ମୁମ୍ବାଇ ମେୟର ନିର୍ବାଚନ: ବିଜେପିର ମେୟର ପ୍ରାର୍ଥୀ ହେଲେ ଋତୁ ତାୱଡେ, ସିନ୍ଦେ ସେନାର ସଞ୍ଜୟ ଘାଡି ଉପ-ମେୟର ପ୍ରାର୍ଥୀ

ମହାରାଷ୍ଟ୍ର: ମୁମ୍ବାଇ ମହାନଗର ନିଗମ (BMC) ନିର୍ବାଚନ ପରେ ଏବେ ମେୟର ପଦ ପାଇଁ ରାଜନୈତିକ ସରଗରମ ବୃଦ୍ଧି ପାଇଛି। ଭାରତୀୟ ଜନତା ପାର୍ଟି ଶନିବାର ଦିନ ମହାୟୁତି ମେଣ୍ଟର ମେୟର ପ୍ରାର୍ଥୀ ଭାବରେ ଋତୁ ତାୱଡେଙ୍କ ନାମ ଘୋଷଣା କରିଛି। ଅନ୍ୟପକ୍ଷରେ, ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନା ସଞ୍ଜୟ ଶଙ୍କର ଘାଡିଙ୍କୁ ଉପ-ମେୟର ପଦ ପାଇଁ ମନୋନୀତ କରିଛି। ଉଭୟ ନେତା ନିଜ ନିଜ ପଦ ପାଇଁ ନାମାଙ୍କନପତ୍ର ଦାଖଲ କରିସାରିଛନ୍ତି।

ମୁମ୍ବାଇ ବିଏମସି ମେୟର ପଦ ପାଇଁ ନିର୍ବାଚନ ଆସନ୍ତା ଫେବୃଆରୀ ୧୧ ତାରିଖରେ ଅନୁଷ୍ଠିତ ହେବ। ଭୋଟ୍ ଗ୍ରହଣ ସକାଳ ୧୧:୦୦ରୁ ଅପରାହ୍ନ ୪:୦୦ ପର୍ଯ୍ୟନ୍ତ ଚାଲିବ ଏବଂ ବିଏମସି ମୁଖ୍ୟାଳୟରେ ଗଣତି ପ୍ରକ୍ରିୟା ଶେଷ ହେବା ପରେ ସେହିଦିନ ହିଁ ଫଳାଫଳ ଘୋଷଣା କରାଯିବ। ଜାନୁଆରୀ ୧୫ରେ ହୋଇଥିବା ନିର୍ବାଚନରେ ବିଜେପି ୮୯ଟି ଆସନ ଜିତି ସର୍ବବୃହତ ଦଳ ଭାବେ ଉଭା ହୋଇଥିବାବେଳେ ସିନ୍ଦେଙ୍କ ଶିବସେନା ୨୯ଟି ଆସନ ହାସଲ କରିଥିଲା, ଯାହା ମେଣ୍ଟକୁ ବୋର୍ଡ ଗଠନ ପାଇଁ ଆବଶ୍ୟକ ସଂଖ୍ୟା ଗରିଷ୍ଠତା ପ୍ରଦାନ କରିଛି।

ମେୟର ପ୍ରାର୍ଥୀ ଋତୁ ତାୱଡେ ୱାର୍ଡ ନମ୍ବର ୧୩୨ (ଘାଟକୋପର)ରୁ କର୍ପୋରେଟର ଅଛନ୍ତି ଏବଂ କ୍ରମାଗତ ତୃତୀୟ ଥର ପାଇଁ ନିର୍ବାଚିତ ହୋଇଛନ୍ତି। ମରାଠା ସମ୍ପ୍ରଦାୟର ହୋଇଥିବା ସତ୍ତ୍ୱେ ଗୁଜୁରାଟୀ ଭୋଟରଙ୍କ ପ୍ରାଧାନ୍ୟ ଥିବା ଅଞ୍ଚଳରେ ତାଙ୍କର ଦୃଢ଼ ପକଡ଼ ରହିଛି। ପୂର୍ବରୁ ସେ ବିଏମସିର ଶିକ୍ଷା କମିଟିର ଅଧ୍ୟକ୍ଷା ଭାବେ କାର୍ଯ୍ୟ କରିଛନ୍ତି ଏବଂ ବର୍ତ୍ତମାନ ମହାରାଷ୍ଟ୍ର ପ୍ରଦେଶ ମହିଳା ମୋର୍ଚ୍ଚାର ଉପାଧ୍ୟକ୍ଷା ଅଛନ୍ତି। ସୂଚନାଯୋଗ୍ୟ ଯେ, ସେ ୨୦୧୨ ମସିହାରେ କଂଗ୍ରେସ ଛାଡି ବିଜେପିରେ ଯୋଗ ଦେଇଥିଲେ।

ଉପ-ମେୟର ପ୍ରାର୍ଥୀ ସଞ୍ଜୟ ଶଙ୍କର ଘାଡି ୱାର୍ଡ ନମ୍ବର ୫ରୁ ଜାନୁଆରୀ ୨୦୨୬ ନିର୍ବାଚନରେ ବିଜୟୀ ହୋଇଛନ୍ତି। ପୂର୍ବରୁ ସେ ଶିବସେନା (UBT)ର ନେତା ଥିଲେ, କିନ୍ତୁ ପରେ ସିନ୍ଦେ ଗୋଷ୍ଠୀରେ ଯୋଗ ଦେଇଥିଲେ। ଦଳର ନିଷ୍ପତ୍ତି ଅନୁଯାୟୀ, ଶିବସେନା ଏହି କାର୍ଯ୍ୟକାଳ ମଧ୍ୟରେ ଚାରିଜଣ କର୍ପୋରେଟରଙ୍କ ମଧ୍ୟରେ ଉପ-ମେୟର ପଦକୁ ରୋଟେସନ୍ କରିବ। ତେଣୁ ସଞ୍ଜୟ ଘାଡି କେବଳ ୧୫ ମାସ ପାଇଁ ଏହି ପଦବୀରେ ରହିବେ ବୋଲି ଜଣାପଡିଛି।