ପୁଣି ଝଟ୍‌କା ଦେଲା ଆମେରିକା : ଚାବାହାର ବନ୍ଦର ବ୍ୟବହାର କରିପାରିବନି ଭାରତ

ୱାଶିଂଟନ : ଟାରିଫ୍‌ ପରେ ଆମେରିକା ଭାରତକୁ ଆଉ ଏକ ବଡ଼ ଝଟ୍‌କା ଦେଇଛି। ଏହି ଝଟ୍‌କା ଇରାନର ଚାବାହାର ବନ୍ଦର ଜରିଆରେ ଭାରତକୁ ଲାଗିଛି। କାରଣ ଆମେରିକା ଚାବାହାର ବନ୍ଦର ଉପରେ ଛାଡ଼ କରିଥ଄ବା ପ୍ରତିବନ୍ଧକ ଏବେ ପ୍ରତ୍ୟାହାର କରିନେଇ ନୂଆ କଟକଣା ଲାଗୁ କରିଛି। ଫଳସ୍ୱରୂପ, ଚାବାହାର ବନ୍ଦର ପରିଚାଳନା କରୁଥିବା ଯେ କୌଣସି ବ୍ୟକ୍ତି କିମ୍ବା କମ୍ପାନୀ ଆମେରିକାର ପ୍ରତିବନ୍ଧକ ଅଧୀନରେ ରହିବେ। ଏହାକୁ ଭାରତ ପାଇଁ ଏକ ବଡ଼ ଧକ୍କା ବୋଲି କୁହାଯାଉଛି। ଭାରତ ଚାବାହାର ବନ୍ଦର ବିକାଶରେ କୋଟି କୋଟି ଟଙ୍କା ନିବେଶ କରିଛି। ଆମେରିକାର ପ୍ରତିବନ୍ଧକ କେବଳ ନିବେଶ ବୁଡ଼ିବାର ଆଶଙ୍କା ସୃଷ୍ଟି କରେ ନାହିଁ ବରଂ ଭାରତର ରଣନୈତିକ ପ୍ରସ୍ତୁତିକୁ ମଧ୍ୟ ବାଧା ଦେଇଛି। ପୂର୍ବରୁ, ଆମେରିକା ୫୦% ଶୁଳ୍କ ଲଗାଇ ଭାରତକୁ ଆର୍ଥିକ କ୍ଷତି ପହଞ୍ଚାଇସାରିଛି।

ଆମେରିକା ୨୦୧୮ର ପ୍ରତିବନ୍ଧକ ଛାଡ଼କୁ ପ୍ରତ୍ୟାହାର କରିନେଇଛି, ଯାହା ଇରାନର ଚାବାହାର ବନ୍ଦରର ବିକାଶକୁ ଅନୁମତି ଦେଇଥିଲା। ଚଳିତମାସ ୨୯ରୁ ଆମେରିକାର ଟ୍ରେଜେରୀ ବିଭାଗ ଚାବାହାର ବନ୍ଦର ପରିଚାଳନା କରୁଥିବା ବ୍ୟକ୍ତିବିଶେଷଙ୍କ ଉପରେ ଏହି ପ୍ରତିବନ୍ଧକ ଲାଗୁ କରିବ। ଏ ସମ୍ପର୍କରେ ଆମେରିକାର ବିଦେଶ ବିଭାଗ ଏକ ବିବୃତ୍ତି ଜାରି କରି କହିଛି ଯେ, ଇରାନ ଶାସନକୁ ଅଲଗା କରିବା ପାଇଁ ରାଷ୍ଟ୍ରପତି ଟ୍ରମ୍ପଙ୍କ ସର୍ବାଧିକ ଚାପ ନୀତି ସହିତ ସଙ୍ଗତ। ଏହି କଟକଣା କାର୍ଯ୍ୟକାରୀ ହେବା ପରେ, ଚାବାହାର ବନ୍ଦର ପରିଚାଳନା କରୁଥିବା କିମ୍ବା ଆଇଏଫ୍‌ସିଏ ରେ ବର୍ଣ୍ଣିତ ଅନ୍ୟ କାର୍ଯ୍ୟକଳାପରେ ନିୟୋଜିତ ଥିବା ବ୍ୟକ୍ତିବିଶେଷ ଆଇଏଫ୍‌ସିଏ ଅଧୀନରେ କଟକଣାର ଅଧୀନ ହୋଇପାରନ୍ତି। ଏହା ଭାରତ, ଇରାନ, ଆଫଗାନିସ୍ତାନ ଏବଂ ମଧ୍ୟ ଏସୀୟ ଦେଶଗୁଡ଼ିକ ମଧ୍ୟରେ ବାଣିଜ୍ୟ ପାଇଁ ଏକ ଗୁରୁତ୍ୱପୂର୍ଣ୍ଣ ପ୍ରବେଶ ପଥ ଭାବରେ କାର୍ଯ୍ୟ କରେ। ଭାରତ ଏହି ବନ୍ଦରକୁ ଅନ୍ତର୍ଜାତୀୟ ଉତ୍ତର-ଦକ୍ଷିଣ ପରିବହନ କରିଡରର ଅଂଶ ଭାବରେ ବିକଶିତ କରୁଛି। ଏହା ମଧ୍ୟ ଏସିଆ ଦେଇ ରୁଷ ଏବଂ ୟୁରୋପକୁ ସଂଯୋଗ କରୁଥିବା ଏକ ପରିବହନ ପ୍ରକଳ୍ପ। ଚାବାହାର ବନ୍ଦର ପାକିସ୍ତାନର ଗ୍ୱାଦର ବନ୍ଦର ନିକଟରେ ଅବସ୍ଥିତ, ଯାହା ଏହାକୁ ଭାରତ ପାଇଁ ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ କରିଥାଏ।

ଚାବାହାର ବନ୍ଦରକୁ ପରିଚାଳନା କରିବାର ଅଧିକାର ଭାରତର ଅଛି, ଏବଂ ଏହାର କାର୍ଯ୍ୟ ଇଣ୍ଡିଆ ପୋର୍ଟସ୍ ଗ୍ଲୋବାଲ୍ ପ୍ରାଇଭେଟ୍ ଲିମିଟେଡ୍ ଦ୍ୱାରା ତଦାରଖ କରାଯାଏ। ଭାରତ ଚାବାହାର ଏବଂ ଜାହେଦାନ ମଧ୍ୟରେ ଏକ ରେଳ ଲାଇନ ନିର୍ମାଣ ଆରମ୍ଭ କରିଛି। ଏହି ବନ୍ଦର ମଧ୍ୟ ଭାରତ ପାଇଁ ଆଫଗାନିସ୍ତାନ ଭଳି ଦେଶଗୁଡ଼ିକୁ ମାନବିକ ସହାୟତା ପହଞ୍ଚାଇବା ପାଇଁ ଏକ ଗୁରୁତ୍ୱପୂର୍ଣ୍ଣ ପଥ। ଭାରତ ବନ୍ଦରର ବିକାଶ ପାଇଁ ଗୁରୁତ୍ୱପୂର୍ଣ୍ଣ ଆର୍ଥିକ ସହାୟତା ଯୋଗାଇଛି ଏବଂ ଏହାକୁ ଏକ ମୁକ୍ତ ଅର୍ଥନୈତିକ କ୍ଷେତ୍ର ସହିତ ଯୋଡ଼ିଛି।