେଡି ସଂସଦୀୟ ଦଳ କେନ୍ଦ୍ର ଖାଉଟି କଲ୍ୟାଣ ମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି।

ଦଳ ପକ୍ଷରୁ କୁହାଯାଇଛି ଯେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶା ଖାଦ୍ୟ ସୁରକ୍ଷା ସୁନିଶ୍ଚିତ କରିବାରେ ସମଗ୍ର ଦେଶରେ ଆଗୁଆ ରହିଛି। ସେହିପରି ଏକ ଅଗ୍ରଣୀ ରାଜ୍ୟ ଭାବେ ସାଧାରଣ ବଣ୍ଟନ ବ୍ୟବସ୍ଥା (ପିଡିଏସ୍‍)କୁ ଚାଉଳ ଯୋଗାଣ କରିଆସୁଛି। ଓଡ଼ିଶାରୁ ଚାଉଳ ସଂଗ୍ରହ ଦାୟିତ୍ୱ କେନ୍ଦ୍ର ସରକାରଙ୍କ ଉପରେ ନ୍ୟସ୍ତ ରହିଛି; କିନ୍ତୁ ଓଡ଼ିଶାର ଚାଷୀମାନେ ଯେପରି କୌଣସି ସମସ୍ୟାର ସମ୍ମୁଖୀନ ନ ହୁଅନ୍ତି ସେଥିପାଇଁ ରାଜ୍ୟ ସରକାର ଭାରତ ସରକାରଙ୍କ ସହିତ ଏକ ବୁଝାମଣାପତ୍ର ସ୍ୱାକ୍ଷର କରିଛନ୍ତି। ଏହି ବୁଝାମଣାପତ୍ର ଜରିଆରେ ଭାରତ ସରକାରଙ୍କ ପକ୍ଷରୁ ରାଜ୍ୟ ସରକାର ଚାଷୀମାନଙ୍କ ଠାରୁ ଧାନ ସଂଗ୍ରହ କରୁଛନ୍ତି। ନିୟମ ଅନୁସାରେ ରାଜ୍ୟ ସରକାର ବହନ କରିଥିବା ଖର୍ଚ୍ଚକୁ କେନ୍ଦ୍ର ସରକାର ଭରଣା କରିବାର ବ୍ୟବସ୍ଥା ରହିଛି; କିନ୍ତୁ ଓଡ଼ିଶାକୁ ଏହି ଅର୍ଥ ଦେବାରେ କେନ୍ଦ୍ର ସରକାର ଅବହେଳା କରି ଚାଲିଛନ୍ତି। ଇତିମଧ୍ୟରେ କେନ୍ଦ୍ର ସରକାରଙ୍କ ଉପରେ ୨୦ ହଜାର କୋଟି ଟଙ୍କାରୁ ଅଧିକ ଟଙ୍କା ବକେୟା ରହିଲାଣି। ଖାଦ୍ୟ ସବ୍‍ସିଡି ବାବଦରେ କେନ୍ଦ୍ର ସରକାରଙ୍କ ଉପରେ ୧୪,୨୯୨.୫୧ କୋଟି ଟଙ୍କା ବକେୟା ପଡ଼ିଛି। ଏହାମଧ୍ୟରୁ ୧୧,୬୮୯.୨୧ କୋଟି ପ୍ରୋଭିଜିନାଲ ଖାଦ୍ୟ ସବ୍‍ସିଡି ଏବଂ ୨୬୦୩.୩୦ କୋଟି ଟଙ୍କା ଆଡଭାନ୍ସ ସବ୍‍ସିଡି ବାବଦରେ ବକେୟା ରହିଛି। ସେହିପରି କେନ୍ଦ୍ର ସରକାର ଠିକ୍‍ ସମୟରେ ସବ୍‍ସିଡି ଅର୍ଥ ପ୍ରଦାନ କରୁ ନଥିବାରୁ ଏହି ଅର୍ଥକୁ ଭରଣା କରିବାକୁ ରାଜ୍ୟ ସରକାର ବିଭିନ୍ନ ସଂସ୍ଥାରୁ ଋଣ କରିବାକୁ ବାଧ୍ୟ ହେଉଛନ୍ତି। ଏଥିପାଇଁ ରାଜ୍ୟ ଖାଦ୍ୟ ଯୋଗାଣ ନିଗମ ଅତିରିକ୍ତ ସୁଧ ବାବଦରେ ୬୧୮୭ କୋଟି ଟଙ୍କା ବ୍ୟୟ କରିଛି। ତେଣୁ ଏହି ଅର୍ଥ କେନ୍ଦ୍ର ସରକାର ଭରଣା କରିବାର ଆବଶ୍ୟକତା ରହିଛି ବୋଲି ବିଜେଡି ସଂସଦୀୟ ଦଳ ଦାବି କରିଛି।

ଧାନ ଉତ୍ପାଦନରେ ଓଡ଼ିଶା ଏବେ ସମଗ୍ର ଦେଶରେ ଏକ ଅଗ୍ରଣୀ ରାଜ୍ୟର ମାନ୍ୟତା ପାଇଛି। ଧାନ ଉତ୍ପାଦନ ବୃଦ୍ଧି ପରେ ଏହାର କ୍ରୟ ନିମନ୍ତେ ଆବଶ୍ୟକ ଭିତ୍ତିଭୂମି ପ୍ରସ୍ତୁତ କରାଯାଇଛି ଏବଂ ଚାଷୀଙ୍କ ଦେୟ ୨୪ ଘଣ୍ଟା ମଧ୍ୟରେ ବ୍ୟାଙ୍କ ଆକାଉଣ୍ଟରେ ଜମା କରାଯାଉଛି; ମାତ୍ର କେନ୍ଦ୍ର ସରକାର ଏହି ଅର୍ଥ ପ୍ରଦାନ କରିବାରେ ବିଳମ୍ବ କରୁଥିବାରୁ ରାଜ୍ୟ ସରକାରଙ୍କୁ ଏହି ଅର୍ଥ ଅନ୍ୟତ୍ର ଯୋଗାଡ଼ ସହ ସୁଧ ଦେବାକୁ ପଡ଼ୁଛି। ଏହି ପରିପ୍ରେକ୍ଷୀରେ ଓଡ଼ିଶାର କୃଷକ ଲକ୍ଷ ଲକ୍ଷ କୃଷକ ବିଶେଷକରି ପଶ୍ଚିମ ଓଡ଼ିଶାର କୃଷକଙ୍କ ସ୍ୱାର୍ଥ ବ୍ୟାହତ ହେଉଥିବାରୁ ବିଜେଡି ସାଂସଦମାନେ ଏହି ବକେୟା ଅର୍ଥ ରାଶି ଯଥାଶୀଘ୍ର ପ୍ରଦାନ କରିବା ପାଇଁ କେନ୍ଦ୍ର ସରକାରଙ୍କୁ ନିବେଦନ କରିଛନ୍ତି। ଏହି ସଂସଦୀୟ ପ୍ରତିନିଧି ଦଳରେ ଡକ୍ଟର ଅମର ପଟ୍ଟନାୟକ, ପିନାକୀ ମିଶ୍ର, ଡକ୍ଟର ସସ୍ମିତ ପାତ୍ର, ଭର୍ତୃହରି ମହତାବ, ଡକ୍ଟର ଅଚ୍ୟୁତ ସାମନ୍ତ, ମାନସ ମଙ୍ଗରାଜ, ସୁଲତା ଦେଓ, ଚନ୍ଦ୍ରାଣୀ ମୁର୍ମୁ, ନିରଞ୍ଜନ ବିଶି, ପ୍ରମିଳା ବିଶୋଇ, ମଞ୍ଜୁଲତା ମଣ୍ଡଳ, ଶର୍ମିଷ୍ଠା ସେଠୀ ପ୍ରମୁଖ ସାମିଲ ହୋଇଥିଲେ।