ଦେଶର ରାଜଧାନୀ ଦିଲ୍ଲୀର ପାଲମ ଅଞ୍ଚଳରେ ଏକ ଅଭାବନୀୟ ତଥା ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ବୁଧବାର ଅର୍ଥାତ୍ ମାର୍ଚ୍ଚ ୧୮, ୨୦୨୬ ସକାଳେ ଏକ ବହୁତଳ ଆବାସିକ କୋଠାରେ ଭୟାବହ ଅଗ୍ନିକାଣ୍ଡ ଘଟି ଗୋଟିଏ ପରିବାରର ୭ ଜଣଙ୍କର ଜୀବନ୍ତ ଦଗ୍ଧ ହୋଇ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୩ ଜଣ ନୀରିହ ଶିଶୁ ମଧ୍ୟ ସାମିଲ ଅଛନ୍ତି। ନିଆଁ ଏତେ ଭୟଙ୍କର ଥିଲା ଯେ ଘର ଭିତରେ ଥିବା ଲୋକଙ୍କୁ ବାହାରକୁ ବାହାରିବା ପାଇଁ ସୁଯୋଗ ମଧ୍ୟ ମିଳିପାରି ନଥିଲା।

ଘଟଣାର ବିବରଣୀ ଏବଂ ଉଦ୍ଧାର କାର୍ଯ୍ୟ

ମିଳିଥିବା ସୂଚନା ଅନୁଯାୟୀ, ଦିଲ୍ଲୀର ଲାଇନ୍ ନମ୍ବର ୨, ପାଲମ ମେଟ୍ରୋ ଷ୍ଟେସନ ନିକଟରେ ଥିବା ଏକ ୫ ମହଲା ବିଶିଷ୍ଟ କୋଠାରେ ସକାଳ ପ୍ରାୟ ୭ଟା ବେଳେ ଏହି ନିଆଁ ଲାଗିଥିଲା। ଏହି ବିଲ୍ଡିଂର ବେସମେଣ୍ଟ, ଗ୍ରାଉଣ୍ଡ ଫ୍ଲୋର ଏବଂ ପ୍ରଥମ ମହଲାରେ କପଡା ଏବଂ କସମେଟିକ୍ସ (ପ୍ରସାଧନ ସାମଗ୍ରୀ) ଗଚ୍ଛିତ ରଖାଯାଇଥିବା ବେଳେ, ଦ୍ୱିତୀୟ ଏବଂ ତୃତୀୟ ମହଲାରେ ଲୋକେ ବସବାସ କରୁଥିଲେ। ନିଆଁ ଲାଗିବା ଖବର ପାଇବା ମାତ୍ରେ ଘଟଣାସ୍ଥଳରେ ଦିଲ୍ଲୀ ଅଗ୍ନିଶମ ବିଭାଗ (DFS)ର ୩୦ଟି ଦମକଳ ଗାଡ଼ି ପହଞ୍ଚି ନିଆଁକୁ ଆୟତ୍ତ କରିବା ସହ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।

ପ୍ରାଣ ବିକଳରେ ତଳକୁ ଡେଇଁଲେ ଲୋକେ

କୋଠାଟି ସମ୍ପୂର୍ଣ୍ଣ ଭାବେ ଧୂଆଁ ଏବଂ ନିଆଁରେ ଆଚ୍ଛାଦିତ ହୋଇଯିବା କାରଣରୁ ଲୋକେ ଭୟଭୀତ ହୋଇପଡିଥିଲେ। ପ୍ରାଣ ବିକଳରେ ୨ ଜଣ ବ୍ୟକ୍ତି ଉପର ମହଲାରୁ ତଳକୁ ଡେଇଁ ପଡିଥିଲେ। ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ଏବଂ ସେଠାରେ ସେମାନଙ୍କର ଚିକିତ୍ସା ଚାଲିଛି। ସେପଟେ ଅଗ୍ନିଶମ କର୍ମଚାରୀମାନେ ଅକ୍ଳାନ୍ତ ପରିଶ୍ରମ କରି ଭିତରେ ଫସି ରହିଥିବା ୭ ଜଣଙ୍କୁ ଉଦ୍ଧାର କରି ହସ୍ପିଟାଲ ନେଇଥିଲେ ହେଁ, ସେଠାରେ ଡାକ୍ତର ସମସ୍ତଙ୍କୁ ମୃତ ଘୋଷଣା କରିଥିଲେ।

ଦିଲ୍ଲୀ ଏଲଜିଙ୍କ ଶୋକ ପ୍ରକାଶ

ଏହି ମର୍ମନ୍ତୁଦ ଦୁର୍ଘଟଣାକୁ ନେଇ ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର (ଏଲଜି) ତରନଜିତ ସିଂହ ସାନ୍ଧୁ ଗଭୀର ଶୋକ ପ୍ରକାଶ କରିଛନ୍ତି। ସେ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' (X) ରେ ନିଜର ପ୍ରତିକ୍ରିୟା ରଖି ଲେଖିଛନ୍ତି ଯେ, "ପାଲମ ମେଟ୍ରୋ ନିକଟରେ ଘଟିଥିବା ଏହି ଅଗ୍ନିକାଣ୍ଡ ଘଟଣାରେ ମୁଁ ଅତ୍ୟନ୍ତ ଦୁଃଖିତ। ପୀଡିତ ପରିବାର ପ୍ରତି ମୋର ଗଭୀର ସମବେଦନା ରହିଛି। ଉଦ୍ଧାର କାର୍ଯ୍ୟ ଉପରେ କଡ଼ା ନଜର ରଖାଯାଇଛି ଏବଂ ପ୍ରଶାସନ ତରଫରୁ ସମସ୍ତ ପ୍ରକାରର ଆବଶ୍ୟକୀୟ ସାହାଯ୍ୟ ଯୋଗାଇ ଦିଆଯାଉଛି।"