Ghooskhor Pandat: ‘ଘୁଷଖୋର ପଣ୍ଡତ’ ଟାଇଟଲ୍‌କୁ ନେଇ ବିବାଦ, ମନୋଜ ବାଜପେୟୀଙ୍କ ନୂଆ ଫିଲ୍ମକୁ ବୟକଟ୍ ଧମକ

ବଲିଉଡର ଦମଦାର ଅଭିନେତା ମନୋଜ ବାଜପେୟୀ ତାଙ୍କ ଆଗାମୀ ଚଳଚ୍ଚିତ୍ର ‘ଘୁଷଖୋର ପଣ୍ଡତ’ (Ghooskhor Pandat) ସହିତ ପରଦାକୁ ଫେରୁଛନ୍ତି। ଫେବୃଆରୀ ୩ ତାରିଖରେ ମୁମ୍ବାଇରେ ଆୟୋଜିତ ଏକ କାର୍ଯ୍ୟକ୍ରମରେ ଲୋକପ୍ରିୟ ଓଟିଟି ପ୍ଲାଟଫର୍ମ Netflix ଏହାର ଟିଜର ରିଲିଜ୍ କରିଥିଲା। ହେଲେ ଟିଜର ଆସିବା ପରେ ଫିଲ୍ମର ଶୀର୍ଷକ ବା ଟାଇଟଲ୍‌କୁ ନେଇ ଏବେ ସୋସିଆଲ ମିଡିଆରେ ଜୋରଦାର ହଙ୍ଗାମା ଆରମ୍ଭ ହୋଇଯାଇଛି।

ଅନେକ ସୋସିଆଲ ମିଡିଆ ବ୍ୟବହାରକାରୀ ଫିଲ୍ମର ନାମକୁ ‘ଜାତିବାଦୀ’ ବୋଲି ଅଭିଯୋଗ କରିଛନ୍ତି। ସେମାନଙ୍କ କହିବା କଥା ହେଲା ଯେ, ଏହି ଶୀର୍ଷକ ଏକ ନିର୍ଦ୍ଦିଷ୍ଟ ସମ୍ପ୍ରଦାୟ (ବ୍ରାହ୍ମଣ ସମାଜ)କୁ ଟାର୍ଗେଟ କରୁଛି। ୟୁଜର୍ସମାନେ ଦାବି କରିଛନ୍ତି ଯେ, ଯଦି ଓଟିଟି ପ୍ଲାଟଫର୍ମ ତୁରନ୍ତ ଏହାର ନାମ ପରିବର୍ତ୍ତନ ନକରେ, ତେବେ ଆଗାମୀ ଦିନରେ ନେଟଫ୍ଲିକ୍ସକୁ ବୟକଟ୍ କରାଯିବ। ଅନେକ ପ୍ରଶ୍ନ କରିଛନ୍ତି ଯେ, କଣ ନିର୍ମାତାମାନେ ଅନ୍ୟ କୌଣସି ସମ୍ପ୍ରଦାୟ ପାଇଁ ଏଭଳି ଶବ୍ଦ ବ୍ୟବହାର କରିବାକୁ ସାହସ କରିପାରିବେ?

‘ଏକ୍ସ’ରେ ଲୋକମାନେ ନିଜର ଅସନ୍ତୋଷ ବ୍ୟକ୍ତ କରିଛନ୍ତି। ଜଣେ ବ୍ୟବହାରକାରୀ ଲେଖିଛନ୍ତି, "ଏହା ଅତ୍ୟନ୍ତ ଲଜ୍ଜାଜନକ ବିଷୟ। ଏକ ନିର୍ଦ୍ଦିଷ୍ଟ ସମ୍ପ୍ରଦାୟକୁ ସହଜ ଟାର୍ଗେଟ୍ କରାଯାଉଛି। ଏହାକୁ ତୁରନ୍ତ ପରିବର୍ତ୍ତନ କରନ୍ତୁ କିମ୍ବା ବ୍ୟାନ୍ ପାଇଁ ପ୍ରସ୍ତୁତ ରୁହନ୍ତୁ।" ଅନ୍ୟ ଜଣେ ବ୍ୟକ୍ତି ନିର୍ଦ୍ଦେଶକଙ୍କୁ ସମାଲୋଚନା କରି କହିଛନ୍ତି ଯେ, ନିର୍ଦ୍ଦେଶକ ଏବଂ କଳାକାର ନିଜେ ସେହି ସମ୍ପ୍ରଦାୟର ହୋଇ ମଧ୍ୟ କିଛି ଟଙ୍କା ପାଇଁ ନିଜ ସମାଜକୁ ବଦନାମ କରୁଛନ୍ତି।

‘ଘୁଷଖୋର ପଣ୍ଡତ’ ଏକ କ୍ରାଇମ୍ ଥ୍ରୀଲର ଚଳଚ୍ଚିତ୍ର, ଯାହାର ନିର୍ଦ୍ଦେଶନା ରୀତେଶ ଶାହା ଦେଇଛନ୍ତି ଏବଂ କାହାଣୀ ନୀରଜ ପାଣ୍ଡେ ଲେଖିଛନ୍ତି। ଏଥିରେ ମନୋଜ ବାଜପେୟୀ ଜଣେ ଦୁର୍ନୀତିଗ୍ରସ୍ତ ଦିଲ୍ଲୀ ପୋଲିସ ଅଫିସର ‘ଅଜୟ ଦୀକ୍ଷିତ’ ଭୂମିକାରେ ନଜର ଆସିବେ। ଏହି ଫିଲ୍ମରେ ନୁସରତ ଭରୁଚା, ଦିବ୍ୟା ଦତ୍ତ, ସାକିବ ସଲିମ୍, ଅକ୍ଷୟ ଓବରଏ, ଶ୍ରଦ୍ଧା ଦାସ ଏବଂ କିକୁ ଶାରଦା ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି।