ନୂଆଦିଲ୍ଲୀ: ମହଙ୍ଗା ବଜାରକୁ ନେଇ ଚିନ୍ତାରେ ଖାଉଟି। ନିର୍ବାଚନୀ ଋତୁରେ ବଜାର ଦର ଟିକିଏ ବି କମିଲାନି କି ଖାଉଟିଙ୍କୁ ମହଙ୍ଗା ବଜାର ଦରରୁ ଆଶ୍ବସ୍ତି ମିଳିଲାନି। ସମ୍ପ୍ରତି ଏଫ୍‌ଏମ୍‌ସିଜି ଶିଳ୍ପରେ ବ୍ୟବହୃତ ଅଧିକାଂଶ କଞ୍ଚାମାଲର ମୂଲ୍ୟ ସ୍ଥିର ରହିଛି। ଏମିତିକି ବହୁ ଉତ୍ପାଦର କଞ୍ଚାମାଲର ମୂଲ୍ୟ ହ୍ରାସ ମଧ୍ୟ ହୋଇଛି। ତେବେ କଞ୍ଚାମାଲ ମୂଲ୍ୟରେ ହେଉଥିବା ଏହି ହ୍ରାସର ଲାଭ ସାଧାରଣ ଖାଉଟିଙ୍କୁ ମିଳୁନାହିଁ। ସରଳରେ କହିବାକୁ ଗଲେ କଞ୍ଚାମାଲ ମୂଲ୍ୟରେ ହ୍ରାସ ସତ୍ତ୍ବେ ଉତ୍ପାଦନ ଖର୍ଚ୍ଚ କମ୍‌ ପଡୁଥିଲେ ବି ଏଫ୍‌ଏମ୍‌‌ସିଜି କମ୍ପାନୀଗୁଡିକ ଉତ୍ପାଦର ଖୁଚୁରା ମୂଲ୍ୟରେ କୌଣସି ପ୍ରକାର ହ୍ରାସ ଘଟାଉନାହାଁନ୍ତି। ଯାହାର ଲାଭ ସାଧାଣ ଖାଉଟି ପାଇପାୁନାହାଁନ୍ତି। କାରଣ ଏଥିରେ ଏଫ୍‌ଏମ୍‌‌ସିଜି ନିର୍ମାତା ବା ଉତ୍ପାଦନକାରୀ କମ୍ପାନୀଙ୍କର ରହିଛି ବଡ଼ ଖେଳ, ଯାହାକୁ ସାଧାରଣ ଖାଉଟି ବୁଝିବା ଏବେ ସହଜ କଥା ନୁହେଁ। ଏକ ରିପୋର୍ଟ ଅନୁଯାୟୀ, ଏଫ୍‌ଏମ୍‌‌ସିଜି ନିର୍ମାତା ମାନେ ପ୍ରଫିଟ୍‌ ମାର୍ଜିନ୍‌ ବା ସେମାନଙ୍କର ଲାଭ ସୀମା ବଜାୟ ରଖିବା ପାଇଁ ଉତ୍ପାଦର ଖୁଚୁରା ମୂଲ୍ୟରେ ହ୍ରାସ କରୁନାହାଁନ୍ତି। ଫଳରେ ଏହାମଧ୍ୟ ସମ୍ଭବ ଯେ ନିକଟ ଭବିଷ୍ୟତରେ ଏହି କମ୍ପାନୀଗୁଡିକ ସେମାନଙ୍କର ଉତ୍ପାଦର ମୂଲ୍ୟ ବୃଦ୍ଧି କରିପାରନ୍ତି।

ଅଧିକାଂଶ ଉପଭୋକ୍ତା ସାମଗ୍ରୀ ନିର୍ମାତା ଗତ କିଛି ତ୍ରୈମାସିକ ହେବ ହୋମ୍‌, ପର୍ସନାଲ ଏବଂ ଖାଦ୍ୟ ସାମଗ୍ରୀ ଉତ୍ପାଦ ବର୍ଗ ସହିତ ଜଡିତ ଦ୍ରବ୍ୟର ମୂଲ୍ୟରେ ହ୍ରାସ ଘଟାଇଛନ୍ତି। ଏହା ସତ୍ତ୍ବେ ବଜାରରେ ଉପଭୋକ୍ତା ସାମଗ୍ରୀର ମୂଲ୍ୟ ପୂର୍ବ ଦୁଇ ବର୍ଷ ତୁଳନାରେ ଅଧିକ ରହିଛି। ଅପରପକ୍ଷେ ଉପଭୋକ୍ତା ସାମଗ୍ରୀ ପ୍ରସ୍ତୁତକାରୀ କମ୍ପାନୀଗୁଡିକର କହିବା ହେଉଛି ଯେ, କଞ୍ଚାମାଲ ଏବଂ ଯୋଗାଣ ଶୃଙ୍ଖଳାରେ ବଢ଼ୁଥିବା ଖର୍ଚ୍ଚକୁ ବଜାୟ ରଖିବା ଲାଗି ବିଗତ ଦୁଇ ବର୍ଷ ହେବ ଉତ୍ପାଦ ମୂଲ୍ୟରେ ବୃଦ୍ଧି କରାଯାଇଛି। ବାସ୍ତବରେ, ଉତ୍ପାଦ ମୂଲ୍ୟ ବୃଦ୍ଧି ଜନିତ ମୁଦ୍ରାସ୍ଫୀତି କରୋନା ମହାମାରୀଠାରୁ ଆରମ୍ଭ ହୋଇଥିଲା ଏବଂ ରୁଷର ୟୁକ୍ରେନ ଉପରେ ଆକ୍ରମଣ ପରେ ଏହା ଆହୁରି ବଢ଼ିଯାଇଛି। ରିପୋର୍ଟ ଅନୁଯାୟୀ, ଏକ ବର୍ଷ ପୂର୍ବେ ଅଶୋଧିତ ତୈଳ, ପାମୋଲିନ୍‌ ତେଲ ଏବଂ କଫିର ମୂଲ୍ୟ ବୃଦ୍ଧି ପାଇଛି। ତେବେ କୋକୋ, କଫି ଏବଂ ଚିନିର ମୂଲ୍ୟ ଦ୍ରୁତ ଗତିରେ ବୃଦ୍ଧି ପାଇଛି। ବୋଷ୍ଟନ୍ କନ୍‌ସଲଟିଂ ଗ୍ରୁପର ସୂଚନାନୁଯାୟୀ, ଗତ ୧୦ ବର୍ଷ ମଧ୍ୟରେ ପର୍ସନାଲ କେୟାର ଉତ୍ପାଦ, ଖାଦ୍ୟ ଏବଂ ପାନୀୟର ମୂଲ୍ୟ ଦ୍ୱିଗୁଣିତ ହୋଇଛି, କିନ୍ତୁ କୋଭିଡ ପରେ ଏହି ବୃଦ୍ଧି ତୀବ୍ର ହୋଇଛି। ବଜାର ବିଶେଷଜ୍ଞମାନଙ୍କ ମତରେ ଗତ ଏକ ବର୍ଷ ମଧ୍ୟରେ କଞ୍ଚାମାଲର ମୂଲ୍ୟ ହ୍ରାସ ପାଇଛି, ତେଣୁ କମ୍ପାନୀଗୁଡିକ ମାର୍ଜିନ ବା ଲାଭାଂଶ ବିସ୍ତାର ମାଧ୍ୟମରେ ଲାଭ ବଜାୟ ରଖିଛନ୍ତି। ବିଏନ୍‌ପି ପାରିବାସ ପକ୍ଷରୁ ନିକଟରେ ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ, ଭବିଷ୍ୟତରେ କମ୍ପାନୀଗୁଡିକ ମୂଲ୍ୟ ବୃଦ୍ଧି କରିବାକୁ ଚାହିଁବେନାର୍ହି।

ରିପୋର୍ଟ ଅନୁଯାୟୀ, ଗତ ଦୁଇ ମାସ ମଧ୍ୟରେ କେତେକ ବର୍ଗର ସୌନ୍ଦର୍ଯ୍ୟ ଏବଂ ପର୍ସନାଲ କେୟାର ଉତ୍ପାଦର ମୂଲ୍ୟ ସାମାନ୍ୟ ହ୍ରାସ ପାଇଛି, କିନ୍ତୁ ସବୁଠାରୁ ବଡ ମୂଲ୍ୟ ବୃଦ୍ଧି ପାଟିରେ ଦେଖାଯାଇଛି। ବିଗତ ଛଅ ମାସ ମଧ୍ୟରେ ଡିଟରଜେଣ୍ଟ ଏବଂ ଡିସ୍ ୱାଶ୍ ମୂଲ୍ୟ ୧୫% ହ୍ରାସ ପାଇଛି, କିନ୍ତୁ ଦୁଇ ବର୍ଷ ପୂର୍ବର ତୁଳନାରେ ଏଥିରେ ୪.୩୦% ମୂଲ୍ୟ ବୃଦ୍ଧି ଘଟିଛି। ଖାଦ୍ୟ ଏବଂ ପାନୀୟ ଉତ୍ପାଦ ବର୍ଗରେ ଖାଇବା ତେଲ ବ୍ୟତୀତ ଅନ୍ୟ ସମାଗ୍ରୀଗୁଡିକର ମୂଲ୍ୟ ଗତ ୬ ମାସ ମଧ୍ୟରେ ପ୍ରାୟତଃ ଅପରିବର୍ତ୍ତିତ ରହିଛି। ଉଦାହରଣ ସ୍ୱରୂପ, ଗତ ୬ ମାସ ମଧ୍ୟରେ ସାବୁନର ମୂଲ୍ୟ ପରିବର୍ତ୍ତନ ହୋଇନାହିଁ, କିନ୍ତୁ ଦୁଇ ବର୍ଷ ପୂର୍ବର ତୁଳନାରେ ଏବେ ବି ମୂଲ୍ୟ ୧୫-୨୦% ଅଧିକ ରହିଛି। ଅପରପକ୍ଷେ ଓରାଲ୍‌ କେୟାର ବର୍ଗର ଉତ୍ପାଦଗୁଡିକର ମୂଲ୍ୟ ଗତ ଦୁଇ ବର୍ଷ ମଧ୍ୟରେ ସର୍ବାଧିକ ହୋଇଛି, ଯେଉଁ କାରଣରୁ ଡିସେମ୍ବର ତ୍ରୈମାସିକରେ କୋଲ୍‌ଗେଟ୍ କମ୍ପାନୀର ଇବିଆଇଟିଡିଏ ଲାଭାଂଶ ରେକର୍ଡ ସର୍ବାଧିକ ୩୩.୬% ଛୁଇଁଛି। ସବୁଠାରୁ କୌତୂହଳର ବିଷୟ ହେଉଛି ଯେ, ଗତ ଦୁଇ ବର୍ଷ ମଧ୍ୟରେ ଖୁଚୁରା ବଜାରରେ ଡିଟରଜେଣ୍ଟ ମୂଲ୍ୟରେ ୧୫% ବୃଦ୍ଧି ପରେ, ଗତ ତ୍ରୈମାସିକରେ ଏହି ବର୍ଗର ଉତ୍ପାଦ ମୂଲ୍ୟରେ ହ୍ରାସ ଘଟିଛି।