ନାବାଳିକାଙ୍କ ଅଶ୍ଳୀଳ ଭିଡ଼ିଓ ଭାଇରାଲ ମାମଲାରେ ୩ ଜଣଙ୍କୁ ଗିରଫ କଲା କେନ୍ଦ୍ରାପଡା ପୁଲିସ

କେନ୍ଦ୍ରାପଡ଼ା: ଜମିବାଡ଼ି ବିବାଦରୁ ଜଣେ ନାବାଳିକାଙ୍କୁ ପ୍ରେମ ଜାଲରେ ଫସାଇ ତାଙ୍କର ଅଶ୍ଲୀଳ ଭିଡ଼ିଓ ଆଉ ଫଟୋ ଦେଶ ବିଦେଶରେ ଭାଇରାଲ କରିବା ନେଇ ଅଭିଯୁକ୍ତଙ୍କୁ ମହଙ୍ଗା ପଡିଛି । ସେହି ମାମଲାରେ ସଦର ଥାନା ପୋଲିସ ୩ ଜଣ ଅଭିଯୁକ୍ତଙ୍କୁୁ ଗିରଫ କରି କୋର୍ଟ ଚାଲାଣ କରିଛି । ଏନେଇ କେନ୍ଦ୍ରାପଡା ସଦରଥାନାରେ କେନ୍ଦ୍ରାପଡା ଉପ-ଆରକ୍ଷୀ ଅଧିକ୍ଷକ ରାଜୀବ ଲୋଚନ ପଣ୍ଡା ଏକ ସାମ୍ବାଦିକ ସମ୍ମିଳନୀରେ ପୋଲିସ ଦ୍ୱାରା ଗିରଫ ହୋଇଥିବା ଅଭିଯୁକ୍ତ ପଶ୍ଚିମବଙ୍ଗ ନଦିଆ ଜିଲ୍ଲାର କାଳିଗଞ୍ଜ ଥାନା ଅନ୍ତର୍ଗତ ଜାନକୀନଗର ଗ୍ରାମର ମିଲନ (୩୨) ମୁଲାୟମ (୩୦) ଓ କଟକ ଜିଲ୍ଲାର ସାଲେପୁର ଥାନା ଅନ୍ତର୍ଗତ ପାଟପୁର ଗ୍ରାମର ଦେବଦତ୍ତ ବେହେରା (୨୮) ଙ୍କୁ କୋର୍ଟ ଚାଲାଣ କରାଯାଇଥିବା ଏବଂ ସେମାନଙ୍କ ନିକଟରୁ ୨ଟି ମୋବାଇଲ ଫୋନ ଜବତ କରାଯାଇଥିବା ସମ୍ପର୍କରେ ସାମ୍ବାଦିକ ସମ୍ମିଳନୀରେ ସୁଚନା ଦେଇଥିଲେ । ଭାଇରାଲର ମାଷ୍ଟ୍ରରମାଇଣ୍ଡ ପଡୋଶୀ ଦମ୍ପତ୍ତି ଫେରାର ହୋଇଯାଇଛନ୍ତି ।

ପ୍ରକାଶଯୋଗ୍ୟ, ସଦରଥାନା ଅଧିନ ଚାନ୍ଦୋଳ ଅଞ୍ଚଳର ଜଣେ ନାବାଳିକାଙ୍କ ଗୃହ ନିର୍ମାଣ ନିମନ୍ତେ ପଶ୍ଚିମବଙ୍ଗର ମିଲନ ନାମକ ଜଣେ ବଙ୍ଗାଳି ମିସ୍ତ୍ରୀ ଠିକା ନେଇଥିଲେ । ଘର କାମ କରିବା ସମୟରେ ମିଲନଙ୍କ ସହିତ ସେହି ନାବାଳିକାଙ୍କ ସମ୍ପର୍କ ଗଢି ଉଠିଥିଲା । ସମ୍ପୃକ୍ତ ନାବାଳିକାଙ୍କ ପରିବାରର ଅଗୋଚରରେ ମିଲନ ଭିଡିଓ କଲିଂ କରି ସମ୍ପୃକ୍ତ ନାବାଳିକାଙ୍କ ଅଶ୍ଳୀଳ ଫଟୋ ଆଉ ଭିଡ଼ିଓ ରେକର୍ଡ କରି ନେଇଥିଲେ । ମିଲନ ନାବାଳିକାଙ୍କ ଘର ନିର୍ମାଣ କାମର ଠିକା ନେବା ସହ ତାଙ୍କ ପଡୋଶୀଙ୍କ ଘର କାମ ବୁଝାଶୁଝା କରୁଥିଲେ । କିନ୍ତୁ ପଡୋଶୀ ଏବଂ ନାବାଳିକାଙ୍କ ପରିବାର ମଧ୍ୟରେ ପୁର୍ବରୁ ଜମିବାଡିକୁ ନେଇ ବିବାଦ ଲାଗିରହିଥିଲା । ପଡୋଶୀଙ୍କ ଘରେ ମିଲନଙ୍କ ଭାଇ ମୁଲାୟମ ରହୁଥିଲେ । ନାବାଳିକାଙ୍କ ପଡୋଶୀ ଏବଂ ତାଙ୍କ ପତ୍ନୀ ମୁଲାୟମଙ୍କ ସହ ମିଶି ମିଲନର ଫୋନରେ ଥିବା ନାବାଳିକାଙ୍କ କେତେକ ଅଶ୍ଳୀଳ ଫଟୋ ଭିଡିଓ ହ୍ୱାଟ୍ସଅପ ଗୃପରେ ଭାଇରାଲ କରିଦେଇଥିଲେ ।

ଏନେଇ ଥାନାରେ ଅଭିଯୋଗ ହେବା ପରେ ପୋଲିସ ଏକ ମାମଲା ୩୨୩/୨୦୨୧ରେ ଆଇପିସିର ୨୯୪,୫୦୬, ୩୪ ଦଫା ଏବଂ ୬୭(ଖ) ଆଇ.ଟି. ଆକ୍ଟ ଓ ୧୨ ପୋସ୍କୋ ଆକ୍ଟରେ ଏକ ମାମଲା ରୁଜୁ ହୋଇଥିଲା ।