ମନୋରଞ୍ଜନ
ଚୀନ୍ରେ ରାତାରାତି ନିଖୋଜ ହେଉଛନ୍ତି ଅରବପତି; ଇନ୍ଭେଷ୍ଟମେଣ୍ଟ ବ୍ୟାଙ୍କର ବାଓ ଫେନ୍ଙ୍କ ମିଳୁନି ପତ୍ତା
ନୂଆଦିଲ୍ଲୀ(ଏଜେନ୍ସି): ଶସ୍ତା ଦ୍ରବ୍ୟ ଏବଂ କରୋନା ଯୋଗୁଁ ସାରା ବିଶ୍ୱରେ ଚର୍ଚ୍ଚା ପାଲଟିଥିବା ଚୀନ୍ ବର୍ତ୍ତମାନ ଅନ୍ୟ ଏକ କାରଣ ପାଇଁ ଖବରର ମୁଖ୍ୟରେ ସ୍ଥାନ ପାଇଛି। ଚୀନ୍ରେ ଅରବପତିମାନେ କ୍ରମାଗତ ଭାବରେ ନିଖୋଜ ହୋଇଯାଉଛନ୍ତି। ସି ଜିନ୍ପିଙ୍ଗ ରାଷ୍ଟ୍ରପତି ହେବା ପରେ ଚାଇନାରେ ରାତାରାତି ଅରବପତିମାନେ ନିଖୋଜ ହେବା ଘଟଣା ସାଧାରଣ କଥା ହୋଇଯାଇଛି। ଚୀନ୍ ସରକାରଙ୍କୁ ସମାଲୋଚନା କରୁଥିବା ବ୍ୟକ୍ତିଙ୍କୁ ବହିଷ୍କାର କରାଯାଇଥାଏ କିମ୍ବା ଜେଲ୍କୁ ପଠାଇ ଦିଆଯାଇଥାଏ। ଏବେ ଶିଳ୍ପପତି, ବ୍ୟବସାୟୀ, ଅଭିନେତ୍ରୀ ଓ ସାମ୍ବାଦିକମାନେ ଚାଇନାରେ ଅଦୃଶ୍ୟ ହୋଇଥିବା ବ୍ୟକ୍ତିଙ୍କ ତାଲିକାରେ ରହିଛନ୍ତି। ୨୦୧୮ ମସିହାରେ ବ୍ୟବସାୟୀ ତଥା ଆଲିବାବାର ପ୍ରତିଷ୍ଠାତା ଜ୍ୟାକ୍ ମା’ଙ୍କ ପୂର୍ବରୁ ନିଖୋଜ ହୋଇଥିବା ବିଶିଷ୍ଟ ବ୍ୟକ୍ତିଙ୍କ ତାଲିକା ଦେଖିଲେ ଏହା ଜଣାପଡୁଛି। ଏକ ସମୟରେ ଆଲିବାବାର ପ୍ରତିଷ୍ଠାତା ଜ୍ୟାକ୍ ମା’ ହଠାତ୍ ନିଖୋଜ ହୋଇଯାଇଥିଲେ। ବର୍ତ୍ତମାନ ଅନ୍ୟ ଏକ ବଡ ନିବେଶକାରୀ ବ୍ୟାଙ୍କର(ଇନ୍ଭେଷ୍ଟମେଣ୍ଟ ବ୍ୟାଙ୍କର) ବାଓ ଫେନ୍ ନିଖୋଜ ହୋଇଯିବା ଚାରିଆଡେ ହଇଚଇ ସୃଷ୍ଟି କରିଛି।
ବାଓ ଫେନ୍ ହେଉଛି ଚାଇନାର ସବୁଠାରୁ ବଡ ନିବେଶକାରୀ ବ୍ୟାଙ୍କ। ୫୨ ବର୍ଷୀୟ ବାଓ ଫେନ୍ ହଠାତ୍ ସର୍ବସାଧାରଣରୁ ଅଦୃଶ୍ୟ ହୋଇଯାଇଛନ୍ତି। ତାଙ୍କ କମ୍ପାନୀ ରେନ୍ସା ଏହି ବିଷୟରେ ହଂକଂ ଷ୍ଟକ୍ ଏକ୍ସଚେଞ୍ଜକୁ ସୂଚନା ଦେଇଛି। କମ୍ପାନୀ ଅନୁଯାୟୀ, ଅନେକ ଚେଷ୍ଟା ପରେ ମଧ୍ୟ ବାଓ ଫେନ୍ ଙ୍କ ସହ ଯୋଗାଯୋଗ ହୋଇପାରିନାହିଁ। କମ୍ପାନୀ ଅନୁଯାୟୀ ବାଓ ଗତ କିଛି ଦିନ ହେବ ନିଖୋଜ ଥିଲେ। ଏହି ଖବର ଆସିବା ମାତ୍ରେ କମ୍ପାନୀର ସେୟାର ୫୦ ପ୍ରତିଶତ ହ୍ରାସ ପାଇଛି। ୨୦୨୧ର ଶେଷ ମାସରୁ ଚାଇନାରେ ଦୁର୍ନୀତି ନିବାରଣର ତଦନ୍ତ ଚାଲିଛି। ଏହି କାରଣରୁ ଚୀନ୍ର ୬୦ ଲକ୍ଷ କୋଟିର ଆର୍ଥିକ କ୍ଷେତ୍ରକୁ ବଡ଼ ଝଟ୍କା ଲାଗିଛି। ବାଓ ଏହି ସମୟରେ ଅଦୃଶ୍ୟ ହୋଇଯାଇଛନ୍ତି।
ଚାଇନାରେ କୋଟିପତିଙ୍କ ନିଖୋଜ ଘଟଣା ବଢ଼ିଚାଲିଛି। ଏମିତିକି ଯେଉଁ ଶିଳ୍ପପତି ବା ବ୍ୟବସାୟୀ ଯିଏ ଚୀନ୍ ସରକାରକୁ ସମାଲୋଚନା କରୁଛନ୍ତି ସେ ଅଦୃଶ୍ୟ ହୋଇଯାଉଛନ୍ତି। ଅତୀତର ଘଟଣାକୁ ଦେଖିଲେ ଜଣାପଡିବ ଯେ, ରେନ୍ ଜିକିଆଙ୍ଗ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କୁ ସମାଲୋଚନା କରିଥିଲେ। ଏହାର କିଛି ଦିନ ପରେ ହଠାତ୍ ରେନ୍ ଅଦୃଶ୍ୟ ହୋଇଗଲେ। ପରେ ତାଙ୍କୁ ୧୮ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା। ୨୦୧୫ରେ, ଫୋସୁନ୍ ଇଣ୍ଟରନ୍ୟାସନାଲ୍ ଗ୍ରୁପର ଅଧ୍ୟକ୍ଷ ଅରବପତି ଗୁଓ ଗୁଆଙ୍ଗଜାଙ୍ଗ୍ ମଧ୍ୟ ନିଖୋଜ ହୋଇଯାଇଥିଲେ। ତାଙ୍କୁ ଚାଇନାର ୱାରେନ୍ ବଫେ କୁହାଯାଏ। ଜ୍ୟାକ୍ ମା ମଧ୍ୟ ପୂର୍ବରୁ ଚୀନ୍ ସରକାର ବ୍ୟବସାୟରେ ବାଧା ସୃଷ୍ଟି କରୁଥିବା ବିଷୟରେ କହିଥିଲେ। ସେତେବେଳେ ଜ୍ୟାକ୍ ମା ଖୋଲାଖୋଲି ଭାବେ ଚୀନ୍ ସରକାରଙ୍କୁ ସମାଲୋଚନା କରିବା ପରେ ସେ ଅଦୃଶ୍ୟ ହୋଇଯାଇଥିଲେ। ଚୀନ୍ ସରକାର ବର୍ତ୍ତମାନ ଆପଣାଇଥିବା କଠୋର ଦୁର୍ନୀତି ନୀତିରେ ବ୍ୟବସାୟୀମାନେ ଭୟଭୀତ ଅଛନ୍ତି। ବାଓଙ୍କ କମ୍ପାନୀର ସଭାପତି କଙ୍ଗ ଲିନ୍ଙ୍କ ବିରୋଧରେ ମଧ୍ୟ ଦୁର୍ନୀତି ଅଭିଯୋଗ କରାଯାଇଥିଲା।
About The Author
