ମନୋରଞ୍ଜନ
ଓଡ଼ିଶା
ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଅନୁଧ୍ୟାନ ପାଇଁ ପୁରୀରେ ପହଞ୍ଚିଲେ ୩ଜଣିଆ ଏଏସଆଇ ଟିମ୍
ପୁରୀ: ପୁରୀରେ ତିନି ଜଣିଆ ଏଏସଆଇ ଟିମ୍ ପହଞ୍ଚିଛନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଅନୁଧ୍ୟାନ ପାଇଁ ଏଏସଆଇ ଟିମ୍ ପହଞ୍ଚିଛି। ଏଏସଆଇର ଆଞ୍ଚଳିକ ନିର୍ଦ୍ଦେଶକ ଦିଲ୍ଲିପ ଖମାରୀ, ସୁପରିଟେଣ୍ଡେଣ୍ଟ ଅରୁଣ ମଲ୍ଲିକ, ଆସିଷ୍ଟାଣ୍ଟ ସୁପରିଟେଣ୍ଡେଣ୍ଟ ଚିତ୍ତରଞ୍ଜନ ଦାସ ପୁରୀରେ ପହଞ୍ଚି ଶ୍ରୀମନ୍ଦିର ଯାଇ ସମସ୍ତ କାର୍ଯ୍ୟର ଅନୁଧ୍ୟାନ କରୁଛନ୍ତି । ପୁରୀ ଜିଲ୍ଲାପାଳଙ୍କ ସହିତ ପୂର୍ତ୍ତ ବିଭାଗ ଟିମ, OBCC ଓ କରିଡର ନିର୍ମାଣକାରୀ ସଂସ୍ଥା ମଧ୍ୟ ଉପସ୍ଥିତ ଅଛନ୍ତି । ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଯୁଗ୍ମ ଟିମ୍ ଦ୍ୱାରା ଚାଲିଛି ସମୀକ୍ଷା । ଅନୁଧ୍ୟାନ କରିବା ପରେ ଆସନ୍ତା ୯ ତାରିଖ ପୂର୍ବରୁ ରିପୋର୍ଟ ଦାଖଲ କରିବ ଏଏସଆଇ ଟିମ୍ ।
ଟିମର ସଦସ୍ୟମାନେ ନିର୍ମାଣ କରାଯାଇଥିବା ପିଲର ଓ ତା’ର ମୋଟେଇ ଉଚ୍ଚତା, ଗଭୀରତା ତଥା ଏଥିରେ ବ୍ୟବହୃତ ସାମଗ୍ରୀ ଯାଞ୍ଚ କରିଛନ୍ତି । କରାଯାଇଥିବା ସମସ୍ତ ଯାଞ୍ଚ ପ୍ରକ୍ରିୟାର ଲିଖିତ ଭାବେ ସଂଗ୍ରହ କରାଯାଇଥିବା ବେଳେ ମେସିନ ମାଧ୍ୟମରେ ଯାଞ୍ଚ କରିଥିବା ପରିଲିକ୍ଷିତ ହୋଇଛି । ଟିମ୍, ଜିଲ୍ଲାପାଳ ଓ ଅନ୍ୟାନ୍ୟ ଅଧିକାରୀଙ୍କ ସହିତ ଭକ୍ତ ନିବାସରେ ଆଲୋଚନା କରିଥିବା ଦେଖିବାକୁ ମିଳିଥିଲା । ତେବେ ହାଇକୋର୍ଟରେ ରିପୋର୍ଟ ଦାଖଲ କରାଯିବାକୁ ଥିବାରୁ ଅନୁଧ୍ୟାନ ସମ୍ପର୍କରେ ଅଧିକ କିଛି ସୂଚନା ଦେଇନାହାଁନ୍ତି ଏଏସଆଇ ଅଧିକାରୀ ।
About The Author
