ବାଂଲାଦେଶର ରାଜଧାନୀ ଢାକା ନିକଟସ୍ଥ ଏକ କାରଖାନାରେ ଅଗ୍ନିକାଣ୍ଡ ଘଟି ୫୨ ଜଣଙ୍କର ମୃତ୍ୟୁ ଘଟିଥିବା ବେଳେ ୫୦ରୁ ଅଧିକ ଲୋକ ଗୁରୁତର ଆହତ ହୋଇଛନ୍ତି। ଶୁକ୍ରବାର ଦିନ ଏହି ସୂଚନା ଦିଆଯାଇଛି। ଅଗ୍ନିଶମ ଅଧିକାରୀଙ୍କ କହିବା ଅନୁଯାୟୀ, ଗୁରୁବାର ଦିନ ଅପରାହ୍ନ ପ୍ରାୟ ୫ଟା ସମୟରେ ନାରାୟଣଗଞ୍ଜର ରୁପଗଞ୍ଜର ଶେଜନ ଜୁସ୍ କାରଖାନାରେ ଏହି ଅଗ୍ନିକାଣ୍ଡ ଘଟିଥିଲା। ରାସାୟନିକ ପଦାର୍ଥ ଏବଂ ପ୍ଲାଷ୍ଟିକ ବୋତଲ ଥିବାରୁ ଅଗ୍ନିକାଣ୍ଡ କୋଠାର ତଳ ମହଲାରୁ ଆରମ୍ଭ ହୋଇ ଶୀଘ୍ର ବ୍ୟାପିଯାଇଥିଲା ।

ଢାକାର ଟ୍ରିବ୍ୟୁନ୍’ର ଖବର ଅନୁଯାୟୀ, ଏହି ଅଗ୍ନିକାଣ୍ଡରେ ୫୨ ଜଣଙ୍କର ମୃତ୍ୟୁ ଘଟିଛି ଏବଂ ୫୦ରୁ ଅଧିକ ଲୋକ ଜଳି ଯାଇଛନ୍ତି। ଭୀଷଣ ଅଗ୍ନିକାଣ୍ଡରୁ ରକ୍ଷା ପାଇବା ପାଇଁ ଅନେକ ଶ୍ରମିକ ବିଲଡିଂରୁ ଡେଇଁ ପଡ଼ିଥିଲେ। ଖବର ଅନୁଯାୟୀ, ହାଶେମ ଫୁଡ୍ସ ଲିମିଟେଡର କାରଖାନା ଭବନରେ ନିଆଁକୁ ଆୟତ୍ତ କରିବା ପାଇଁ ୧୮ ଟି ଅଗ୍ନିଶମ ଗାଡ଼ି ନିୟୋଜିତ ହୋଇଥିବା ଜଣାପଡ଼ିଛି।  ବର୍ତ୍ତମାନ ସୁଦ୍ଧା ୪୪ ଜଣ ଶ୍ରମିକଙ୍କ ପରିଚୟ ମିଳି ପାରିଛି।

ଯେଉଁ ପର୍ଯ୍ୟନ୍ତ ନିଆଁ ନିୟନ୍ତ୍ରଣକୁ ନ ଆସିଛି ସେ ପର୍ଯ୍ୟନ୍ତ ଏହି ଅଗ୍ନିକାଣ୍ଡରେ କେତେ କ୍ଷୟକ୍ଷତି ହୋଇଛି ଏବଂ ନିଆଁ ପଛର କାରଣ କ’ଣ ତାହା କହିବା ସମ୍ଭବ ନୁହେଁ। ଘଟଣାର ତଦନ୍ତ ପାଇଁ ଜିଲ୍ଲା ପ୍ରଶାସନ ଏକ ପାଞ୍ଚ ଜଣିଆ ତଦନ୍ତ କମିଟି ଗଠନ କରିଛି।