ଭୁବନେଶ୍ବର/ରାଜନଗର : ବିଶ୍ୱ ତାପନ ଜଳବାୟୁ ପରିବର୍ତନ ସତ୍ୱେ ପ୍ରକୃତିର ଅନବଦ୍ୟ ସୃଷ୍ଟି ଲୁଣା ଜଙ୍ଗଲ ଅବକ୍ଷୟର ଦ୍ୱାର ଦେଶରେ ପହଁଚିଛି । ଭାରତ ସରକାରଙ୍କ ଅଧିନରେ ଥିବା ଜଙ୍ଗଲ, ପରିବେଶ ଓ ଜଳବାୟୂ ପରିବର୍ତନ ମନ୍ତ୍ରଣାଳୟ ପକ୍ଷରୁ ସଦ୍ୟ ପ୍ରକାଶିତ ଲୁଣା ଜଙ୍ଗଲ ସର୍ଭେ ରିପୋର୍ଟରେ ଭିତରକନିକାରେ ଥିବା ଲୁଣାଜଙ୍ଗଲ ବୃଦ୍ଧି ପାଇବା ସହିତ ସମଗ୍ର ଦେଶରେ ପ୍ରଥମ ସ୍ଥାନ ଅଧିକାର କରିଛି, ଯାହା ପ୍ରକୃତିପ୍ରେମୀ, ପରିବେଶବିତଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି । କାହିଁ କେଉଁ ଅନାଦି କାଳରୁ ବଂଗୋପସାଗର ତଟରେ ଗଢି ଉଠିଥିବା ଭିତରକନିକାର ଲୁଣାଜଙ୍ଗଲ କ୍ରମାଗତ ଭାବେ ସାମୁଦ୍ରିକ ଝଡ ଓ ପ୍ରାକୃତିକ ବିପର୍ଯ୍ୟୟର ମୁକାବିଲା କରିଆସୁଛି । ପ୍ରତିକୂଳ ପରିବେଶ ସତ୍ୱେ ଲୁଣା ଜଙ୍ଗଲ ବୃଦ୍ଧି ଘଟି ଚାଲିଛି ।

ସଦ୍ୟ ରିପୋର୍ଟ ଅନୁଯାୟୀ ସମଗ୍ର ଦେଶରେ ୧୭ ସ୍କୋୟାର କିମି ଲୁଣା ଜଙ୍ଗଲ ବୃଦ୍ଧି ପାଇଥିବା ବେଳେ ସେଥିମଧ୍ୟରୁ ୮ ସ୍କୋୟାର କିମି କେବଳ ଭିତରକନିକା ଜାତୀୟ ଉଦ୍ୟାନରେ ଲୁଣା ଜଙ୍ଗଲ ବୃଦ୍ଧି ପାଇଛି । ସମଗ୍ର ଦେଶରେ ଭିତରକନିକା ଲୁଣା ଜଙ୍ଗଲ ଅଭିବୃଦ୍ଧି କ୍ଷେତ୍ରରେ ଶୀର୍ଷ ସ୍ଥାନ ଅଧିକାର କରିଛି । ଫରେଷ୍ଟ ସର୍ଭେ ଅଫ୍ ଇଣ୍ଡିଆ ୨୦୨୧ ରିପୋର୍ଟ ଅନୁଯାୟୀ ଆନ୍ଧ୍ରପ୍ରଦେଶରେ ୨୦୧୯ ସର୍ଭେ ତୁଳନାରେ ୧ ବର୍ଗ କିମି, ଗୋଆରେ ୧ ବର୍ଗ କିମି, କର୍ଣ୍ଣାଟକରେ ୩ ବର୍ଗ କିମି, ମହାରାଷ୍ଟ୍ରରେ ୪ ବର୍ଗ କିମି, ପଶ୍ଚିମବଙ୍ଗରେ ୨ ବର୍ଗ କିମି ଓ ଓଡିଶାରେ ୮ ବର୍ଗ କିମି ଲୁଣା ଜଙ୍ଗଲ ବୃଦ୍ଧି ପାଇଛି । ଏହାବାଦ୍‌ ଗୁଜୁରାଟରେ ୨ ବର୍ଗ କିମି ଲୁଣା ଜଙ୍ଗଲ ହ୍ରାସ ପାଇଥିବା ବେଳେ କେରଳ, ତାମିଲନାଡୁ, ଆଣ୍ଡାମାନ ନିକୋବର, ଡାମନଡିଉ ଓ ପଣ୍ଡୁଚେରିରେ ଲୁଣା ଜଙ୍ଗଲ ସ୍ଥିତି ଯାହା ଥିଲା ସମାନ ରହିଛି । ରିପୋର୍ଟ ଅନୁଯାୟୀ ଓଡିଶାର ବାଲେଶ୍ୱର ଜିଲ୍ଲାରେ ୦.୩୩ ବର୍ଗ କିମି, ଜଗତସିଂହପୁର ଜିଲ୍ଲାରେ ୦.୨୭ ବର୍ଗ କିମି ଲୁଣା ଜଙ୍ଗଲ ବୃଦ୍ଧି ପାଇଥିବା ବେଳେ କେନ୍ଦ୍ରାପଡା ଅର୍ଥାତ୍ ଭିତରକନିକାରେ ୭.୭୬ ବର୍ଗ କିମି ଲୁଣା ଜଙ୍ଗଲ ବୃଦ୍ଧି ପାଇଛି । ପୁରୀରେ ୦.୦୨ ପ୍ରତିଶତ ଲୁଣା ଜଙ୍ଗଲ ହ୍ରାସ ପାଇଥିବା ବେଳେ ଭଦ୍ରକରେ ସ୍ଥିତି ସମାନ ରହିଛି ।

ଅନ୍ୟପଟେ ଓଡ଼ିଶାରେ ଦୁଇ ଦଶନ୍ଧି ଭିତରେ ୩ହଜାର ୩୧୪ ବର୍ଗ କିଲୋମିଟର ଜଙ୍ଗଲ ସୃଷ୍ଟି ହୋଇଛି। ଆନ୍ଧ୍ରରେ ସବୁଠୁ ଅଧିକ ୬୪୭ ବର୍ଗ କିଲୋମିଟର ଜଙ୍ଗଲ ସୃଷ୍ଟି ହୋଇଥିବା ବେଳେ ଏହା ପ୍ରଥମ ସ୍ଥାନରେ ରହିଛି । ସେହିପରି ତେଲେଙ୍ଗାନାରେ ୬୩୨ ବର୍ଗ କିଲୋମିଟର ଜଙ୍ଗଲ ସୃଷ୍ଟି କରାଯାଇଥିବା ରିପୋର୍ଟରେ ଉଲ୍ଲେଖ ରହିଛି । ତେଲେଙ୍ଗାନା ଦ୍ୱିତୀୟ ସ୍ଥାନରେ ରହିଛି । ସେହିପରି ୫୩୭ ବର୍ଗ କିଲୋମିଟର ଜଙ୍ଗଲ ସୃଷ୍ଟି ସହ ଓଡ଼ିଶା ତୃତୀୟ ସ୍ଥାନରେ ରହିଛି ।

ଓଡ଼ିଶାର ଭୌଗୋଳିକ ଅଞ୍ଚଳର ୩୩.୫୦ ପ୍ରତିଶତ ହେଲା ଜଙ୍ଗଲ । ମୋଟ୍‌ ୫୨ହଜାର ୧୫୬ ବର୍ଗ କିଲୋମିଟର ଏରିଆରେ ବ୍ୟାପିଛି । ଏଥିରୁ ୭ହଜାର ୨୧୨ ବର୍ଗ କିଲୋମିଟର ଅତି ଘଞ୍ଚ ଜଙ୍ଗଲ । ଯାହାକି ରାଜ୍ୟର ମୋଟ୍‌ ଜଙ୍ଗଲର ୪.୬୩ ପ୍ରତିଶତ । ସେହିପରି ୨୦ହଜାର ୯୯୫ ବର୍ଗ କିଲୋମିଟର ଅଞ୍ଚଳରେ ରହିଛି ମଧ୍ୟମ ଧରଣର ଘଞ୍ଚ ଜଙ୍ଗଲ । ଯାହାକି ରାଜ୍ୟର ମୋଟ୍‌ ଜଙ୍ଗଲର ୧୩.୫୦ ପ୍ରତିଶତ ।ଖୋଲା ଜଙ୍ଗଲ ୨୩ହଜାର ୯୪୮ ବର୍ଗ କିଲୋମିଟର ଯାଏ ପରିବ୍ୟାପ୍ତ । ଯାହାକି ମୋଟ୍‌ ଜଙ୍ଗଲର ୧୫.୩୮ ପ୍ରତିଶତ ।

ରାଜ୍ୟରେ କନ୍ଧମାଳ ଜିଲ୍ଲାରେ ଅଧିକ ପ୍ରତିଶତ ଅଞ୍ଚଳରେ ଜଙ୍ଗଲ ରହିଛି । ଜିଲ୍ଲାରେ ୬୭.୩୭ ପ୍ରତିଶତ ଭାବରେ ରହିଛି ଜଙ୍ଗଲ । କନ୍ଧମାଳ ଜିଲ୍ଲାର ମୋଟ୍‌ କ୍ଷେତ୍ରଫଳ ହେଇଛି ୮ହଜାର ୨୧ ବର୍ଗ କିଲୋମିଟର । ତା ଭିତରୁ ୫ହଜାର ୪୦୪ ବର୍ଗକିଲୋମିଟର ଅଞ୍ଚଳରେ ଜଙ୍ଗଲେ ରହିଛି ।ସେହିପରି ଗଜପତି ଜିଲ୍ଲାରେ ମୋଟ୍‌ ଆୟତନର ୬୦.୬୫ ପ୍ରତିଶତ ଅଞ୍ଚଳରେ ରହିଛି ଜଙ୍ଗଲ । ମାଲକାନଗିରିରେ ୪୦.୧୪, ନୟାଗଡ଼ରେ ୪୪.୦୮, ଦେବଗଡ଼ରେ ୫୦.୨୪, ଅନୁଗୋଳରେ ୪୩.୬୬ ଓ ବୌଦ୍ଧରେ ୪୧.୭୪ ପ୍ରତିଶତ ଅଞ୍ଚଳରେ ଜଙ୍ଗଲ ରହିଛି ।