ନୂଆଦିଲ୍ଲୀ: ମହିଳା ସଂରକ୍ଷଣ ବିଲକୁ ରାଜ୍ୟସଭାରେ ବିଜେଡି ସମର୍ଥନ କରିଛି। ଏହାକୁ ସମର୍ଥନ ଜଣାଇଛନ୍ତି ବିଜେଡି ସାଂସଦ ମାନସ ମଙ୍ଗରାଜ । ମହିଳା ସଂରକ୍ଷଣ ବିଲ ପାରିତ କରିବା ପାଇଁ ବିଜୁ ଜନତା ଦଳ ଅନେକ ଦିନରୁ ଦାବି କରିଆସୁଥିଲା। ଏହି ବିଲ ପାରିତ ହେବା ସଙ୍ଗେ ଓଡ଼ିଶା ମୁଖ୍ୟମନ୍ତ୍ରୀଙ୍କ ପ୍ରୟାସର ବିଜୟ ହେବ ବୋଲି ସାଂସଦ ମାନସ ମଙ୍ଗରାଜ କହିଛନ୍ତ। ୨୦୧୮ ମସିହାରେ ବିଜୁ ଜନତା ଦଳ ର ପ୍ରତିନିଧି ୨୨ଟି ଦଳକୁ ଭେଟି ଏହି ବିଲ ପାରିତ କରିବା ପାଇଁ ସମର୍ଥନ ଲୋଡିଥିଲେ । ଏହି ବିଲ ମହିଳାଙ୍କୁ ସଶକ୍ତ କରିବ ବୋଲି ସାଂସଦ ମାନସ ମଙ୍ଗରାଜ କହିଛନ୍ତି।

ସୂଚନା ଅନୁଯାୟୀ, ଗତକାଲି ଲୋକସଭାରେ ପାସ୍ ହୋଇଛି ମହିଳା ସଂରକ୍ଷଣ ବିଲ୍ (ନାରୀ ଶକ୍ତି ବନ୍ଦନ ବିଧେୟକ) । ବିଲ୍ ସପକ୍ଷରେ ୪୫୪ଖଣ୍ଡ ଭୋଟ୍ ପଡିଥିବା ବେଳେ ବିଲ୍ ବିରୋଧରେ ପଡ଼ିଛି ମାତ୍ର ୨ଟି ଭୋଟ୍ । ଏହା ପୂର୍ବରୁ ବିଲ୍ ନେଇ ଲୋକସଭାରେ ଭରପୂର ଆଲୋଚନା ହୋଇଥିଲା। କଂଗ୍ରେସ ନେତ୍ରୀ ସୋନିଆ ଗାନ୍ଧୀଙ୍କ ସମେତ ଅଧିକାଂଶ ଦଳର ସାଂସଦ ବିଲକୁ ସମର୍ଥନ କରିଥିଲେ । ଓବିସି, ଏସସି, ଏସଟି ବର୍ଗର ମହିଳାଙ୍କୁ ଏଥିରେ ସାମିଲ କରିବା ଲାଗି ସୋନିଆ ଦାବି କରିଥିଲେ। ରାହୁଲ ଗାନ୍ଧୀ ବିଲକୁ ସମର୍ଥନ କରିଥିଲେ । ତେବେ ୯୦ ଜଣ ସଚିବଙ୍କ ମଧ୍ୟରୁ ମାତ୍ର ୩ଜଣ ଓବିସି ବର୍ଗର ରହିଥିବା କହି କଟାକ୍ଷ କରିଥିଲେ। ସେପଟେ ମହିଳା ବିଲ୍ ଲାଗି ବିଜୁ ବାବୁ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଶ୍ରେୟ ଦେଇଥିଲେ ବିଜେଡି ସାଂସଦ।

କେନ୍ଦ୍ର ସରକାରଙ୍କ ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ଲୋକସଭାରେ ବିଧେୟକ ବିଷୟରେ ଆଲୋଚନା କରି ମହିଳାଙ୍କ ପ୍ରଗତି ପାଇଁ ବିଲ୍‌ ଆଗତ କରାଯାଇଥିବା କହିଥିଲେ । ବିଲ୍‌ ପାସ୍‌ ହେବା ପରେ ସିଟ୍‌ରେ ଅଂଶୀଦାର ବଢିବ । ମହିଳାଙ୍କୁ ସମାନତା ମିଳିବ । ସେପଟେ ଲୋକସଭାରେ ପ୍ରଥମେ ଆଲୋଚନାରେ ଭାଗ ନେଇ ସୋନିଆ କହିଥିଲେ- ତାଙ୍କ ଜୀବନ ସାଥୀ ରାଜୀବ ଗାନ୍ଧୀ ପ୍ରଥମେ ସମ୍ବିଧାନ ସଂଶୋଧନ କରିଥିଲେ । ବିଲ ଲାଗୁ କରିବାରେ ଡେରି କରିବା ମହିଳାଙ୍କ ପ୍ରତି ଅନ୍ୟାୟ ହେବ । ୧୩ ବର୍ଷ ତଳୁ ମହିଳାମାନେ ଏହି ବିଲ ପାଇଁ ଅପେକ୍ଷା କରିଛନ୍ତି ।