ଭୁବନେଶ୍ୱର : ଅନ୍‌ଲାଇନ୍‌ରେ ଘରର ଆସବାବପତ୍ର ବିକ୍ରି କରିବା ଜଣେ ଯୁବକଙ୍କ ପାଇଁ ମହଙ୍ଗା ପଡ଼ିଛି । ତାଙ୍କ ଆକାଉଣ୍ଟରୁ ସାଇବର୍‌ ଠକ ଏକ ଲକ୍ଷ ଟଙ୍କା ଲୁଟି ନେଇଛନ୍ତି। ଠକେଇର ଶିକାର ହୋଇଥିବା ବିନୋଦ ବେହେରା ନାମକ ଯୁବକ ଏନେଇ ସାଇବର୍‌ ହେଲ୍ମଡେସ୍କରେ ଅଭିଯୋଗ କରିଛନ୍ତି । ଅଭିଯୋଗ ଅନୁସାରେ, ବିନୋଦ କ୍ୟାପିଟାଲ ଥାନା ୟୁନିଟ୍ ୬ ଅଞ୍ଚଳରେ ରହୁଛନ୍ତି । ସେ ତାଙ୍କ ଘରର ଡାଇନିଂ ଟେବୁଲ ଏବଂ ଅନ୍ୟାନ ଆସବାବପତ୍ର ବିକ୍ରି କରିବା ପାଇଁ ଏକ ଅନ୍‌ଲାଇନ୍ ସାଇଟ୍‌ରେ ବିଜ୍ଞାପନ ଦେଇଥିଲେ। ବିନୋଦ ଏହାକୁ ୨୮ ହଜାର ଟଙ୍କାରେ ବିକ୍ରି କରିବେ ବୋଲି କହିଥିଲେ ।

ଜଣେ ବ୍ୟକ୍ତି ଆସବାବପତ୍ର କିଣି ନେବ ବୋଲି ରାଜି ହୋଇଥିଲେ । କିନ୍ତୁ ଟଙ୍କା କେବଳ ଅନ୍‌ଲାଇନ୍‌ରେ ପଠାଇବ ବୋଲି ସର୍ତ୍ତ ରଖୁଥିଲେ । ଟଙ୍କା ପଠାଇବା ପରେ ତାଙ୍କର ଜଣେ ବ୍ୟକ୍ତି ତୁମ ଠିକଣାରେ ପହଞ୍ଚି ଘରର ଆସବାବପତ୍ର ଗାଡ଼ିରେ ଲଦି ଆଣିବେ ବୋଲି କହିଥିଲେ । ତେଣୁ ସେ ବିନୋଦଙ୍କ ମୋବାଇଲ୍‌କୁ ଏକ ଲିଙ୍କ୍ ପଠାଇଥିଲେ। ଏହି ଲିଙ୍କରେ କ୍ଲିକ୍ କରି ୧୦ ଟଙ୍କା ପଠାଇବାକୁ ଠକ କହିଥିଲେ। ଠକ ପଠାଇଥିବା ଲିଙ୍କରେ ବିନୋଦ କ୍ଲିକ୍ କରି ୧୦ ଟଙ୍କା ପଠାଇବା ପରେ ତାଙ୍କ ଆକାଉଣ୍ଟରୁ ୭ ଟି ପର୍ଯ୍ୟାୟରେ ଏକ ଲକ୍ଷ ଟଙ୍କା କଟି ଯାଇଥିଲା। ସେ ଏନେଇ ସାଇବର ହେଲ୍ସଡେସ୍କରେ ଅଭିଯୋଗ କରି ଜଣାଇଥିଲେ ।