ଭୁବନେଶ୍ୱର: ନିକଟ ଅତୀତରେ ଭୁବନେଶ୍ୱର ବିମାନବନ୍ଦରରୁ ବିପୁଳ ପରିମାଣ ସୁନା-ରୁପା ଜବତ ରହସ୍ୟ ଉପରୁ ପର୍ଦ୍ଦା ହଟିନଥିବା ବେଳେ ପୁଣି ବିମାନବନ୍ଦରରୁ ସୁନା ଅଳଙ୍କାର ଜବତ କରାଯାଇଛି। ଗୁରୁବାର ପୁଣି ୨୦ କିଲୋ ସୁନା ଅଳଙ୍କାରକୁ ଜବତ କରିଛି ସିଟି ଜିଏସ୍‌ଟି ସ୍କ୍ବାଡ୍ ଜବତ ସୁନା ଅଳଙ୍କାର ଭିତରୁ ୪କିଲୋ ସୁନାର ତଥ୍ୟ ପାଉନି ସିଟି ଜିଏସ୍‌ଟି ବିଭାଗ। ଟ୍ୟାକ୍ସ ଇନ୍‌ ଭଏସ ଓ ଉପଯୁକ୍ତ ବିଲ୍‌ ଦେଖାଇ ନପାରିବାରୁ ସୁନା ଅଳଙ୍କାରକୁ ଜବତ କରି ତଦନ୍ତ କରାଯାଉଛି।

ମିଳିଥିବା ତଥ୍ୟ ଅନୁଯାୟୀ, ମୁମ୍ବାଇରୁ ବିମାନରେ ସୁନାଗହଣା ଭୁବନେଶ୍ୱର ଆସିଥିବା ଜିଏସ୍‌ଟି ବିଭାଗ ଖବର ପାଇଥିଲା। ‘ସିକୁଏଲ ଲଜିଷ୍ଟିକ’ ନାମ ଏକ ସଂସ୍ଥା ସୁନା ନେଇ ଆସୁଥିଲା। ବିମାନବନ୍ଦର ସାମ୍‌ନାରେ ସିଟି ଜିଏସ୍‌ଟିର ଅଧିକାରୀମାନେ ଉକ୍ତ ଗାଡିକୁ ଅଟକାଇଥିଲା। ଗାଡିକୁ ଯାଞ୍ଚ କରିବା ପରେ ସେଥିରୁ ୨୦ କିଲୋ ସୁନା ଅଳଙ୍କାର ମିଳିଥିଲା। ସେଥିରୁ ୪ କିଲୋର ହିସାବ ମିଳି ପାରୁନଥିଲେ। ତେଣୁ ଏହା ଉପରେ ମୋଟା ଅଙ୍କର ଜରିମାନା ପକାଇବା ଲାଗି ଯୋଜନା ହୋଇଛି।

ଜବତ କରାଯାଇଥିବା ସୁନା ଅଳଙ୍କାର ଭୁବନେଶ୍ୱର ପ୍ରତିଷ୍ଠିତ ଅଳଙ୍କାର ଦୋକାନୀଙ୍କ ନିକଟକୁ ଆସିଥିବା ଜଣାପଡ଼ିଛି। ତେଣୁ ସୁନା ଦୋକାନୀଙ୍କୁ ବିଲ୍‌ ସହ ଅନ୍ୟାନ୍ୟ କାଗଜପତ୍ର ଆଣିବାକୁ କୁହାଯାଇଛି। ଯାଞ୍ଚ କରିବା ପରେ ଟିକସ ଫାଙ୍କିବା ଲାଗି ସୁନା ଅଳଙ୍କାର ପରିବହନ ଲାଗି କାଗଜପତ୍ରକୁ ଜାଲିଆତି କରାଯାଇଥିବା ସିଟି ଜିଏସ୍‌ଟି ଜାଣିବାକୁ ପାଇଥିଲା।

ସୂଚନାଯୋଗ୍ୟ ଯେ, କିଛି ଦିନ ତଳେ ଦୁଇଟି ପରିବହନ ସଂସ୍ଥା ଜରିଆରେ ମୁମ୍ୱଇରୁ ଭୁବନେଶ୍ୱରକୁ ସୁନା ରୁପା ଆସୁଥିବା ବେଳେ ସିଟି ଜିଏସ୍‌ଟି ବିମାନ ବନ୍ଦର ନିକଟରେ ଚଢ଼ଉ କରି ଦୁଇଟି ଗାଡ଼ିରୁ ପ୍ରାୟ ୮୦ କେଜି ସୁନା ଓ ୨ କ୍ୱିଣ୍ଟାଲ ରୁପା ଜବତ କରିଥିଲା। ଗାଡ଼ିରେ ଥିବା ୪ ଯୁବକଙ୍କୁ ଅଟକ ରଖି ତଦନ୍ତକାରୀ ସଂସ୍ଥା ପଚରାଉଚରା କରିଥିଲା। ରାଜଧାନୀର ଜଣେ ପ୍ରତିଷ୍ଠିତ ସୁନା ବ୍ୟବସାୟୀ ଏହାକୁ ୨୦ ଜଣ ଛୋଟ ବ୍ୟବସାୟୀଙ୍କ ନାମରେ ଆଣିଥିବା ଜଣାପଡ଼ିଥିଲା। ଯାଞ୍ଚ କରିବା ପରେ ଟିକସ ଫାଙ୍କିବା ଲାଗି ସୁନା ଓ ରୁପା ପରିବହନ ଲାଗି କାଗଜପତ୍ରକୁ ଜାଲିଆତି କରାଯାଇଥିବା ସିଟି ଜିଏସ୍‌ଟି ଜାଣିବାକୁ ପାଇଥିଲା। ଯେଉଁଥିରେ ଅଢେଇ କିଲୋ ସୁନା ଅଳଙ୍କାରର ତଥ୍ୟ ପାଇ ନଥିଲା ସିଟି ଜିଏସଟି।