ଭୁବନେଶ୍ୱର : ତିନି ମାମସର ବ୍ୟବଧାନ ପରେ ଓଡ଼ିଶାରେ କରୋନା ମାମଲା ବୃଦ୍ଧି ପାଇଛି। ଦୈନିକ ସଂକ୍ରମିତଙ୍କ ସଂଖ୍ଯା ଶହେ ପାର କରୁଛି।  ଗତକାଲି ରାଜ୍ୟରେ ୧୬୧ କରୋନା ପଜିଟିଭ୍‍ ଚିହ୍ନଟ ହୋଇଥିଲେ ଆଉ ଆଜି ପୁଣି ୧୫୫ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ନୂଆ ସଂକ୍ରମିତଙ୍କ ମଧ୍ୟରେ ୧୬ ଜଣ ନାବାଳକ ଅଛନ୍ତି। ଏଥିସହ ରାଜ୍ୟରେ ସକ୍ରିୟ ମାମଲା ମଧ୍ୟ ବୃଦ୍ଧି ପାଇ ୭୨୯ରେ ପହଞ୍ଚିଛି।

ରାଜ୍ୟରେ କୋଭିଡ୍‍ ସ୍ଥିତି ସମ୍ପର୍କରେ ଜନସ୍ୱାସ୍ଥ୍ୟ ନିର୍ଦ୍ଦେଶକ ପ୍ରଫେସର ନିରଞ୍ଜନ ମିଶ୍ର କହିଛନ୍ତି, କିଛି ରାଜ୍ୟରେ ସଂକ୍ରମଣ ବଢ଼ିବା ପରେ ଓଡ଼ିଶାରେ ତାହାର ପ୍ରତିଫଳନ ହୋଇଛି। ଆମ ରାଜ୍ୟର ପ୍ରମୁଖ ସହରରେ ସଂକ୍ରମଣ ହାର ଅଧିକ ରହୁଛି। କିନ୍ତୁ ପରିସ୍ଥିତି ଚିନ୍ତାଜନକ ହୋଇ ନାହିଁ।

ଅଧିକାଂଶ ଲୋକ ଲକ୍ଷଣ ବିହୀନ ଥିବା ବେଳେ ୨% ରୋଗୀ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଆଗକୁ ଯଦି ସଂକ୍ରମଣ ବଢ଼େ ତା ହେଲେ ପୂର୍ବଭଳି ତାହା ଦ୍ୱିତୀୟ କିମ୍ବା ତୃତୀୟ ଲହର ଭଳି ହେବାର ସମ୍ଭାବନା କମ୍‍। ପ୍ରଫେସର ମିଶ୍ର କହିଛନ୍ତି, ରଥଯାତ୍ରା ପାଇଁ ରାଜ୍ୟ ସରକାର ସତର୍କ ଅଛନ୍ତି। ଚିକିତ୍ସା ଓ ସ୍କ୍ରିନିଂ ବ୍ୟବସ୍ଥା କରାଯାଇଛି। କିନ୍ତୁ ଅନୁରୋଧ କରିବା ସତ୍ତ୍ବେ ଯଦି ଲୋକେ ପୁରୀକୁ ଆସିବେ ତା ହେଲେ ସଂକ୍ରମଣ ବଢ଼ିବା ଆଶଙ୍କାକୁ ଏଡ଼ାଇ ଦେଇ ହେବ ନାହିଁ। ରଥଯାତ୍ରାର ଗହଳି ଭିତରେ ସଂକ୍ରମଣ ବଢ଼ିବ। ପୁରୀରୁ ଫେରିବା ପରେ ଯଦି କୋଭିଡ୍‍ ଲକ୍ଷଣ ଦେଖା ଦେଉଛି ତା ହେଲେ ତୁରନ୍ତ ଟେଷ୍ଟିଂ କରାଇନେବା ଆବଶ୍ୟକ ବୋଲି ପ୍ରଫେସର ମିଶ୍ର କହିଛନ୍ତି।