ଓମାନ ଉପକୂଳରେ ତୈଳ ଟ୍ୟାଙ୍କର ଉପରେ ଆକ୍ରମଣ; ଅଳ୍ପକେ ବର୍ତ୍ତିଲେ ୧୫ ଭାରତୀୟ

ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ତୀବ୍ର ସଂଘର୍ଷ ମଧ୍ୟରେ ରବିବାର ଦିନ ଓମାନ ଉପକୂଳରେ ଏକ ବଡ଼ ଧରଣର ଘଟଣା ସାମ୍ନାକୁ ଆସିଛି। 'ସ୍କାଏଲାଇଟ୍' (Skylight) ନାମକ ଏକ ତୈଳ ଟ୍ୟାଙ୍କର ଉପରେ ଆକ୍ରମଣ କରାଯାଇଛି, ଯେଉଁଥିରେ ୧୫ ଜଣ ଭାରତୀୟ ନାଗରିକ କ୍ରୁ ସଦସ୍ୟ ଭାବରେ କାର୍ଯ୍ୟରତ ଥିଲେ। ଏହି ଘଟଣା ପରେ ସମସ୍ତ କ୍ରୁ ସଦସ୍ୟଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।

୧୫ ଭାରତୀୟ ସୁରକ୍ଷିତ, ୪ ଆହତ

ଓମାନ ମେରିଟାଇମ୍ ସିକ୍ୟୁରିଟି ସେଣ୍ଟରର ସୂଚନା ଅନୁଯାୟୀ, ମୁସାନ୍ଦମ୍ ଗଭର୍ଣ୍ଣରେଟ୍‌ର ଖାସବ ବନ୍ଦରଠାରୁ ପ୍ରାୟ ୫ ନଟିକାଲ୍ ମାଇଲ୍ ଦୂରରେ ଏହି ଆକ୍ରମଣ ଘଟିଥିଲା। ଜାହାଜରେ ମୋଟ ୨୦ ଜଣ କ୍ରୁ ସଦସ୍ୟ ଥିଲେ, ସେମାନଙ୍କ ମଧ୍ୟରୁ ୧୫ ଜଣ ଭାରତୀୟ ଏବଂ ୫ ଜଣ ଇରାନୀ ନାଗରିକ। ସମସ୍ତଙ୍କୁ ଉଦ୍ଧାର କରାଯାଇଛି, ତେବେ ୪ ଜଣ ସଦସ୍ୟ ଆହତ ହୋଇଛନ୍ତି ଏବଂ ସେମାନଙ୍କୁ ଚିକିତ୍ସା ପାଇଁ ପଠାଯାଇଛି।

ହରମୁଜ ପ୍ରଣାଳୀରେ ବଢିଲା ବିପଦ

ପାଲାଉ ପତାକା ଲଗାଇଥିବା ଏହି ଟ୍ୟାଙ୍କରଟି ରଣନୀତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ହରମୁଜ ପ୍ରଣାଳୀ ଦେଇ ଗତି କରୁଥିବା ବେଳେ ଏହାକୁ ଟାର୍ଗେଟ କରାଯାଇଥିଲା। ଆମେରିକା ଏବଂ ଇସ୍ରାଏଲର ମିଳିତ ଆକ୍ରମଣ ପରେ ଇରାନ ପକ୍ଷରୁ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବାରୁ ଏହି ଜଳପଥରେ ବାଣିଜ୍ୟିକ ଜାହାଜଗୁଡ଼ିକ ପ୍ରତି ବିପଦ ବୃଦ୍ଧି ପାଇଛି। ଭାରତୀୟ କର୍ତ୍ତୃପକ୍ଷ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି।