କୋଝିକୋଡ: ୨୦୨୪ ରେ ହେବାକୁ ଥିବା ନିର୍ବାଚନ ଫଳାଫଳକୁ ନେଇ ସାଙ୍ଘାତିକ ଭବିଷ୍ୟବାଣୀ କରିଛନ୍ତି କଂଗ୍ରେସର ବରିଷ୍ଠ ନେତା ଶଶୀ ଥରୁର । ୨୦୨୪ ନିର୍ବାଚନରେ ବିଜେପିର ବିଜୟ ଆଶା ଉପରେ ପ୍ରଶ୍ନ ଉଠାଇ ସେ କହିଛନ୍ତି କି ବହୁମତ ହାସଲ କରିପାରିବନି ଶାସକ ବିଜେପି । ଏହା ସହିତ ବିଜେପି ୫୦ରୁ ଅଧିକ ଆସନ ହରାଇବ । ୨୦୨୪ରେ ୨୦୧୯ର ପୁନରାବୃତ୍ତି ଦେଖିବାକୁ ମିଳିବନି ।

‘କେରଳ ସାହିତ୍ୟ ଉତ୍ସବ’ରେ ‘ଇଣ୍ଡିଆ ଆଟ୍‌ ୭୫: ଏ ୱାକ୍‌ ଥ୍ରୋ ଦି ଡେମୋକ୍ରାଟିକ୍‌ ଇନ୍‌ଷ୍ଟିଚ୍ୟୁସନ୍‌’ ଶୀର୍ଷକ ଅଧିବେଶନରେ ଉଦ୍‌ବୋଧନ ଦେବା ବେଳେ କଂଗ୍ରେସ ନେତା ଶଶୀ ଥରୁର କହିଛନ୍ତି ଯେ, ସେ ‘ବିଜେପି’ର ପ୍ରାଧାନ୍ୟକୁ ସ୍ୱୀକାର କରୁଛନ୍ତି ସତ, କିନ୍ତୁ ଏ କଥା ବି ସତ ଯେ, ଅନେକ ରାଜ୍ୟରେ ‘ବିଜେପି’ ହାରୁ ଥିବାରୁ ସାଧାରଣ ନିର୍ବାଚନରେ ହାରିଯିବା ଅସମ୍ଭବ ନୁହେଁ। ଶଶୀ ଥରୁର କହିଛନ୍ତି ଯେ, ୨୦୧୯ରେ ବିଜେପି ଉନ୍ନତ ପ୍ରଦର୍ଶନ କରିଥିଲା।ବିଜେପି ପାଖରେ ପଶ୍ଚିମବଙ୍ଗର ୧୮ ସିଟ୍ ସମେତ ହରିୟାଣା, ଗୁଜରାଟ ଏବଂ ରାଜସ୍ଥାନରେ ପ୍ରାୟ ସବୁ ସିଟ ଥିଲା । ତେବେ ୨୪ ନିର୍ବାଚନରେ ବିଜେପିକୁ ସେଭଳି ଫଳାଫଳ ମିଳିବା ଅସମ୍ଭବ। ଏପରିକି ଦଳ ବହୁମତ ହାସଲ କରିବା ସମ୍ଭାବନା ବି କମ୍ ବୋଲି ଥରୁର କହିଛନ୍ତି। ମହୋତ୍ସବରେ ଥରୁର କହିଛନ୍ତି, ପୂର୍ବଭଳି ବିଜେପିକୁ ଆଉ ଲୋକେ ପସନ୍ଦ କରୁନାହାଁନ୍ତି। ଦେଶବାସୀ ଜାଣି ସାରିଲେଣି ଦଳର ଆକାଂକ୍ଷା କଣ। ତେଣୁ ଦଳକୁ ସେଭଳି ସଫଳତା ମିଳିବା କ୍ଷୀଣ।

ଗତ ଲୋକସଭା ନିର୍ବାଚନରେ ପୁଲୱାମା ଆକ୍ରମଣ ପରେ ବାଲାକୋଟ ଏୟାରଷ୍ଟ୍ରାଇକକୁ ନେଇ ସରାକରଙ୍କ ସପକ୍ଷରେ ହାୱା ଦେଖିବାକୁ ମିଳିଥିଲା । କିନ୍ତୁ ୨୦୨୪ରେ ସେଭଳି କୌଣସି ହାୱା ବିଜେପି ସପକ୍ଷରେ ବହିବ ନାହିଁ । ତେଣୁ ଆଗାମୀ ନିର୍ବାଚନରେ ବିଜେପି ୫୦ ସିଟ୍ ହରାଇବା ଏକପ୍ରକାର ନିଶ୍ଚିତ ।