ଗତ ୧୩ ବର୍ଷ ଧରି କୋମା ବା ଭେଜିଟେଟିଭ୍ ଷ୍ଟେଟରେ ରହିଥିବା ଜଣେ ୩୨ ବର୍ଷୀୟ ଯୁବକଙ୍କ କ୍ଷେତ୍ରରେ ପାସିଭ୍ ୟୁଥାନେସିଆ ବା ସମ୍ମାନର ସହ ମୃତ୍ୟୁ ପାଇଁ ସୁପ୍ରିମକୋର୍ଟ ଅନୁମତି ପ୍ରଦାନ କରିଛନ୍ତି। ଜଷ୍ଟିସ ଜେବି ପାର୍ଦିୱାଲା ଏବଂ ଜଷ୍ଟିସ କେଭି ବିଶ୍ୱନାଥନଙ୍କୁ ନେଇ ଗଠିତ ଏକ ଖଣ୍ଡପୀଠ ବୁଧବାର ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଶୁଣାଇଛନ୍ତି। ସମ୍ମାନର ସହ ମୃତ୍ୟୁ ବରଣ କରିବାର ଅଧିକାରକୁ ଆଧାର କରି ଏହା ହେଉଛି ପାସିଭ୍ ୟୁଥାନେସିଆ ଢାଞ୍ଚାର ପ୍ରଥମ ନ୍ୟାୟିକ ପ୍ରୟୋଗ।

ହରିଶ ରାଣା ନାମକ ଏହି ଯୁବକ ପ୍ରାୟ ୧୩ ବର୍ଷ ପୂର୍ବେ ଏକ ଅଟ୍ଟାଳିକାର ଚତୁର୍ଥ ମହଲାରୁ ଖସିପଡ଼ିବା ପରେ ଗୁରୁତର ମସ୍ତିଷ୍କ ଆଘାତର ଶିକାର ହୋଇଥିଲେ। ସେବେଠାରୁ ସେ ସମ୍ପୂର୍ଣ୍ଣ ଅକର୍ମଣ୍ୟ ହୋଇ ଶଯ୍ୟାଶାୟୀ ଥିଲେ। ତାଙ୍କ ପିତା ପୁଅର କଷ୍ଟ ସହି ନପାରି ଶେଷରେ ଜୀବନ ରକ୍ଷାକାରୀ ବ୍ୟବସ୍ଥାକୁ ହଟାଇବା ପାଇଁ ଅଦାଲତଙ୍କ ଦ୍ୱାରସ୍ଥ ହୋଇଥିଲେ।

ହରିଶଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ କୋର୍ଟ କହିଛନ୍ତି ଯେ, ଏହି ଯୁବକ ଜଣକ ଦୀର୍ଘ ୧୩ ବର୍ଷ ଧରି ପରସିଷ୍ଟେଣ୍ଟ ଭେଜିଟେଟିଭ୍ ଷ୍ଟେଟ୍ (PVS) ରେ ରହିଥିବା ବେଳେ ତାଙ୍କ ଶରୀର ୧୦୦ ପ୍ରତିଶତ ପକ୍ଷାଘାତ ଦ୍ୱାରା ପ୍ରଭାବିତ ହୋଇଛି। ମେଡିକାଲ ବୋର୍ଡର ରିପୋର୍ଟ ଅନୁଯାୟୀ, ଏକ ଦଶନ୍ଧିରୁ ଅଧିକ ସମୟ ମଧ୍ୟରେ ତାଙ୍କ ସ୍ୱାସ୍ଥ୍ୟରେ କୌଣସି ଉନ୍ନତି ହୋଇନାହିଁ। ସେ କେବଳ ପେଗ୍ ଟ୍ୟୁବ୍ ସାହାଯ୍ୟରେ ଖାଦ୍ୟ ଗ୍ରହଣ କରୁଥିଲେ, ଯାହାକୁ ଏବେ ବନ୍ଦ କରିବାକୁ କୋର୍ଟ ଅନୁମତି ଦେଇଛନ୍ତି।

ସୁପ୍ରିମକୋର୍ଟ ଏହି ମାମଲାରେ ସାଧାରଣତଃ ଲାଗୁ ହେଉଥିବା ୩୦ ଦିନିଆ ପୁନର୍ବିଚାର ଅବଧିକୁ କୋହଳ କରିଛନ୍ତି। ଏମ୍ସ (AIIMS) କର୍ତ୍ତୃପକ୍ଷଙ୍କୁ ଯୁବକଙ୍କୁ ପାଲିଏଟିଭ୍ କେୟାର ସେଣ୍ଟରରେ ଭର୍ତ୍ତି କରିବାକୁ ଏବଂ ଡାକ୍ତରୀ ତତ୍ତ୍ୱାବଧାନରେ ଏହି ପ୍ରକ୍ରିୟା ସମ୍ପନ୍ନ କରିବାକୁ ନିର୍ଦ୍ଦେଶ ଦିଆଯାଇଛି। କୋର୍ଟଙ୍କ ମତରେ, ଚିକିତ୍ସା କେବଳ ଜୈବିକ ଅସ୍ତିତ୍ୱକୁ ବଢ଼ାଉଛି କିନ୍ତୁ ସୁସ୍ଥ ହେବାର କୌଣସି ସମ୍ଭାବନା ନାହିଁ। ଏହା ସହିତ କୋର୍ଟ ପାସିଭ୍ ୟୁଥାନେସିଆ ଉପରେ ଏକ ବ୍ୟାପକ ଆଇନ ପ୍ରଣୟନ କରିବା ପାଇଁ କେନ୍ଦ୍ର ସରକାରଙ୍କୁ ପରାମର୍ଶ ଦେଇଛନ୍ତି।

ଜଷ୍ଟିସ ପାର୍ଦିୱାଲା ନିଜ ମତ ପ୍ରକାଶ କରିବା ବେଳେ ଯୁବକଙ୍କ ପିତାମାତାଙ୍କ ନିଷ୍ଠା ଓ ଭଲପାଇବାକୁ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ପରିବାର ତାଙ୍କ ସାଥୀ କେବେ ଛାଡିନାହାନ୍ତି ଏବଂ ଅତ୍ୟନ୍ତ କଠିନ ସମୟରେ ମଧ୍ୟ ତାଙ୍କର ଯତ୍ନ ନେଇଛନ୍ତି।