ବ୍ରହ୍ମପୁର: କେବଳ ଚାକିରି ଯେ ଜଣେ ମଣିଷକୁ ପରିଚିତ କରାଇବ ଓ ରୋଜଗାରର ମାଧ୍ୟମ ଯୋଗାଇବ ତାହା ନୁହେଁ ବରଂ ଚିରାଚରିତ ଅନେକ ବୃତ୍ତି ମଧ୍ୟ ଅଧିକ ରୋଜଗାରକ୍ଷମ କରାଇପାରିବ ଓ ନିଜ ସହ ଅନ୍ୟମାନଙ୍କୁ ମଧ୍ୟ ସ୍ୱାବଲମ୍ବୀ କରିପାରିବ। ଏକଥା ପ୍ରମାଣ କରିଛନ୍ତି ପାର୍କ ସାହିରେ ଚାହା ଦୋକାନ କରିଥିବା ଦୁଇ ଯୁବକ। ଏହି ଦୁଇ ପାଠୁଆ ବନ୍ଧୁ ଇଞ୍ଜିନିୟରିଂ ଚାକିରିକୁ ପ୍ରତ୍ୟାଖାନ କରିଛନ୍ତି । ଚାହା ଦୋକନ କରି ସ୍ୱାବଲମ୍ବୀ ହେବାକୁ ଲକ୍ଷ୍ୟ ରଖି ଏକଥା ପ୍ରମାଣିତ କରିଛନ୍ତି। ସେମାନେ ହେଲେ ଦକ୍ଷିଣପୁର ଗ୍ରାମର ଚନ୍ଦନ ସାହୁ ଓ ଗଙ୍ଗାପୁର ଗ୍ରାମର ଜୟଦେବ ପଣ୍ଡା । ଉଭୟଙ୍କ ବସୟ ୨୫ ବର୍ଷ । ବର୍ତ୍ତମାନ ବ୍ରହ୍ମପୁର ସହରର ପାର୍କ ସାହିରେ ଏମାନଙ୍କ ଦ୍ୱାରା ଖୋଲାଯାଇଥିବା ଏକ ଚାହା ଦୋକାନ ସାରା ସହରରେ ଆଲୋଚନାର ବିଷୟବସ୍ତୁ ପାଲଟିଛି। ନାଁ ରଖିଛନ୍ତି “”ଇଞ୍ଜିନିୟର କଫି କେଫ୍” ।

ଏଠାରେ ଗୁଡ଼ ଚାହା, ଅଦା ଚାହା, ଅଳେଇଚ ଚାହା, ବ୍ଲାକ୍ ଟି, ଗ୍ରିନ୍ ଟି, କୁଲ୍ ଟି ଆଦି ବିଭିନ୍ନ ପ୍ରକାରର ଚାହା ପ୍ରସ୍ତୁତ କରି ଗ୍ରାହକଙ୍କୁ ପରିଷିଥାନ୍ତି ଏମାନେ । ଗ୍ରାହକଙ୍କ ଆବଶକ୍ୟତା ଅନୁସାରେ ସମସ୍ତ ପ୍ରକାରର ଚାହା ପ୍ରସ୍ତୁତ କରାଯାଇ ଦିଆଯାଉଥିବା ନରେଶ୍ କୁହନ୍ତି । ଉଭୟେ ହିଞ୍ଜିଳିସ୍ଥିତ ଶିଳ୍ପ ତାଲିମ ଅନୁଷ୍ଠାନରେ ଆଇଟିଆଇ ପଢ଼଼ିଥିଲେ । ପରେ ନରେଶ୍ “ଓଏସ୍ଓ’ କଲେଜରେ ଡ଼ିପ୍ଲୋମା ଇଞ୍ଜିନିୟରିଂ ପଢ଼଼ିଥିବାବେଳେ ଜୟଦେବ ମଧ୍ୟ ଏସ୍ଏମ୍ଆଇଟିରେ ପାଠ ପଢ଼଼ିଥିଲେ। ପଢ଼଼ା ସରିବା ପରେ ଉଭୟେ ମୁମ୍ବାଇ ସ୍ଥିତ ଏକ କମ୍ପାନୀରେ ଟେକ୍ନିକାଲ୍ ସୁପରଭାଇଜ୍ର ଭାବେ କାର୍ଯ୍ୟ ମଧ୍ୟ କରୁଥିଲେ । ଦୀର୍ଘ ୫ବର୍ଷ ସେଠାରେ କାମ କରିବା ପରେ ନିଜ ଅଞ୍ଚଳରେ କିଛି କରିବାକୁ ମନ ବଳାଇଥିଲେ । ମୁମ୍ବାଇଠାରେ ବିଭିନ୍ନ ଚାହା ତିଆରିର କୌଶଳ ଓ ତରିକା ଶିଖିଥିଲେ ଓ ବ୍ରହ୍ମପୁର ସହରରେ ଏକ ଆଧୁନିକ ଚାହା ଦୋକାନ କରିବାକୁ ମନ ବଳାଇଥିଲେ ।

ଏକ୍ଷେତ୍ରରେ ୟ୍ୟୁଟୁବର ସନ୍ଦିପ ମହେଶ୍ୱରୀଙ୍କ ପ୍ରେରଣାଦାୟକ ଭିଡ଼ିଓ ଏମାନଙ୍କୁ ଅଧିକା ଉତ୍ସାହିତ କରିଥିଲା । ଏବେ ଚାହା ଦୋକାନ କରି ବେଶ୍ ଦୁଇ ପଇସା ରୋଜଗାର କରୁଛନ୍ତି ଏମାନେ। ପାର୍କସାହି ଅଞ୍ଚଳରେ ଇଞ୍ଜିନିରୟିଂ ଚାଏୱାଲା ଏବେ ଚର୍ଚ୍ଚାରେ ରହିଥିବାବେଳେ ଦୁଇ ବନ୍ଧୁ ମଧ୍ୟ ଉତ୍ସାହର ସହ କାମ କରୁଛନ୍ତି । ନିଜ ଅଞ୍ଚଳରେ ରୋଜଗାର କରିବାକୁ ଅନେକ ବାଟ ରହିଛି । ନିଜ ବୁଦ୍ଧି ଖଟାଇ ଏଗୁଡ଼ିକ ଆପଣାଇଲେ ପେଟପାଟଣା ପାଇଁ ବାହାର ରାଜ୍ୟକୁ ଯିବାକୁ ପଡ଼ିବ ନାହିଁ ବୋଲି ନରେଶ୍ କୁହନ୍ତି । “କର୍ମ ମୋର ପୋଷେ କୁଟୁମ୍ବ’ ନୀତିରେ ଚାଲି ସମସ୍ତେ ସ୍ୱାବଲମ୍ବୀ ହେବାକୁ ଲକ୍ଷ୍ୟ ରଖିବା ଉଚିତ୍ ବୋଲି ସେ କୁହନ୍ତି । ଚାକିରି ପଛରେ ପଡ଼ି ନିଜ ଭିଟାମାଟି ଛାଡ଼ି ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଉଥିବା ଅନେକ ଯୁବକଙ୍କ ପାଇଁ ନରେଶ୍ ଆଉ ଜୟଦେବଙ୍କ ଉଦ୍ୟମ ଏକ ଉଦାହରଣ ନିଶ୍ଚିତ ।