କେନ୍ଦ୍ରାପଡ଼ା : ଏକତରଫା ଭଲ ପାଇ ବିବାହ ପ୍ରସ୍ତାବ ଦେବାରୁ ଯୁବତୀ ଜଣକ ଅରାଜି ହୋଇଥିଲେ। ଫଳରେ ପ୍ରେମ କରୁଥିବା ଯୁବକ ଜଣକ ଯୁବତୀଙ୍କ ନଗ୍ନ ଫଟୋ ସୋସିଆଲ ମିଡିଆରେ ଭାଇରାଲ କରାଯାଇଥିବା ନେଇ ପାଟକୁରା ଥାନାରେ ଅଭିଯୋଗ ହୋଇଛି। ଅଭିଯୋଗ ମୁତାବକ, ପାଟକୁରା ଥାନା ଅଧୀନ କନ୍ତିଆ ଅଞ୍ଚଳର ଜଣେ ୨୧ ବର୍ଷୀୟ ଯୁବତୀଙ୍କ ସହ ଏଭଳି ଘଟଣା ଘଟିଛି। ଯୁବତୀଙ୍କ ଘର ନିକଟରେ ଭଡ଼ା ଘରେ ଏକ କୋରିଅର କାର୍ଯ୍ୟାଳୟ ଚାଲିଛି। ସେହି କାର୍ଯ୍ୟାଳୟରେ କୋରିଅର ବୟ ଭାବେ ଯାଜପୁର ଜିଲ୍ଲା ବଡ଼ଚଣା ଅଞ୍ଚଳର ମହେଶ୍ୱର ପାତ୍ର କାର୍ଯ୍ୟ କରନ୍ତି। ଯୁବତୀଙ୍କ ଘର ନିକଟରେ ହୋଇଥିବାରୁ ତାଙ୍କୁ ସବୁବେଳେ ମହେଶ୍ୱର ପିଛା କରନ୍ତି। ଏମିତିକି ଯୁବତୀଙ୍କ ଅଜାଣତରେ ବାଥରୁମ ସ୍କାଇଲାଇଟ କଣା ବାଟେ ମୋବାଇଲ ରଖି ଗାଧୋଇବା ବେଳର ଭିଡିଓ କରିଛନ୍ତି। ଏସବୁ ଘଟଣା ସମ୍ପର୍କରେ ଯୁବତୀ ଜଣଙ୍କ କିଛି ଜାଣିପାରି ନ ଥିଲେ। ପରେ ସମ୍ପୃକ୍ତ ଯୁବକ ଜଣଙ୍କ ଏକତରଫା ପ୍ରେମ ନେଇ ପ୍ରସ୍ତାବ ଦେଇଥିଲେ।

ମୋବାଇଲରେ ରଖିଥିବା ନଗ୍ନ ଭିଡିଓ ଓ ଫଟୋ ଦେଖାଇ ବିବାହ କରିବାକୁ କହିଥିଲେ। ଯଦି ତାଙ୍କ ସହ ଶାରୀରିକ ସମ୍ପର୍କ ନ ରଖନ୍ତି, ତେବେ ଏ ସମସ୍ତ ନଗ୍ନ ଭିଡିଓ ଓ ଫଟୋ ଭାଇରାଲ କରିବା ନେଇ ଧମକ ଦେଇଥିଲେ। ବାରମ୍ୱାର ଏଭଳି ଧମକ ଦେଇଥିଲେ ମଧ୍ୟ ଯୁବତୀ ଜଣଙ୍କ ତାଙ୍କର କୌଣସି ପ୍ରସ୍ତାବରେ ରାଜି ହୋଇ ନ ଥିଲେ। ଏହାର କିଛିଦିନ ପରେ ସଂସ୍ଥାର କାର୍ଯ୍ୟାଳୟ ବନ୍ଦ ହୋଇଯାଇଥିଲା। ଅଭିଯୁକ୍ତ ମହେଶ୍ୱର ନିଜ ଘର ଯାଜପୁରକୁ ପଳାଇଥିଲେ। ନିଜ ଘରେ ରହି ସମ୍ପୃକ୍ତ ଅଭିଯୁକ୍ତ ପୁଣିଥରେ ଯୁବତୀଙ୍କ ଘର ନମ୍ୱରରେ କଲ ଓ ମେସେଜ କରିଥିଲା। ଯୁବତୀ ଜଣକ କୌଣସି ଉତ୍ତର ନ ଦେବାରୁ ଶେଷରେ ତାଙ୍କ ନାଁରେ ଫେସବୁକରେ ଏକ ଫେକ ଆଇଡି ଖୋଲି ସମସ୍ତ ନଗ୍ନ ଭିଡିଓ ଓ ଫଟୋ ଭାଇରାଲ କରିଛି। ଏହାପରେ ଯୁବତୀ ଜଣକ ମାନସିକ ଭାରସାମ୍ୟ ହରାଇ ବସିଛନ୍ତି। ନ୍ୟାୟ ନ ମିଳିଲେ ଜୀବନରୁ ମରିଯିବାକୁ କହିଛନ୍ତି। ତାଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ ପାଟକୁରା ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ପୁଲିସ ଏକ ମାମଲା ୨୭୯/୨୨ରେ ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।