ଖ୍ୟାତନାମା ଓଡ଼ିଆ ଲେଖିକା ଡ଼. ଗାୟତ୍ରୀବାଳା ପଣ୍ଡାଙ୍କୁ ଦ୍ୱିତୀୟ ବାର ‘ଟାଇମ୍ସ ପାୱାର ୱିମେନ୍‌‌ ଆୱାର୍ଡ’

ଭୁବନେଶ୍ୱର: ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ନିମନ୍ତେ ଟାଇମ୍ସ ଗ୍ରୁପ୍‌‌ ପକ୍ଷରୁ ରାଜ୍ୟର ପ୍ରଭାବଶାଳୀ ଓ ଖ୍ୟାତନାମା ମହିଳାମାନଙ୍କୁ ‘ଟାଇମ୍ସ ପାୱାର ୱିମେନ୍‌‌ ଆୱାର୍ଡ଼’ରେ ସମ୍ମାନିତ କରାଯାଇଛି। କାର୍ଯ୍ୟକ୍ରମରେ ମୁଖ୍ୟ ଅତିଥି ରାଜ୍ୟପାଳ ପ୍ରଫେସର ଗଣେଶୀଲାଲ ପଦ୍ମଶ୍ରୀ ତୁଳସୀ ମୁଣ୍ଡା, ପଦ୍ମଶ୍ରୀ କୁମ୍‌‌କୁମ୍‌‌ ମହାନ୍ତି, ପଦ୍ମଶ୍ରୀ ଶ୍ୟାମାମଣି ଦେବୀ, ପଦ୍ମଶ୍ରୀ ପୂର୍ଣ୍ଣମାସୀ ଜାନୀଙ୍କୁ ଆଜୀବନ ସାଧନା ସମ୍ମାନରେ ସମ୍ମାନିତ କରିଛନ୍ତି। ଅନୁରୂପ ଭାବରେ ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଯୋଗଦାନ ନିମନ୍ତେ ଖ୍ୟାତନାମା ଓଡ଼ିଆ ଲେଖିକା ଡ଼. ଗାୟତ୍ରୀବାଳା ପଣ୍ଡାଙ୍କୁ ମିଳିଛି ‘ଟାଇମ୍ସ ପାୱାର ୱିମେନ୍‌‌ ଆୱାର୍ଡ଼-୨୦୨୩’। ଟାଇମ୍ସ ଗ୍ରୁପ୍‌‌ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ବଲିଉଡ଼୍‌‌ ଅଭିନେତ୍ରୀ ରାକୁଲପ୍ରୀତ୍‌‌ ସିଂହ ଡ଼. ପଣ୍ଡାଙ୍କୁ ଏହି ସମ୍ମାନ ପ୍ରଦାନ କରିଛନ୍ତି।

ଗତ ମାର୍ଚ୍ଚ ମାସରେ ନୂଆଦିଲ୍ଲୀରେ ‘ଦୟାନଦୀ’ କବିତା ପୁସ୍ତକ ନିମନ୍ତେ ଡ଼. ଗାୟତ୍ରୀବାଳା ପଣ୍ଡା କେନ୍ଦ୍ର ସାହିତ୍ୟ ଏକାଡ଼େମୀ ପୁରସ୍କାର ପାଇଥିଲେ। ପ୍ରଥମ ଭାରତୀୟ କବି ଭାବରେ କେନ୍ଦ୍ର ସାହିତ୍ୟ ଏକାଡ଼େମୀର ଦୁଇଟି ବର୍ଗରେ ସେ ପୁରସ୍କୃତ ହୋଇଥିଲେ। ସମ୍ପ୍ରତି ଟାଇମ୍ସ ଗ୍ରୁପ୍‌‌ ପକ୍ଷରୁ ତାଙ୍କୁ କ୍ରମାଗତ ଦ୍ୱିତୀୟଥର ପାଇଁ ଟାଇମ୍ସ ପାୱାର ୱିମେନ ସମ୍ମାନରେ ସମ୍ମାନିତ କରାଯାଇଛି।

ଅନ୍ୟପକ୍ଷରେ ଏହି ଅବସରରେ ଡ. ଇତି ସାମନ୍ତ, ଡ. ନୀଲାଞ୍ଜନା ମୁଖାର୍ଜୀ, ଡ. ନୀତା ମହାନ୍ତି, ପଦ୍ମଶ୍ରୀ ସାବରମତୀ, ସେଫିଆ ଫିରଦୋଶ୍‌‌, ଆଇପିଏସ୍‌‌ ସାଗରିକା ନାଥ, ଦିପ୍ତୀ ମହାପାତ୍ର, ମେୟର ସୁଲୋଚନା ଦାସ, ରୁଚି ଜଲାନ୍‌‌, ଡ. ଶ୍ୱେତପଦ୍ମା ଦାସ, ଡ. ଇପ୍‌‌ସିତା ଶତପଥୀ, ଶାଳିନୀ କୋଥକୋଣ୍ଡା, ସୁମା ଦେବୀ ଦାସ, ପୂର୍ଣ୍ଣିମା ବଦେ୍‌‌, ଡ. ମାଧୁରୀ ପଟ୍ଟନାୟକ, ଡ. ଶ୍ରୁତି ମହାପାତ୍ର, ଡ. ସୁଜାତା ସାହୁ, ଆଇଏଏସ୍‌‌ ଅବୋଲି ନରଭଣେ, ଡ. ହରପ୍ରୀତ୍‌‌ କୌର, ମଞ୍ଜୁଲିତା ନାୟକ, ନିରୂପମା ବିଶ୍ୱାଳ, ଲିପିକା ସିଂହ, ଅମୀୟବାଳା ପରିଡ଼ା, ନମିତା ଟପ୍ପୋ, ସସ୍ମିତା ସରକାର, ସୁନୀତା ବେହେରାଙ୍କୁ ମଧ୍ୟ ସମ୍ମାନିତ କରାଯାଇଛି। ଏହି କାର୍ଯ୍ୟକ୍ରମରେ ରାଜ୍ୟ ଉନ୍ନୟନ କମିଶନର ଅନୁ ଗର୍ଗ ଅନ୍ୟତମ ଅତିଥି ରୂପେ ଯୋଗ ଦେଇଥିବାବେଳେ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।