ଦକ୍ଷିଣ ଭାରତୀୟ ସିନେମାର ଜଣାଶୁଣା ନିର୍ଦ୍ଦେଶିକା ସୁଧା କୋଙ୍ଗାରା ନିଜର ପ୍ରାପ୍ୟ ଦାବି କରି ମାଡ୍ରାସ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଚଳିତ ବର୍ଷ ଜାନୁଆରୀ ମାସରେ ମୁକ୍ତିଲାଭ କରିଥିବା ତାମିଲ ଚଳଚ୍ଚିତ୍ର 'ପରାଶକ୍ତି'ର ନିର୍ଦ୍ଦେଶନା ବାବଦକୁ ବକେୟା ଥିବା ପ୍ରାୟ ୮.୩୯ କୋଟି ଟଙ୍କା ନମିଳିବା କାରଣରୁ ସେ ପ୍ରଯୋଜନା ସଂସ୍ଥା ଡନ୍ ପିକ୍ଚର୍ସ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ଅଭିନୟ କରିଥିଲେ ଲୋକପ୍ରିୟ ଅଭିନେତା ଶିବକାର୍ତ୍ତିକେୟନ।

ନିର୍ଦ୍ଦେଶିକାଙ୍କ ଆବେଦନ ଅନୁଯାୟୀ, ଉଭୟ ପକ୍ଷଙ୍କ ମଧ୍ୟରେ ହୋଇଥିବା ଚୁକ୍ତି ମୁତାବକ ତାଙ୍କୁ ସମୁଦାୟ ୧୫ କୋଟି ଟଙ୍କା ପ୍ରାପ୍ୟ ମିଳିବା କଥା। ଜିଏସଟି (GST) ମିଶାଇ ଏହି ଅର୍ଥରାଶି ୧୭.୭୦ କୋଟି ଟଙ୍କା ହେଉଥିବା ବେଳେ ତାଙ୍କୁ କେବଳ ୯.୩୧ କୋଟି ଟଙ୍କା ପ୍ରଦାନ କରାଯାଇଛି। ଅବଶିଷ୍ଟ ୮.୩୯ କୋଟି ଟଙ୍କା ଦେବାରେ ପ୍ରଯୋଜନା ସଂସ୍ଥା ଅବହେଳା କରିଥିବାରୁ ସେ ଆର୍ବିଟ୍ରେସନ ଏବଂ କନସିଲିଏସନ ଆକ୍ଟର ଧାରା ୯ ଅନୁଯାୟୀ କୋର୍ଟଙ୍କ ଶରଣାପନ୍ନ ହୋଇଛନ୍ତି।

କୋର୍ଟଙ୍କ ହସ୍ତକ୍ଷେପ ଏବଂ 'ପରାଶକ୍ତି'ର ସାଟେଲାଇଟ୍ ରିଲିଜ୍ ଉପରେ ରୋକ୍

ଏହି ମାମଲାର ଶୁଣାଣି କରି ମାଡ୍ରାସ ହାଇକୋର୍ଟର ବିଚାରପତି ଜଷ୍ଟିସ୍ କେ. କୁମରେଶ ବାବୁ ଆସନ୍ତା ଜୁଲାଇ ୮ ତାରିଖ ପର୍ଯ୍ୟନ୍ତ 'ପରାଶକ୍ତି' ଚଳଚ୍ଚିତ୍ରର ସାଟେଲାଇଟ୍ ରିଲିଜ୍ ଉପରେ ରୋକ୍ ଲଗାଇଛନ୍ତି। ସୁଧା କୋଙ୍ଗାରାଙ୍କ ଓକିଲ ଯୁକ୍ତି ବାଢ଼ିଥିଲେ ଯେ, ନିର୍ଦ୍ଦେଶିକା ସିନେମାର ସମସ୍ତ ବୌଦ୍ଧିକ ସମ୍ପତ୍ତି ଅଧିକାର ପ୍ରଯୋଜକଙ୍କୁ ହସ୍ତାନ୍ତର କରିଦେଇଥିଲେ ମଧ୍ୟ ଚଳଚ୍ଚିତ୍ର ମୁକ୍ତିଲାଭ କରିବା ପରେ ବି ତାଙ୍କୁ ତାଙ୍କର ସମ୍ପୂର୍ଣ୍ଣ ପ୍ରାପ୍ୟ ଦିଆଯାଇନାହିଁ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ ସୁଧା କୋଙ୍ଗାରାଙ୍କ ଏହି ଆବେଦନ କେବଳ 'ପରାଶକ୍ତି' ମଧ୍ୟରେ ସୀମିତ ନାହିଁ। ସେ ଡନ୍ ପିକ୍ଚର୍ସ ଦ୍ୱାରା ପ୍ରଯୋଜିତ ଆଉ ଏକ ଆଗାମୀ ଚଳଚ୍ଚିତ୍ର 'ଇଦୟମ୍ ମୁରଲୀ'ର ରିଲିଜ୍ ଉପରେ ରହିତାଦେଶ ଲଗାଇବାକୁ ମଧ୍ୟ କୋର୍ଟଙ୍କୁ ନିବେଦନ କରିଛନ୍ତି। 'ଇଦୟମ୍ ମୁରଲୀ' ଆସନ୍ତା ଜୁଲାଇ ୧୦ ତାରିଖରେ ପ୍ରେକ୍ଷାଳୟରେ ମୁକ୍ତିଲାଭ କରିବାର କାର୍ଯ୍ୟକ୍ରମ ରହିଛି। ଅର୍ଥ ଅଭାବର ଆଳ ଦେଖାଇ ତାଙ୍କ ବକେୟା ନମେଣ୍ଟାଉଥିବା ପ୍ରଯୋଜକ ନୂଆ ଚଳଚ୍ଚିତ୍ର କିପରି ରିଲିଜ୍ କରୁଛନ୍ତି, ତାହାକୁ ନେଇ କୋଙ୍ଗାରାଙ୍କ ଓକିଲ ପ୍ରଶ୍ନ ଉଠାଇଛନ୍ତି।

ବକ୍ସ ଅଫିସରେ ହିଟ୍ ସତ୍ତ୍ୱେ ବକେୟା ନମିଳିବା ବିଡ଼ମ୍ବନା

ସୁଧା କୋଙ୍ଗାରାଙ୍କ ନିର୍ଦ୍ଦେଶିତ ଏହି ତାମିଲ ପଲିଟିକାଲ୍ ଆକ୍ସନ୍-ଡ୍ରାମା 'ପରାଶକ୍ତି'ରେ ଶିବକାର୍ତ୍ତିକେୟନ, ଶ୍ରୀଲୀଲା, ରବି ମୋହନ ଏବଂ ଅଥର୍ବାଙ୍କ ଭଳି ତାରକାମାନେ ଅଭିନୟ କରିଥିଲେ। ସିନେମାଟି ବକ୍ସ ଅଫିସରେ ବ୍ୟବସାୟିକ ସଫଳତା ହାସଲ କରିବା ସହ ପ୍ରାୟ ୧୦୦ କୋଟି ଟଙ୍କା ଆୟ କରିଥିଲା ବୋଲି ପ୍ରଯୋଜନା ସଂସ୍ଥା ଦାବି କରିଥିଲେ। ଏତେ ବଡ଼ ସଫଳତା ପରେ ମଧ୍ୟ ନିର୍ଦ୍ଦେଶିକାଙ୍କୁ ବକେୟା ପ୍ରାପ୍ୟ ନଦେବା ସମଗ୍ର ତାମିଲ ସିନେମା ଜଗତରେ ଚର୍ଚ୍ଚାର ବିଷୟ ପାଲଟିଛି। ଆଗାମୀ ଶୁଣାଣିରେ କୋର୍ଟ କି ପଦକ୍ଷେପ ନେଉଛନ୍ତି, ତାହା ଉପରେ ଏବେ ସମସ୍ତଙ୍କ ନଜର ରହିଛି।