ନୂଆଦିଲ୍ଲୀ : ନଭେମ୍ବର ୧ ଠାରୁ ଆମ ଦୈନନ୍ଦିନ ଜୀବନ ସହିତ ଜଡିତ ଅନେକ ବଡ ପରିବର୍ତ୍ତନ ଘଟିବାକୁ ଯାଉଛି । ଏହି ପରିବର୍ତ୍ତନଗୁଡ଼ିକ ଆମ ଜୀବନରେ ସିଧାସଳଖ ପ୍ରଭାବ ପକାଇବ । ଗୋଟିଏ ପଟେ ଆପଣ କିଛି ନୂତନ ନିୟମରୁ ପ୍ରଣୟନ ଦ୍ବାରା ଆଶ୍ବସ୍ତ ହେବେ ତ ଅନ୍ୟ ପଟେ, ଆପଣ କିଛି ଜିନିଷର ଯତ୍ନବାନ୍‌ ହେବେ। ନହେଲେ ଆପଣ ମଧ୍ୟ ଆର୍ଥିକ କ୍ଷତି ଭୋଗିପାରନ୍ତି। ଏହି ନିୟମଗୁଡ଼ିକର ପରିବର୍ତ୍ତନ ଆପଣଙ୍କ ପକେଟକୁ ପ୍ରଭାବିତ କରିବ। ଏହା ଆପଣଙ୍କ ଘରର ବଜେଟ୍ ଉପରେ ମଧ୍ୟ ପ୍ରଭାବ ପକାଇବ । ତେଣୁ ସେଗୁଡ଼ିକ ବିଷୟରେ ଆମର ଜାଣିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏଥିପାଇଁ ଆସନ୍ତୁ ଜାଣିବା କେଉଁ କେଉଁ ନିୟମରେ ହେବାକୁ ଯାଉଛି ପରିବର୍ତ୍ତନ ଓ ତାହା ଆପଣଙ୍କ ଉପରେ କିଭଳି ପ୍ରକାଇବ ପ୍ରଭାବ ।

ଗ୍ୟାସ୍ ସିଲିଣ୍ଡର ମହଙ୍ଗା ହୋଇପାରେ

ନଭେମ୍ବରର ପ୍ରଥମ ସପ୍ତାହରେ ଏଲପିଜି ସିଲିଣ୍ଡରର ମୂଲ୍ୟ ବୃଦ୍ଧି ହୋଇପାରେ, କାରଣ ପ୍ରତ୍ୟେକ ମାସର ପ୍ରଥମ ଦିନରେ ଏଲପିଜି ସିଲିଣ୍ଡରର ନୂତନ ମୂଲ୍ୟ ପ୍ରକାଶ ପାଇଥାଏ । ଗଣମାଧ୍ୟମ ରିପୋର୍ଟ ଅନୁଯାୟୀ, ନଭେମ୍ବରରେ ଏଲପିଜି ମୂଲ୍ୟ ବୃଦ୍ଧି କରାଯିବ।

ବଦଳିବ ଗ୍ୟାସ ସିଲିଣ୍ଡର ଡେଲିଭରୀ ପ୍ରକ୍ରିୟା

ଅନ୍ୟପଟେ ନଭେମ୍ବର ପହିଲା ଠାରୁ ରୋଷେଇ ଗ୍ୟାସ ସିଲିଣ୍ଡର ଡେଲିଭରୀର ପୁରା ପ୍ରକ୍ରିୟା ବଦଳିବାକୁ ଯାଉଛି । ଗ୍ୟାସ ବୁକିଂ କରିବା ପରେ ଗ୍ରାହକଙ୍କ ମୋବାଇଲକୁ ଏକ ଓଟିପି ଆସିବ । ଯେତେବେଳେ ଗ୍ୟାସ ଡେଲିଭରୀ ଆସିବ ସେତେବେଳେ ଆପଣ ଡେଲିଭରୀ ବୟ ସହିତ ସେହି ଓଟିପି ସେୟାର କରିବେ । ଏହି ଓଟିପି କମ୍ପାନୀ ସିଷ୍ଟମରେ ମିଶିବା ପରେ ଆପଣଙ୍କୁ ଗ୍ୟାସ ଡେଲିଭରୀ ମିଳିବ ।

ବ୍ୟାଙ୍କିଂ ନିୟମ ପରିବର୍ତ୍ତନ ହେବ

ନଭେମ୍ବର ପହିଲାରୁ ବ୍ୟାଙ୍କରେ ଟଙ୍କା ଜମା କରିବା ଓ ଉଠାଣ ଉପରେ ଆପଣଙ୍କୁ ସେବାକର ଦେବାକୁ ପଡିବ । ପ୍ରଥମେ ବ୍ୟାଙ୍କ ଅଫ୍ ବରୋଦା ଏହାର ଆରମ୍ଭ କରିଥିଲା । ଏହି କ୍ରମରେ ନଭେମ୍ବର ପହିଲା ଠାରୁ ସମସ୍ତ ବ୍ୟାଙ୍କ ଗ୍ରାହକ ନିର୍ଦ୍ଧାରିତ ସୀମା ଠାରୁ ଅଧିକ ଟଙ୍କା ଜମା କଲେ ବା ଉଠାଇଲେ ଆପଣଙ୍କୁ ଦେୟ ଦେବାକୁ ହେବ । ଏହାସହ ଲୋକ ଆକାଉଣ୍ଟ ଉପରେ ଆପଣଙ୍କୁ ୧୫୦ ଟଙ୍କା ଦେବାକୁ ପଡିବ । ଖାତା ଧାରକମାନେ ୩ ଥର ଜମା କରିବା ପରେ ପୁଣି ଯଦି ଗୋଟିଏ ମାସରେ ଚତୁର୍ଥ ଥର ପାଇଁ ଟଙ୍କା ଜମା କରନ୍ତି ତେବେ ଅଧିକ ୪୦ ଦେବାକୁ ପଡିବ । ଅନ୍ୟପଟେ ଜନଧନ ଖାତାଧାରକୁ ଜମା ଉପରେ କର ଦେବାକୁ ପଡିବ ନାହିଁ କିନ୍ତୁ ମାସକୁ ୩ ରୁ ଅଧିକ ଥର ଟଙ୍କା ଉଠାଇଲେ ପ୍ରତିଥରକୁ ୧୦୦ ଟଙ୍କା ଅଧିକ ଦେବାକୁ ପଡିବ ।

ଟ୍ରେନ ଟାଇମ ଟେବୁଲ ପରିବର୍ତ୍ତନ

ନଭେମ୍ବର ଆରମ୍ଭରୁ ଭାରତୀୟ ରେଳବାଇ ଟ୍ରେନ ଟାଇମ ଟେବୁଲ ପରିବର୍ତନ କରିବାକୁ ଯାଉଛି। ଏହା ପୂର୍ବରୁ ଧାର୍ୟ୍ୟ ହୋଇଥିଲା। ଏହା ପୂର୍ବରୁ ଅକ୍ଟୋବର ୧ ରୁ ବଦଳିବାର ଥିଲା କିନ୍ତୁ କୌଣସି କାରଣରୁ ଏହାକୁ ନଭେମ୍ବର ୧ ଯାଏଁ ସ୍ଥଗିତ କରାଯାଇଥିଲା। ଆସନ୍ତା ୧ ତାରିଖରୁ ଟ୍ରେନର ନୂଆ ଟାଇମ ଟେବୁଲ ଲାଗୁ କରାଯିବ। ଏହି ପରିବର୍ତନରେ ୧୩ ହଜାର ଯାତ୍ରୀବାହୀ ଟ୍ରେନ ଓ ୭ ହଜାର ମାଲବାହୀ ଟ୍ରେନ ସାମିଲ କରାଯାଇଛି। ତାଛଡା ଦେଶରେ ଚାଲୁଥିବା ପ୍ରାୟ ୩୦ ଟି ରାଜଧାନୀ ଟ୍ରେନ ସମୟ ମଧ୍ୟ ପରିବର୍ତନ ହେବ। ଏଥି ସହିତ ଦୀପାବଳି ଏବଂ ଛଟ୍‌ ପୁଜା ପାଇଁ ଭାରତୀୟ ରେଳବାଇ  ପକ୍ଷରୁ ଅନେକ ନୂତନ ସ୍ୱତନ୍ତ୍ର ଟ୍ରେନ୍ ଆରମ୍ଭ କରିଛି। କିଛି ଟ୍ରେନର କାର୍ଯ୍ୟ ନଭେମ୍ବର ମାସରେ ବିଭିନ୍ନ ତାରିଖରୁ ଆରମ୍ଭ ହେବ | ଏହି ଟ୍ରେନ୍ ଗୁଡିକ ଦେଶର ବିଭିନ୍ନ ମାର୍ଗରେ ଚାଲିବ।

ହ୍ୱାଟସଆପ ବନ୍ଦ ହେବ

ନଭେମ୍ବର ପହିଲାରୁ କିଛି ଆଇଫୋନ ଓ ସ୍ମାର୍ଟଫୋନରେ ହ୍ୱାଟସଅପ ଆପ୍ କାମ କରିବା ବନ୍ଦ କରିଦେବ । ହ୍ୱାଟସଆପର ସୂଚନା ମୁତାବକ ଫେସବୁକ ମାଲିକାନାରେ ଥିବା ପ୍ଲାଟଫର୍ମ ଆଣ୍ଡ୍ରଏଡ ୪.୦.୩ , ଆଇଓଏସ ୯ ଓ କାଇ ଓଏସ ୨.୫.୦ ରେ ସପୋର୍ଟ କରିବ ନାହିଁ।