ବିମାନରେ ବୋମା ଆତଙ୍କ: କୁଏତରୁ ଦିଲ୍ଲୀ ଆସୁଥିବା ଇଣ୍ଡିଗୋ ବିମାନ ଅହମଦାବାଦରେ କଲା ଜରୁରୀ ଅବତରଣ

ନୂଆଦିଲ୍ଲୀ: ବିମାନରେ ବୋମା ଆତଙ୍କ । କୁଏତରୁ ଦିଲ୍ଲୀ ଆସୁଥିବା ଇଣ୍ଡିଗୋ ବିମାନରେ ବୋମା ଥିବା ନେଇ ଆତଙ୍କ ଖେଳିଯାଇଥିଲା। ଏହି ସୂଚନା ମିଳିବା ପରେ ବିମାନଟିକୁ ତୁରନ୍ତ ଗୁଜୁରାଟର ଅହମଦାବାଦ ସ୍ଥିତ ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରକୁ ଡାଇଭର୍ଟ କରାଯାଇ ସୁରକ୍ଷିତ ଭାବେ ଅବତରଣ କରାଯାଇଛି।

ରିପୋର୍ଟ ଅନୁଯାୟୀ, ଏହି ବିମାନରେ ମୋଟ ୧୮୦ ଜଣ ଯାତ୍ରୀ ଯାତ୍ରା କରୁଥିଲେ। ବିମାନଟି ସକାଳ ପ୍ରାୟ ୬.୪୦ ମିନିଟ ସମୟରେ ଅହମଦାବାଦ ବିମାନବନ୍ଦରରେ ଅବତରଣ କରିଥିଲା। ଅବତରଣ ପରେ ସମସ୍ତ ଯାତ୍ରୀଙ୍କୁ ବିମାନରୁ ସୁରକ୍ଷିତ ଭାବେ ବାହାର କରାଯାଇଥିଲା।

ସୂଚନା ମୁତାବକ, ବିମାନ ଉଡ଼ାଣ ଭରୁଥିବା ସମୟରେ ଜଣେ ଯାତ୍ରୀ ବିମାନ ମଧ୍ୟରେ ଏକ ହାତ ଲେଖା ଚିଠି ପାଇଥିଲେ, ଯେଉଁଥିରେ ବିମାନରେ ବୋମା ଥିବା ନେଇ ଦାବି କରାଯାଇଥିଲା। ଏହା ଦେଖିବା ପରେ ତୁରନ୍ତ ପାଇଲଟଙ୍କୁ ଜଣାଯାଇଥିଲା ଏବଂ ପାଇଲଟ ଏୟାର ଟ୍ରାଫିକ କଣ୍ଟ୍ରୋଲ (ATC) ସହ ଯୋଗାଯୋଗ କରି ବିମାନକୁ ଅହମଦାବାଦ ଆଡ଼କୁ ବୁଲାଇ ଦେଇଥିଲେ।

ବିମାନବନ୍ଦରରେ ସୁରକ୍ଷାକର୍ମୀ ଏବଂ ବୋମା ନିଷ୍କ୍ରିୟକାରୀ ଦଳ ପହଞ୍ଚି ବିମାନଟିକୁ ପୁଙ୍ଖାନୁପୁଙ୍ଖ ଯାଞ୍ଚ କରିଛନ୍ତି। ଅଧିକାରୀଙ୍କ ସୂଚନା ଅନୁଯାୟୀ, ବର୍ତ୍ତମାନ ସୁଦ୍ଧା କୌଣସି ସନ୍ଦିଗ୍ଧ ବସ୍ତୁ ମିଳିନାହିଁ। ସୁରକ୍ଷା କ୍ଲିୟରାନ୍ସ ମିଳିବା ପରେ ବିମାନଟି ପୁଣି ଦିଲ୍ଲୀ ଅଭିମୁଖେ ଯାତ୍ରା ଆରମ୍ଭ କରିବ ବୋଲି ଆଶା କରାଯାଉଛି।