ନୂଆଦିଲ୍ଲୀ: ଭାରତୀୟ ଗଣମାଧ୍ୟମରେ ଏବେ ଅନୁସନ୍ଧାନମୂଳକ ସାମ୍ବାଦିକତା ଏକପ୍ରକାର ଉଭାନ ହୋଇଯାଇଛି ବୋଲି ପ୍ରଧାନବିଚାରପତି ଜଷ୍ଟିସ ଏନ ଭି ରମଣା କହିଛନ୍ତି। ପୂର୍ବରୁ ସମାଜରେ ଘଟୁଥିବା ବିଭିନ୍ନ କେଳେଙ୍କାରୀ କିମ୍ବା ଘୋଟାଲାକୁ ନେଇ ଆଶ୍ଚର୍ଯ୍ୟ କରିବା ଭଳି ବହୁ ଅନୁସନ୍ଧାନମୂଳକ ରିପୋର୍ଟ ପ୍ରକାଶ ପାଇ ଆସୁଥିଲେ ହେଁ ଏବେ ସେଭଳି ରିପୋର୍ଟ ପ୍ରକାଶ ପାଇବା ବନ୍ଦ ହୋଇଯାଇଛି ବୋଲି ଜଷ୍ଟିସ ରମଣା କହିଛନ୍ତି ।

ଭର୍ଚୁଆଲ ମାଧ୍ୟମରେ ଏକ ପୁସ୍ତକର ଉନ୍ମୋଚନ କରିବା ଅବସରରେ ସେ କହିଛନ୍ତି ଯେ, ଆମର ବୟସ ବଢିଚାଲି ଥିବା ବେଳେ କୌଣସି ଦୁର୍ନୀତି କିମ୍ବା ଘୋଟାଲା ସମ୍ପର୍କରେ ଜାଣିବାର ସୂହା ମଧ୍ୟ ବଢିଥାଏ। କିନ୍ତୁ ଆଜିକାଲି ଏଭଳି ଖବର ପ୍ରକାଶ ପାଇବା ଆଦୌ ଦେଖାଯାଉ ନାହିଁ । ଏମିତି କାଁଭାଁ କିଛି ସମ୍ବାଦପତ୍ରକୁ ଛାଡି ଦେଲେ ଅନ୍ୟ କୌଣସିଥରେ ଏ ସମ୍ପର୍କରେ ଖବର ପ୍ରକାଶ ପାଉନାହିଁ ବୋଲି ଜଷ୍ଟିସ ରମଣା କହିଛନ୍ତି। ସେହିପରି ନ୍ୟାୟପାଳିକା ବ୍ୟବସ୍ଥାରେ ମହିଳାମାନଙ୍କ ପାଇଁ ୫୦ ପ୍ରତିଶତ ବିଚାରପତି ପଦବୀ ରହିବା ସପକ୍ଷରେ ମଧ୍ୟ ସେ ନିଜର ମତ ଦୋହରାଇଛନ୍ତି। ସାମ୍ବିଧାନିକ କୋର୍ଟଗୁଡ଼ିକରେ ମହିଳାମାନଙ୍କ ଲାଗି ୫୦ ପ୍ରତିଶତ ବିଚାରପତି ପଦ ସଂରକ୍ଷଣ ରଖାଯିବା ପ୍ରସଙ୍ଗରେ ସେ କଲେଜିୟମ ସଦସ୍ୟଙ୍କ ସହ କଥା ହେବେ ବୋଲି କହିଛନ୍ତି।