ବ୍ୟାଙ୍କ୍‍ ଚାକିରି ଆଳରେ ଆଉ ୫ଜଣଙ୍କୁ ଠକେଇ

ଭୁବନେଶ୍ୱର : ଚାକିରି ଆଳରେ ୪୦ଲକ୍ଷ ଠକେଇ କରି ଗିରଫ ହୋଇଥିବା ଶଳା ସୌମ୍ୟରଞ୍ଜନ ରାଉତ ଏବଂ ଭିଣୋଇ ସମତଜିତ୍‍ ରାଉତଙ୍କ ନାମରେ ଅଭିଯୋଗ ତାଲିକା ବଢ଼ିବାରେ ଲାଗିଛି। ରବିବାର ପୁଣି ଉଭୟଙ୍କ ନାମରେ ଆଉ ୫ଟି ଅଭିଯୋଗ ହୋଇଛି। ଜଗତସିଂହପୁର ଏବଂ ନୟାଗଡ଼଼ର ଏକାଧିକ ଚାକିରି ଆଶାୟୀ ଏନେଇ ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିଥିଲେ। କିନ୍ତୁ ଟଙ୍କା କାରବାର ତମାଣ୍ଡୋରେ ହୋଇଥିବାରୁ ମାମଲା ତମାଣ୍ଡୋ ଥାନାକୁ ପଠାଇ ଦେଇଛିି ଚନ୍ଦ୍ରଶେଖରପୁର ଥାନା ପୁଲିସ। ଚାକିରି ଆଶାୟୀମାନଙ୍କୁ ଏସ୍‍ବିଆଇ ପିଓ ଚାକିରି କରାଇ ଦେବାକୁ କହି ୧୬ଲକ୍ଷ ଟଙ୍କା ନେଇଥିଲେ। ଟଙ୍କା ନେବାପରେ ସେମାନଙ୍କୁ ଇଣ୍ଟରଭ୍ୟୁ ପାଇଁ ଦିଲ୍ଲୀ ଡାକି ନେଇଥିଲେ। ଆଶାୟୀମାନେ ନିଜ ହାତରୁ ଟଙ୍କା ଖର୍ଚ୍ଚ କରି ହୋଟେଲରେ ୩୦ ଦିନ ରହିଥିଲେ।

ଏହା ମଧ୍ୟରେ ଭିଣୋଇ ଏକ କାଗଜରେ ସମସ୍ତଙ୍କ ଦସ୍ତଖତ ନେବା ପରେ ଚାକିରି ହୋଇଗଲା ବୋଲି କହି ଓଡ଼ିଶା ପଠାଇ ଦେଇଥିଲେ। କିନ୍ତୁ ସେମାନଙ୍କୁ ନିଯୁକ୍ତି ଆଳରେ ଦିନ ଗଡ଼ାଇଥିଲେ। ଶନିବାର ଗଣମାଧ୍ୟମରେ ଶଳା, ଭିଣୋଇଙ୍କ ଠକେଇ କାରନାମା ପଦାକୁ ଆସିବା ପରେ ଅନ୍ୟ ଆଶାୟୀ ଅଭିଯୋଗ କରିଛନ୍ତି। ସେପଟେ ଗିରଫ ହୋଇଥିବା ଭିଣୋଇ ଠକେଇ ମାମଲାରେ ଝାରପଡ଼ା ଜେଲକୁ ଯାଇଛି। କିନ୍ତୁ ଶଳାର କୋଭିଡ୍‍ ପରୀକ୍ଷା ପଜିଟିଭ୍‍ ଆସିବା ପରେ ତାକୁ ସିଆରପିସି ୪୧ରେ ନୋଟିସ୍‍ ଦେଇ ଛଡାଯାଇଛି। ୨୧ ଦିନ ପାଇଁ ସେ ହୋମ୍‍ କ୍ୱାରେଣ୍ଟାଇନ୍‍ରେ ରହିବ। ଏହାପରେ ପୁଲିସ ତାଙ୍କୁ ଥାନାକୁ ଡାକି ଗିରଫ କରି ଜେଲ ପଠାଇବ ବୋଲି ଜଣେ ଅଧିକାରୀ କହିଛନ୍ତି।