ଜଳପଥ ସଂଯୋଗୀକରଣ ପ୍ରସ୍ତାବକୁ ରାଜ୍ୟ ସରକାରଙ୍କ ମଞ୍ଜୁରି : ଉପକୃତ ହେବ ଶିଳ୍ପ, ଖଣି ସହିତ କୃଷି ଓ ପର୍ଯ୍ୟଟନ କ୍ଷେତ୍ର

ଭୁବନେଶ୍ୱର : କେବଳ ସଡ଼କ କିମ୍ବା ରେଳପଥ ନୁହେଁ, ଜଳପଥ ବି ଓଡ଼ିଶାର ଶିଳ୍ପ ସମ୍ଭାବନାକୁ ବଳ ଯୋଗାଇବ। ରାଜ୍ୟର ପ୍ରମୁଖ ଶିଳ୍ପାଞ୍ଚଳ ଓ ବନ୍ଦର ମଧ୍ୟରେ ସେତୁ ଭଳି କାର୍ଯ୍ୟ କରିବ। ଏହି ଲକ୍ଷ୍ୟ ନେଇ ରାଜ୍ୟ ସରକାର ନ୍ୟାସନାଲ ଇନଲ୍ୟାଣ୍ଡ ୱାଟରୱେଜ୍‌ ୬୫ ଓ ୫ କାର୍ଯ୍ୟ ତ୍ୱରାନ୍ୱିତ କରିବାକୁ ଯାଉଛନ୍ତି। ଏଥିପାଇଁ ଭାରତ ସରକାରଙ୍କ ଅନୁମୋଦନ ମିଳିସାରିଛି।

ଏହି ପ୍ରକଳ୍ପ ଅଧୀନରେ ୨୦୧ କିମି ମଧ୍ୟରେ ଯାଜପୁର ଜିଲ୍ଲାର ଜୋକଡ଼ିଆ ଓ ପଙ୍କପାଳରୁ ଧାମରା ବନ୍ଦର ଓ ପରାଦୀପ ବନ୍ଦର ଭାୟା ମଙ୍ଗଳଗଡ଼ିକୁ ଜଳପଥରେ ପରିବହନ ପାଇଁ ମାର୍ଗ ପ୍ରସ୍ତୁତ ହେବ। ଦ୍ୱିତୀୟ ପର୍ଯ୍ୟାୟରେ ୧୩୧ କିମି ଦୈର୍ଘ୍ୟ ବିଶିଷ୍ଟ ଜୋକଡିଆ/ପଙ୍କପାଳକୁ ତାଳଚେର ସହିତ ସଂଯୋଗ କରାଯିବ। ସେହିପରି ନ୍ୟାନସାଲ ୱାଟର୍‌‌ୱେଜ୍‌ ୬୪ ଅଧୀନରେ ସମ୍ବଲପୁର ଓ ପାରାଦୀପ ମଧ୍ୟରେ ଜଳପଥ ପରିବହନ ପାଇଁ ପଦକ୍ଷେପ ନିଆଯିବ। ଇନ୍‌ଲ୍ୟାଣ୍ଡ ୱାଟରୱେଜ୍‌‌ ଅଥରିଟି ଅଫ୍‌‌ ଇଣ୍ଡିଆ ଆନୁକୂଲ୍ୟରେ ରାଜ୍ୟ ବାଣିଜ୍ୟ ଓ ପରିବହନ ବିଭାଗ ଏହି ପ୍ରକଳ୍ପ ହାତକୁ ନେବ। ଜଳପଥ ସଂଯୋଗ ହେବା ଦ୍ୱାରା କେବଳ ଶିଳ୍ପ କିମ୍ବା ଖଣି କ୍ଷେତ୍ର ନୁହେଁ, ବରଂ ପର୍ଯ୍ୟଟନ ଓ ପରିବହନ କ୍ଷେତ୍ର ମଧ୍ୟ ଲାଭଦାୟୀ ହୋଇପାରିବ।

ସୂଚନା ଅନୁସାରେ, ଦୁଇ ପର୍ଯ୍ୟାୟ ଜଳପଥ ପ୍ରକଳ୍ପ ପାଇଁ ବିସ୍ତୃତ ପ୍ରକଳ୍ପ ରିପୋର୍ଟ (ଡିପିଆର) ପ୍ରସ୍ତୁତ କରାଯାଇଥିଲା। ପ୍ରଥମ ପର୍ଯ୍ୟାୟରେ ମଙ୍ଗଳାଗଡ଼ିରୁ ପାରାଦ୍ୱୀପ ୬୭ କିମି, ମଙ୍ଗଳଗଡ଼ିରୁ ଧାମରା ୨୮ କିମି ଓ ମଙ୍ଗଳଗଡ଼ିରୁ ପଙ୍କପାଳ ୧୧୭ କିମି ଜଳପଥରେ ସଂଯୋଗ ସ୍ଥାପନ କରାଯିବ। ପ୍ରଥମ ପର୍ଯ୍ୟାୟ କାମ ଶେଷ ପରେ ତାଳଚେର-ପଙ୍କପାଳ (୧୨୦ କିମି) ମଧ୍ୟରେ ସଂଯୋଗ କାମ ଆରମ୍ଭ ହେବ। ବିଶେଷଜ୍ଞଙ୍କ ମତରେ, ବିଶ୍ୱରେ ୭୦% ପଣ୍ୟ ଜଳପଥରେ ପରିବହନ ହୋଇଥାଏ। ଅତୀତରେ ନୌବାଣିଜ୍ୟ ଉତ୍କଳୀୟ ପରମ୍ପରାର ଅବିଚ୍ଛେଦ୍ୟ ଅଙ୍ଗ ଥିବା ବେଳେ ଏବେ ପୁନର୍ବାର ସେହି ଧାରା ଆରମ୍ଭ ହେବାକୁ ଯାଉଛି। ଗୋଟିଏ ପଟେ ରାଜ୍ୟ ସରକାର ଶିଳ୍ପାୟନ ଜରିଆରେ ଅର୍ଥନୈତିକ ଓ ସାମାଜିକ ସମୃଦ୍ଧି ଆଣିବା ଦିଗରେ କାମ କରୁଥିବା ବେଳେ ସୁଗମ ପରିବହନ ବ୍ୟବସ୍ଥା ଏହି ପ୍ରକ୍ରିୟାକୁ ତ୍ୱରାନ୍ୱିତ କରିପାରିବ।