ଖଣ୍ଡପଡ଼ା: ନୟାଗଡ଼ ଜିଲ୍ଲା ଖଣ୍ଡପଡା ବ୍ଲକ ଲୋକମାନେ ସାଧାରଣତଃ କୃଷି ଏବଂ ବେପାର ବାଣିଜ୍ୟ ଉପରେ ନିର୍ଭର କରି ଚଳିଥାନ୍ତି । ଚାଷ ଉପଯୋଗୀ ପାଇଁ ବର୍ତ୍ତମାନ ବିଭିନ୍ନ ଆଧୁନିକ ଯନ୍ତ୍ରପାତି ବ୍ୟବହାର ହେଉଥିଲେ ମଧ୍ୟ ବହୁ ଚାଷୀ ଏବେ ବି ଗୁହାଳ ବଳଦ ରଖି ଚାଷ କାର୍ୟ୍ୟରେ ଲଗାଇଥାନ୍ତି । ତା ସାଙ୍ଗକୁ ଅନେକ ଲୋକ ଘରେ ଗୃହ ପାଳିତ ପଶୁ ଗାଈ, ଛେଳି, ମେଣ୍ଢା ଆଦି ରଖିଥାନ୍ତି । ହିନ୍ଦୁ ଧର୍ମରେ ବିଶ୍ଵାସ କରାଯାଏ ଯେ ଗୁହାଳେ ଗୋରୁ ମାତାଙ୍କୁ ରଖିଲେ ଘରେ ଲକ୍ଷ୍ମୀ ଠାକୁରାଣୀ ବାସ କରନ୍ତି ଏବଂ କ୍ଷୀର, ଦହି, ଘିଅ , ଲହୁଣୀ ଆଦି ପୃଷ୍ଟିକର ଖାଦ୍ୟ ପଦାର୍ଥ ମିଳିଥାଏ । ବିଭିନ୍ନ କୃଷି କ୍ଷେତ୍ରରେ ଗାଈ ଗୋରୁଙ୍କ ଗୋବର ମଧ୍ୟ ବ୍ୟବହାର କରାଯାଇଥାଏ । ଗାଈ ମାନଙ୍କ ସୁରକ୍ଷା ପାଇଁ ଉପଯୁକ୍ତ ଗୁହାଳର ଅଭାଵ ପରିଲିକ୍ଷିତ ହେଉଥିବା ବେଳେ ରାଜ୍ୟ ସରକାର “ଆଦର୍ଶ ଗାଈ ଗୁହାଳ’ ମାଧ୍ୟମରେ ବୈପ୍ଳବିକ ପରିବର୍ତ୍ତନ ଆଣିଥିବା ଦେଖାଯାଇଛି ।

ଯେଉଁମାନେ ନିଜ ଘରେ ବଳଦ, ଗାଈ ,ବାଛୁରୀ ପାଳିଥିବେ ସରକାରଙ୍କ ‘ଆଦର୍ଶ ଗାଈ ଗୁହାଳ’ ଯୋଜନାରେ ସାମିଲ କରାଯାଇ ଏକ ଲକ୍ଷ ତେର ହଜାର ଟଙ୍କାର ସରକାରୀ ଅନୁଦାନ ପ୍ରଦାନ କରାଯାଉଛି । ଯାହାଦ୍ୱାରା ଗୋ ପାଳନ ପାଇଁ ଲୋକମାନଙ୍କ ଆଗ୍ରହ ଦେଖା ଦେଇଛି । ଖଣ୍ଡପଡ଼ା ବ୍ଲକ ରାଣୀଛେଲୀ ପଞ୍ଚାୟତ ମର୍ଦ୍ଦାବାଡ଼ି ଗ୍ରାମର ନବକିଶୋର ଦାଶଙ୍କ ଆଦର୍ଶ ଗୁହାଳ ଏବେ ଅନ୍ୟମାନଙ୍କୁ ଏହି ଯୋଜନାରେ ସାମିଲ କରିବା ପାଇଁ ପ୍ରେରଣା ଯୋଗାଇଛି । ଗୋପାଳନ ପାଇଁ ଏହି ଯୋଜନା ଉତ୍ସାହ ଓ ଆଗ୍ରହ ସୃଷ୍ଟି କରୁଥିବା ଅନେକ ମତ ଦେଇଛନ୍ତି । ମାତ୍ର ଖଣ୍ଡପଡ଼ା ବ୍ଲକର କେତେ ଗୁଡିଏ ପଞ୍ଚାୟତରେ ଆଦର୍ଶ ଗୁହାଳ ଯୋଜନାରେ ବ୍ୟାପକ ଭାବେ ଅନିୟମିତତା ହୋଇଥିବା ଜଣାପଡିଛି। ଯୋଗ୍ୟ ହିତାଧିକାରୀଙ୍କ ପାଇଁ ଏହି ଯୋଜନା ପ୍ରଯୁଜ୍ୟ ହୋଇଥିଲେ ମଧ୍ୟ ସେମାନଙ୍କୁ ଅଣଦେଖା କରାଯାଇଛି । ଗୁହାଳେ ଗାଈ ନଥାଇ ଅନେକ ବ୍ୟକ୍ତିଙ୍କ ନାମକୁ ଏହି ଯୋଜନାରେ ସାମିଲ କରାଯାଇଥିବା ଭଳି ସାଙ୍ଘାତିକ ଅଭିଯୋଗ ମଧ୍ୟ ସାମ୍ନାକୁ ଆସିଛି । ଏହାର ଉଚ୍ଚସ୍ତରୀୟ ତଦନ୍ତ ହେବା ଦରକାର ବୋଲି ସାଧାରଣରେ ଅଭିଯୋଗ ହେଉଛି ।