ପାଟନା: ବିହାରରେ ସରକାରୀ ଅବହେଳା ଯୋଗୁଁ ଲୋକଙ୍କ ବ୍ୟାଙ୍କ ଆକାଉଣ୍ଟରେ ପୁଳାପୁଳା ଟଙ୍କା ଜମା ହେବାରେ ଲାଗିଛି। ଖାଗଡିଆରେ ଜଣେ ଯୁବକଙ୍କ ଆକାଉଣ୍ଟରେ ସାଢେ ପାଞ୍ଚ ଲକ୍ଷ ଟଙ୍କା ଆସିଥିବା ମାମଲା ଏପର୍ଯ୍ୟନ୍ତ ଶେଷ ହୋଇ ନ ଥିବା ବେଳେ ଆଉ ଏକ ନୂଆ ମାମଲା ସାମ୍ନାକୁ ଆସିଛି। ଜିଲ୍ଲାର ଦୁଇ ସ୍କୁଲ ଛାତ୍ରଙ୍କ ବ୍ୟାଙ୍କ ଆକାଉଣ୍ଟରେ ୯୬୦ କୋଟି ଟଙ୍କା ଜମା ହୋଇଛି। ଦୁଇଟି ବ୍ୟାଙ୍କ ଆକାଉଣ୍ଟରେ ୯୦୦ କୋଟିରୁ ଅଧିକ ଟଙ୍କା ଦେଖିବା ପରେ ମଧ୍ୟ ବ୍ୟାଙ୍କ ଅଧିକାରୀମାନେ ଆଶ୍ଚର୍ଯ୍ଯ ହୋଇଯାଇଛନ୍ତି।

ସରକାରୀ କିମ୍ବା ବ୍ୟାଙ୍କ ଅଧିକାରୀଙ୍କ ଅବହେଳା ପରେ ଲୋକମାନେ ସେମାନଙ୍କ ଆକାଉଣ୍ଟ ଯାଞ୍ଚ କରିବାକୁ ବ୍ୟାଙ୍କ ଓ ସିଏସପି କେନ୍ଦ୍ରରେ ପହଞ୍ଚିଛନ୍ତି। କିଛି ଲୋକଙ୍କ କହିବା ଅନୁଯାୟୀ, ଅଧିକାରୀଙ୍କ ଅବହେଳା ଯୋଗୁଁ ଏହି ଟଙ୍କା ସେମାନଙ୍କ ଆକାଉଣ୍ଟକୁ ଆସିଛି। ତେବେ କିଛି ଲୋକ ମୋଦୀ ସରକାର ୨୦୧୪ ମସିହାରେ କହିଥିବା ୧୫ ଲକ୍ଷ ଟଙ୍କା ବର୍ତ୍ତମାନ ଆସିଛି ବୋଲି କହିଛନ୍ତି।

ଉଭୟ ଶିଶୁ ଆଜମନଗର ପୋଲିସ ଷ୍ଟେସନର ବଧୋରା ପଞ୍ଚାୟତରେ ଅବସ୍ଥିତ ପାସ୍ତିଆ ଗାଁର ବାସିନ୍ଦା। ସ୍କୁଲ ଛାତ୍ରଛାତ୍ରୀଙ୍କ ପାଇଁ  ବିହାର ରାଜ୍ଯସରକାର ୟୁନିଫର୍ମ ପାଇଁ  ଟଙ୍କା ସିଧାସଳଖ ପିଲାମାନଙ୍କର ବ୍ୟାଙ୍କ ଆକାଉଣ୍ଟକୁ ପଠାଇଥାନ୍ତି। ଗୁରୁଚନ୍ଦ୍ର ବିଶ୍ୱାସ ଏବଂ ଅସିତ କୁମାର ଆକାଉଣ୍ଟରେ ପୋଷାକର ପରିମାଣ ବିଷୟରେ ପଚାରିବା ପାଇଁ ସିଏସପି କେନ୍ଦ୍ରରେ ପହଞ୍ଚିଥିଲେ। ଏଠାରେ ଉଭୟ ଜାଣିବାକୁ ପାଇଥିଲେ ଯେ ଆକାଉଣ୍ଟରେ କୋଟିକୋଟି ଟଙ୍କା ଜମା ହୋଇଛି। ପିଲାମାନେ ଏହା ଶୁଣି ଆଶ୍ଚର୍ଯ୍ୟ ହୋଇଥିଲେ ଏବଂ ସେଠାରେ ଉପସ୍ଥିତ ଥିବା ଅନ୍ୟମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ।ଛାତ୍ର ଅସିତ କୁମାରଙ୍କ ଆକାଉଣ୍ଟ( 1008151030208001) ନମ୍ବରରେ ୯୦୦ କୋଟିରୁ ଅଧିକ ପରିମାଣର ଟଙ୍କା ଜମାହେଇଛି। ଗୁରୁଚନ୍ଦ୍ର ବିଶ୍ୱସ ଖାତା – 1008151030208081ରେ ୬୦ କୋଟିରୁ ଅଧିକ ଜମା ହୋଇଛି। ଉଭୟ ଆକାଉଣ୍ଟ ଉତ୍ତର ବିହାର ଗ୍ରାମିଣ ବ୍ୟାଙ୍କ ଭେଲାଗଞ୍ଜ ଶାଖାର ଅଟେ।

ଗ୍ରାମିଣ ବ୍ୟାଙ୍କର ଭେଲାଗଞ୍ଜର ଶାଖା ପରିଚାଳକ ମନୋଜ ଗୁପ୍ତା ମଧ୍ୟ ପିଲାମାନଙ୍କ ଆକାଉଣ୍ଟଗୁଡିକର ବାଲାନ୍ସ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ସେ ତୁରନ୍ତ ଆକାଉଣ୍ଟକୁ ଫ୍ରିଜ୍ କରିଥିବାବେଳେ ଘଟଣାର ତଦନ୍ତ ଆରମ୍ଭ ହୋଇଛି। ବ୍ୟାଙ୍କର ବରିଷ୍ଠ ଅଧିକାରୀମାନଙ୍କୁ ମଧ୍ୟ ଏ ସମ୍ପର୍କରେ ସୂଚନା ଦିଆଯାଇଛି ବୋଲି ବ୍ଯାଙ୍କ ଅଧିକାରୀ କହିଛନ୍ତି।