ମନୋରଞ୍ଜନ
ଓଡ଼ିଶା
ଅବସର ନେଲା ଶ୍ରୀଜେଶଙ୍କ ଜର୍ସି ନମ୍ବର ୧୬, ଅଭିଜ୍ଞ ଗୋଲରକ୍ଷକଙ୍କୁ ସମ୍ମାନୀତ କଲା ହକି ଇଣ୍ଡିଆ
ନୂଆଦିଲ୍ଲୀ : ଭାରତୀୟ ହକି ଦଳର ଅଭିଜ୍ଞ ଗୋଲରକ୍ଷକ ପିଆର ଶ୍ରୀଜେଶ୍ ପ୍ୟାରିସ୍ ଅଲିମ୍ପିକ୍ସ ପରେ ହକିରୁ ଅବସର ନେଇଛନ୍ତି। ୨୦୨୦ ଟୋକିଓ ଅଲିମ୍ପିକ୍ସ ପରେ କ୍ରମାଗତ ଦ୍ବିତୀୟ ଥର ପାଇଁ ୨୦୨୪ ପ୍ୟାରିସ୍ ଅଲିମ୍ପିକ୍ସରେ ଭାରତୀୟ ଦଳ କାଂସ୍ୟ ପଦକ ଜିତିବା ପରେ ପରେ ଭେଟେରାନ ଗୋଲରକ୍ଷକ ହକିରୁ ଅବସର ନେଇଥିଲେ। ଏହି ଅଭିଜ୍ଞ ଗୋଲରକ୍ଷକଙ୍କୁ ସମ୍ମାନ ଜଣାଇ ହକି ଇଣ୍ଡିଆ ପକ୍ଷରୁ ତାଙ୍କ ଜର୍ସିକୁ ମଧ୍ୟ ଅବସର ଦିଆଯାଇଛି। ହକି ଇଣ୍ଡିଆ ପକ୍ଷରୁ ଜର୍ସି ନମ୍ୱର ୧୬କୁ ଅବସର ଦିଆଯାଇଛି। ଗୋଲକିପର ଶ୍ରୀଜେଶଙ୍କ ଅବସର ପରେ ତାଙ୍କ ଜର୍ସିକୁ ସ୍ମରଣୀୟ କରିବା ପାଇଁ ବଡ଼ ନିଷ୍ପତ୍ତି ନିଆଯାଇଛି।
ହକି ଇଣ୍ଡିଆର ସାଧାରଣ ସମ୍ପାଦକ ଭୋଲା ନାଥ ସିଂ ଏହି ଘୋଷଣା କରି କହିଛନ୍ତି ଯେ ପ୍ରାୟ ଦୁଇ ଦଶନ୍ଧି ଧରି ୧୬ ନମ୍ବର ଜର୍ସି ପିନ୍ଧିଥିବା ୩୬ ବର୍ଷୀୟ ଶ୍ରୀଜେଶଙ୍କର ଭାରତୀୟ ଦଳ ପାଇଁ ବହୁ ଅବଦାନ ରହିଛି। ୨୦୦୬ରେ ଭାରତୀୟ ବରିଷ୍ଠ ଦଳ ତରଫରୁ ସେ ପଦାର୍ପଣ କରିଥିଲେ ଓ ସେବେଠାରୁ ପଛକୁ ଫେରି ଚାହିଁ ନଥିଲେ। ୩୨୮ଟି ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ଶ୍ରୀଜେଶ୍ ନିଜ କ୍ୟାରିଅରରେ ବହୁ ଉତ୍ଥାନପତନ ଦେଖିଛନ୍ତି। ଚଳିତ ଅଲିମ୍ପିକ୍ସରେ ଗ୍ରେଟ୍ ବ୍ରିଟେନ ବିପକ୍ଷ କ୍ୱାର୍ଟରଫାଇନାଲ ମୁକାବିଲାରେ ସେ ଉଚ୍ଚକୋଟୀର ପ୍ରଦର୍ଶନ କରିଥିଲେ ଓ ପେନାଲ୍ଟି ସୁଟ୍ଆଉଟ୍ରେ ଏକାଧିକ ଗୋଲକୁ ଅଟକାଇଥିଲେ ଓ ଭାରତକୁ ସେମିଫାଇନାଲରେ ପ୍ରବେଶ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ତାଙ୍କ ପ୍ରଦର୍ଶନ ବଳରେ ଭାରତ କ୍ରମାଗତ ଦ୍ୱିତୀୟଥର ପାଇଁ ଅଲିମ୍ପିକ୍ସ ସେମିଫାଇନାଲରେ ପ୍ରବେଶ କରିଥିଲା। ସେ ମଧ୍ୟ ଦମ୍ଦାର ପ୍ରଦର୍ଶନ କରି ୨୦୨୦ ଟୋକିଓ ଅଲିମ୍ପିକ୍ସରେ ଭାରତକୁ କାଂସ୍ୟ ପଦକ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ସେଥିପାଇଁ ଜର୍ସି ନମ୍ବର ୧୬କୁ ଅବସର ଦେଉଛୁ ।
ଭାରତୀୟ ଜୁନିୟର ପୁରୁଷ ହକି ଦଳର କୋଚ୍ ଭାବରେ ମିଳିଛି ନିଯୁକ୍ତି
ଭାରତୀୟ ଅଭିଜ୍ଞ ଗୋଲରକ୍ଷକ ପିଆର ଶ୍ରୀଜେଶ୍ ଭାରତୀୟ ପୁରୁଷ ହକି ଦଳରୁ ଅବସର ନେବାପରେ ତାଙ୍କୁ ବଡ଼ ଦାୟିତ୍ବ ଦେଇଛି ହକି ଇଣ୍ଡିଆ। ଭେଟେରାନ ଗୋଲରକ୍ଷକ ପିଆର ଶ୍ରୀଜେଶ୍ଙ୍କୁ ଭାରତୀୟ ଜୁନିୟର ପୁରୁଷ ହକି ଦଳର ମୁଖ୍ୟ ପ୍ରଶିକ୍ଷକ(କୋଚ୍) ଭାବରେ ନିଯୁକ୍ତ କରାଯାଇଛି। ଯାହା ଫଳରେ ସେ ଭବିଷ୍ୟତର ଆହ୍ବାନ ପାଇଁ ଯୁବ ଦଳକୁ ପ୍ରସ୍ତୁତ କରିବେ।
ଭାରତୀୟ ଆଧୁନିକ ହକିର ଦେବତା
କେରଳର କୋଚିରେ ଜନ୍ମିତ ୬ ଫୁଟ ଉଚ୍ଚତା ବିଶିଷ୍ଟ ଏହି ଗୋଲରକ୍ଷକ ୩୬ ବର୍ଷ ବୟସରେ ଗୁରୁବାର କ୍ୟାରିଅରର ଅନ୍ତିମ ମ୍ୟାଚ୍ ଖେଳିଛନ୍ତି। ଏଥିସହ ଦୀର୍ଘ ୧୮ ବର୍ଷର ତାଙ୍କ ଉଜ୍ଜ୍ୱଳମୟ ତଥା ସଫଳ କ୍ୟାରିଅରର ଅନ୍ତି ଘଟିଛି। ଅବଶ୍ୟ ପ୍ୟାରିସ ଅଲିମ୍ପିକ୍ସ ଖେଳି ସେ ଅବସର ନେବେ ବୋଲି ପୂର୍ବରୁ ଘୋଷଣା କରିଥିଲୋ। ତାଙ୍କ ଅବସର ଏବେ ଭାରତୀୟ ହକିରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି କରିଛି ଓ ଏହା ଭରଣା ହେବାକୁ ବେଶ୍ କିଛି ବର୍ଷ ଲାଗିବ। ଶ୍ରୀଜେଶ୍ଙ୍କୁ ଏହି ପ୍ରଭାବୀ ପ୍ରଦର୍ଶନକୁ ସମ୍ମାନ ଜଣାଇ ହକି ଇଣ୍ଡିଆ ପକ୍ଷରୁ ତାଙ୍କୁ ‘ଭାରତୀୟ ଆଧୁନିକ ହକିର ଦେବତା’ ଆଖ୍ୟା ପ୍ରଦାନ କରାଯାଇଛି।
ଏସୀୟ କ୍ରୀଡ଼ାରେ ୨ ସ୍ୱର୍ଣ୍ଣ, ରାଜ୍ୟଗୋଷ୍ଠୀରେ ୨ ରୌପ୍ୟ ଜିତିଛନ୍ତି
ଦଳର ସବୁଠାରୁ ବୟସ୍କ ଖେଳାଳି ହୋଇଥିଲେ ମଧ୍ୟ ଶ୍ରୀଜେଶ୍ଙ୍କ ଫିଟନେସ ଓ ପ୍ରଦର୍ଶନ ବେଶ୍ ଉଚ୍ଚକୋଟୀର ରହି ଆସିଛି। ଟୋକିଓ ଅଲିମ୍ପିକ୍ସ କାଂସ୍ୟ ପଦକକୁ ବାଦ୍ଦେଲେ ସେ ପ୍ରାୟ ସବୁପ୍ରକାର ଅନ୍ତର୍ଜାତୀୟ ହକି ପ୍ରତିଯୋଗିତାରେ ପଦକ ହାସଲ କରିଛି। ସେ ୨୦୧୪ ଇଞ୍ଚିଅନ୍, ୨୦୨୨ ହାଙ୍ଗଝୋଉ ଏସୀୟ କ୍ରୀଡ଼ାରେ ସ୍ୱର୍ଣ୍ଣ ଓ ୨୦୧୮ ଜାକାର୍ତ୍ତା ଏସୀୟ କ୍ରୀଡ଼ାରେ କାଂସ୍ୟ ପଦକ ହାସଲ କରିଛନ୍ତି। ସେହିପରି ସେ ୨୦୧୩ ଇପୋ ଏସିଆ କପ୍ରେ ରୌପ୍ୟ, ୨୦୦୭ ଏସିଆନ ଇଣ୍ଡୋର ଗେମ୍ସରେ କାଂସ୍ୟ, ୨୦୧୬ ଲଣ୍ଡନ ଓ ୨୦୧୮ ବ୍ରେଡା ଚାମ୍ପିଅନ୍ସ ଟ୍ରଫିରେ ରୌପ୍ୟ ପଦକ ହାସଲ କରିବା ସହ ଏସିଆନ ଚାମ୍ପିଅନ୍ସ ଟ୍ରଫିରେ ୪ଟି ସ୍ୱର୍ଣ୍ଣ ଓ ଗୋଟିଏ ରୌପ୍ୟ ପଦକ ଜିତିଥିଲେ। ସେ ମଧ୍ୟ ୨୦୨୪ ଗ୍ଲାସଗୋ ଓ ୨୦୨୨ ବର୍ମିଂହାମ ରାଜ୍ୟଗୋଷ୍ଠୀ କ୍ରୀଡ଼ରେ ରୌପ୍ୟ ପଦକ ହାସଲ କରିଥିଲେ।
About The Author
