ବ୍ରହ୍ମପୁର: ସଚେତନ ଥିଲେ ସବୁ ପ୍ରକାର ସମସ୍ୟାରୁ ବର୍ତ୍ତିପାରିବେ ସାଧାରଣ ଲୋକ । ସମ୍ପ୍ରତି ସାଇବର ଠକମାନେ ବିଭିନ୍ନ ଲୋକଙ୍କୁ ଟାର୍ଗେଟ କରି ସେମାନଙ୍କ ବ୍ୟାଙ୍କ ଆକାଉଣ୍ଟକୁ ମାତ୍ର କିଛି ସେକେଣ୍ଡ ମଧ୍ୟରେ ଖାଲି କରିଦେଉଛନ୍ତି । ଏପରି ପରିସ୍ଥିତିରେ ବ୍ରହ୍ମପୁର ସହରର ଜଣେ ମହିଳା ବାରମ୍ବାର ଗଣମାଧ୍ୟରେ ପ୍ରସାରିତ ହେଉଥିବା ଘଟଣାଗୁଡିକ ସମ୍ପର୍କରେ ସଚେତନ ଥିବା ଯୋଗୁଁ ସାଇବର ଠକଙ୍କ କବଳରୁ ବର୍ତ୍ତି ପାରିଛନ୍ତି । ସେ ହେଉଛନ୍ତି ବ୍ରହ୍ମପୁର ବିମା ନଗର ଅଞ୍ଚଳର କଳ୍ପନା ସେନାପତି । କଳ୍ପନା ତାଙ୍କ ଭୁବନେଶ୍ୱରରେ ଥିବା ଘରକୁ ଭଡା ସୂତ୍ରରେ ଦେବା ପାଇଁ ଓଏଲଏକ୍ସ୍‌ରେ ବିଜ୍ଞାପନ ଦେଇଥିଲେ ।

ବିଜ୍ଞାପନ ଦେବା ମାତ୍ରେ କଳ୍ପନାଙ୍କ ମୋବାଇଲ୍‌ ନମ୍ବରକୁ ଘର ଭଡା ପାଇଁ କଲ୍‌ ଆସିଥିଲା । ସେଥିରେ ଜଣେ ବ୍ୟକ୍ତି ନିକକୁ ସେନା ଅଧିକାରୀ ବୋଲି ପରିଚୟ ଦେବା ସହ ତାଙ୍କର ଲକ୍ଷ୍ନୌରୁ ଭୁବନେଶ୍ୱର ବଦଳି ହୋଇଯାଇଥିବାରୁ ଭଡ଼ା ଘରର ଆବଶ୍ୟକତା ଥିବା କଳ୍ପନାଙ୍କୁ ମୋବାଇଲ୍‌ ଯୋଗେ କହିଥିଲେ । ତାଙ୍କ ନାମ ପଙ୍କଜ ଶର୍ମା ବୋଲି ପରିଚୟ ଦେଇ ତାଙ୍କ ଘରର ଫଟୋ ମାଗିଥିଲେ ଓ କଳ୍ପନା ହ୍ବାଟସଆପରେ ପଙ୍କଜଙ୍କୁ ଘର ବାହାରର ଫୋଟ ମଧ୍ୟ ପଠାଇଥିଲେ। ପଙ୍କଜ ଘର ପସନ୍ଦ ଥିବା କହି ତାଙ୍କର ସେନା ପୋଷାକ ପିନ୍ଧିଥିବା ଫୋଟ ଏବଂ ସେନାର ପରିଚୟ ପତ୍ର ଆଦି ମହିଳାଙ୍କୁ ହ୍ବାଟସଆପ ମାଧ୍ୟମରେ ପଠାଇଥିଲେ । ଏହାଦେଖି କଳ୍ପନା ତାଙ୍କୁ ବିଶ୍ୱାସ କରିବା ସହ ଏକ ଚୁକ୍ତିନାମା କରିବା ପାଇଁ ପଙ୍କଜଙ୍କୁ କହିଥିଲେ । ଘର ଭଡା ବାବଦକୁ ମାସିକ ୭ ହଜାର ଟଙ୍କା ଥିବା ବେଳେ ମହିଳା ଜଣକ ୩ ମାସର ଅଗ୍ରୀମ ଟଙ୍କା ପଙ୍କଜଙ୍କୁ ମାଗିଥିଲେ । ତୁରନ୍ତ ସେନା ଅଧକାରୀ ଜଣକ ମହିଳାଙ୍କୁ ଗୁଗୁଲ୍‌ ପେ କିମ୍ବା ଫୋନ୍‌ ପେ’ରେ ପଠାଇଦେବୁ ଆଗ୍ରହ ପ୍ରକାଶ କରିଥିଲେ ।

କଳ୍ପନା ଗୁଗୁଲ୍‌ ପେ ପାଇଁ ରାଜି ନ ହେବାରୁ ପଙ୍କଜ ନାମକ ଏହି ସାଇବର ଠକ ଜଣକ ଅନ୍‌ ଲାଇନ୍‌ ବ୍ୟାଙ୍କିଂ କଥା ପଚାରିଥିଲେ । ସାଇବର ଠକେଇ ସମ୍ପର୍କରେ ସଚେତନ ଥିବା କଳ୍ପନା ତୁରନ୍ତ ତାଙ୍କ ଆକାଉଣ୍ଟରୁ ସମସ୍ତ ଟଙ୍କା ବାହାର କରିବା ପରେ ଆକାଉଣ୍ଟ ନମ୍ବର ପଙ୍କଜଙ୍କୁ ଦେଇଥିଲେ । କିଛି ସମୟ ପରେ ସେନାର ଜଣେ ଅଧକାରୀ ବୋଲି ପରିଚୟ ଦେଇ ଅନ୍ୟ ଜଣେ କଳ୍ପନାଙ୍କ ସହ କଥା ହେଲେ ଓ ତାଙ୍କୁ ଅନ୍‌ଲାଇନ୍‌ରେ ରଖି ଆମେ ଯେପରି କହୁଛୁ ସେପରି କରନ୍ତୁ ବୋଲି କହିଥିଲେ । କଳ୍ପନା ତାଙ୍କ ଆକାଉଣ୍ଟରୁ ସମସ୍ତ ଟଙ୍କା ବାହାର କରିଦେଇଥିବା ଯୋଗୁଁ ବିନା ଭୟରେ ସେହିପରି କଲେ । ଏହି ସମୟରେ ଏକ ଓଟିପି ମହିଳାଙ୍କ ମୋବାଇଲ୍‌କୁ ଆସିଥିଲା । ଏଥିରେ ସେ ସାଇବର ଠକଙ୍କ ଅସଲି ରୂପ ଜାଣିପାରି ସାଇବର ଥାନାକୁ ଖବର ଦେବେ ବୋଲି କହି ଫୋନ୍‌ କାଟି ଦେଇଥିଲେ । ମହିଳାଙ୍କ ଉପସ୍ଥିତ ବୁଦ୍ଧି ଓ ସଚେତନତା ଯୋଗୁଁ ସାଇବର ଠକଙ୍କ ଚାଲବାଜି କାମ କରିନଥିଲା ।