ନଭି ମୁମ୍ବାଇରେ ଚାଞ୍ଚଲ୍ୟ: ୬ ବର୍ଷର ଝିଅ ମରାଠୀ କହିନପାରିବାରୁ ତଣ୍ଟି ଚିପି ହତ୍ୟା କଲା ମାଆ !

ମୁମ୍ବାଇ: ମହାରାଷ୍ଟ୍ରର ନଭି ମୁମ୍ବାଇରେ ଏକ ଅତ୍ୟନ୍ତ ଦୁଃଖଦାୟକ ତଥା ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ମରାଠୀ ଭାଷା କହିନପାରିବାରୁ ଜଣେ ମାଆ ନିଜର ୬ ବର୍ଷର ଶିଶୁ କନ୍ୟାକୁ ତଣ୍ଟି ଚିପି ହତ୍ୟା କରିଥିବା ଅଭିଯୋଗ ହୋଇଛି। ପ୍ରଥମେ ଘଟଣାକୁ ଲୁଚାଇବା ପାଇଁ ଶିଶୁଟିର ମୃତ୍ୟୁ ହୃଦଘାତ ଯୋଗୁଁ ହୋଇଛି ବୋଲି ପ୍ରଚାର କରାଯାଇଥିଲା, କିନ୍ତୁ ପୋଲିସର ତଦନ୍ତ ପରେ ସତ୍ୟ ପଦାକୁ ଆସିଛି।

କଲମ୍ବୋଲି ଅଞ୍ଚଳର ଗୁରୁସଙ୍କଳ୍ପ ହାଉସିଂ ସୋସାଇଟିରେ ଏହି ଘଟଣା ଘଟିଛି। ଡିସେମ୍ବର ୨୩ ତାରିଖ ରାତିରେ ଶିଶୁଟିକୁ ଅଚେତ ଅବସ୍ଥାରେ ଡାକ୍ତରଖାନା ନିଆଯାଇଥିଲା, ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ପ୍ରାଥମିକ ଭାବେ ଏହା ଏକ ହୃଦଘାତ ବୋଲି କୁହାଯାଇଥିଲେ ହେଁ, କଲମ୍ବୋଲି ଥାନାର ବରିଷ୍ଠ ପୋଲିସ ଇନ୍ସପେକ୍ଟର ରାଜେନ୍ଦ୍ର କୋଟେ ସନ୍ଦେହ ପ୍ରକାଶ କରି ଶବ ବ୍ୟବଚ୍ଛେଦ ପାଇଁ ନିର୍ଦ୍ଦେଶ ଦେଇଥିଲେ। ରିପୋର୍ଟରୁ ଜଣାପଡିଥିଲା ଯେ ଶ୍ୱାସରୁଦ୍ଧ ହେବା କାରଣରୁ ଶିଶୁଟିର ମୃତ୍ୟୁ ଘଟିଛି।

ପୋଲିସ ସୂଚନା ଅନୁଯାୟୀ, ପରିବାରରେ ସ୍ୱାମୀ ଜଣେ ଆଇଟି ଇଞ୍ଜିନିୟର ହୋଇଥିବାବେଳେ ଅଭିଯୁକ୍ତ ମହିଳା ଜଣକ ବିଏସସି ଡିଗ୍ରୀ ହାସଲ କରିଛନ୍ତି। ୨୦୧୯ରେ ଜନ୍ମ ହୋଇଥିବା ସେମାନଙ୍କ ଝିଅ କଥା କହିବାରେ ସମସ୍ୟା ଭୋଗୁଥିଲା ଏବଂ ମରାଠୀ ବଦଳରେ କେବଳ ହିନ୍ଦୀ ଭାଷାରେ କଥାବାର୍ତ୍ତା କରୁଥିଲା। ଏହି କାରଣରୁ ମାଆ ଅତ୍ୟନ୍ତ କ୍ଷୁବ୍ଧ ଥିଲେ ଏବଂ ବାରମ୍ବାର ସ୍ୱାମୀଙ୍କୁ କହୁଥିଲେ ଯେ, "ମୋର ଏମିତି ପିଲା ଦରକାର ନାହିଁ, ସେ ଠିକ ଭାବରେ କଥା କହିପାରୁନି।"

ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ପୋଲିସ ବାପା-ମାଆଙ୍କୁ ଦୀର୍ଘ ୬ ଘଣ୍ଟା ଧରି ଜେରା କରିଥିଲା। ଶେଷରେ ମାଆ ନିଜେ ଝିଅକୁ ହତ୍ୟା କରିଥିବା ସ୍ୱୀକାର କରିଥିଲେ। ତଦନ୍ତରୁ ଏହା ମଧ୍ୟ ଜଣାପଡିଛି ଯେ ଅଭିଯୁକ୍ତ ମହିଳା ଜଣକ ମାନସିକ ଚିକିତ୍ସାଧୀନ ଥିଲେ। ପୋଲିସ ମହିଳାଙ୍କୁ ଗିରଫ କରି ଘଟଣାର ଅଧିକ ତଦନ୍ତ ଜାରି ରଖିଛି।