ବିହାରରେ ନିଆରା ପ୍ରେମ: ୬୦ ବର୍ଷର ବୃଦ୍ଧଙ୍କୁ ବିବାହ କଲେ ୨୨ ବର୍ଷର ଯୁବତୀ, ଭିଡିଓ ହେଲା ଭାଇରାଲ୍

ବିହାର: ପ୍ରେମର କୌଣସି ବୟସ ନଥାଏ, ଏହାକୁ ପ୍ରମାଣିତ କରିଛି ବିହାରର କଟିହାର ଜିଲ୍ଲାରେ ଘଟିଥିବା ଏକ ନିଆରା ବିବାହ ଘଟଣା। ଏଠାରେ ଜଣେ ୨୨ ବର୍ଷୀୟା ଯୁବତୀ ଜଣେ ୬୦ ବର୍ଷୀୟ ବୃଦ୍ଧଙ୍କୁ ପ୍ରେମ ବିବାହ କରିଛନ୍ତି। ଦୁହିଁଙ୍କ ମଧ୍ୟରେ ଥିବା ୩୮ ବର୍ଷର ବୟସ ବ୍ୟବଧାନ ସତ୍ତ୍ୱେ ଏହି ପ୍ରେମ ସମ୍ପର୍କ ବିବାହର ରୂପ ନେଇଛି ଏବଂ ବର୍ତ୍ତମାନ ଏହାର ଭିଡିଓ ସୋସିଆଲ୍ ମିଡିଆରେ ଖୁବ୍ ଭାଇରାଲ୍ ହେବାରେ ଲାଗିଛି।

ସୂଚନା ଅନୁଯାୟୀ, ଏହି ଘଟଣାଟି କଟିହାର ଜିଲ୍ଲା ମନିହାରୀ ବ୍ଲକ୍ ଅନ୍ତର୍ଗତ ବାଘମାରା ପଞ୍ଚାୟତର ଅଟେ। ଗତ ବୁଧବାର ଦିନ ଗାଁର କିଛି ଲୋକ ୬୦ ବର୍ଷୀୟ ସୁଗ୍ରୀମ ପାଶ୍ୱାନ ଏବଂ ପାଖ ବୋଲିୟା ପଞ୍ଚାୟତର ୨୨ ବର୍ଷୀୟା ଯୁବତୀଙ୍କୁ ଏକ ନିର୍ଜନ ସ୍ଥାନରେ ଏକାଠି ଦେଖିବାକୁ ପାଇଥିଲେ। ଏହାପରେ ଗ୍ରାମବାସୀ ଦୁହିଁଙ୍କୁ ପଞ୍ଚାୟତ ସାମ୍ନାକୁ ଆଣି ପଚରାଉଚରା କରିଥିଲେ। ଉଭୟେ ନିଜ ଇଚ୍ଛାରେ ଏକାଠି ରହିବାକୁ ଚାହୁଁଛନ୍ତି ବୋଲି ନିର୍ଭୟରେ ସ୍ୱୀକାର କରିବା ପରେ, ଗ୍ରାମବାସୀଙ୍କ ସମ୍ମତି କ୍ରମେ ସ୍ଥାନୀୟ ଏକ ମନ୍ଦିରରେ ପଣ୍ଡିତ ଡାକି ହିନ୍ଦୁ ରୀତିନୀତି ଅନୁଯାୟୀ ସେମାନଙ୍କର ବିବାହ ସମ୍ପନ୍ନ କରାଯାଇଥିଲା।

ପଚରାଉଚରା ବେଳେ ଯୁବତୀ ଜଣକ ପ୍ରକାଶ କରିଥିଲେ ଯେ, ସେ ଗତ ଦୁଇ ବର୍ଷ ଧରି ସୁଗ୍ରୀମ ପାଶ୍ୱାନଙ୍କୁ ଭଲ ପାଉଥିଲେ ଏବଂ ନିଜ ଇଚ୍ଛାରେ ଏହି ବିବାହ କରିଛନ୍ତି। ସେମାନଙ୍କ ପରିବାର ଲୋକଙ୍କର ମଧ୍ୟ ଏହି ବିବାହକୁ ନେଇ କୌଣସି ଆପତ୍ତି ନାହିଁ ବୋଲି ସେ କହିଥିଲେ। ସେହିପରି ସୁଗ୍ରୀମ ମଧ୍ୟ ନିଜ ପ୍ରେମର ଫଳ ପାଇଥିବାରୁ ଖୁସି ବ୍ୟକ୍ତ କରିଥିଲେ। ଉଭୟ ପରସ୍ପରକୁ ଭଲ ଭାବରେ ବୁଝନ୍ତି ଏବଂ ବିବାହ ପରେ ସେମାନଙ୍କର କୌଣସି ଚିନ୍ତା ନାହିଁ ବୋଲି ପ୍ରକାଶ କରିଛନ୍ତି।

ବିବାହ ସମୟରେ ଉପସ୍ଥିତ ଥିବା ଅନେକ ଲୋକ ଏହାର ଭିଡିଓ ଏବଂ ଫଟୋ ଉତ୍ତୋଳନ କରିଥିଲେ। ଭାଇରାଲ୍ ହେଉଥିବା ଭିଡିଓରେ ସୁଗ୍ରୀମ ଯୁବତୀଙ୍କ ମଥାରେ ସିନ୍ଦୂର ପିନ୍ଧାଉଥିବାର ଦେଖିବାକୁ ମିଳିଛି। ସୋସିଆଲ୍ ମିଡିଆରେ ଏହି ଅନୋଖା ବିବାହକୁ ନେଇ ବିଭିନ୍ନ ପ୍ରକାରର ପ୍ରତିକ୍ରିୟା ପ୍ରକାଶ ପାଉଛି। କିଛି ଲୋକ ଏହାକୁ 'ପ୍ରେମର କୌଣସି ବୟସ ନଥାଏ' ବୋଲି କହୁଥିବା ବେଳେ ଆଉ କିଛି ଲୋକ ଏହାକୁ ଏକ ଆଶ୍ଚର୍ଯ୍ୟଜନକ ନିଷ୍ପତ୍ତି ବୋଲି ଅଭିହିତ କରିଛନ୍ତି।