ନୂଆଦିଲ୍ଲୀ:  ସ୍ପେକ୍ଟ୍ରମ୍ ଆବଣ୍ଟନ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟଙ୍କଠାରୁ ବଡ଼ ଝଟ୍‌କା ଲାଗିଛି। ସ୍ପେକ୍ଟ୍ରମ୍ ଆବଣ୍ଟନ ସହ ଜଡିତ କେନ୍ଦ୍ର ସରକାରଙ୍କ ଆବେଦନର ଶୁଣାଣି ହେବ ନାହିଁ। ଏ ନେଇ ସୁପ୍ରିମକୋର୍ଟର ରେଜିଷ୍ଟ୍ରାର ମଧ୍ୟ ଆମେଦନକୁ ତାଲିକାଭୁକ୍ତ କରିବାକୁ ରୋକ୍‌ଠୋକ୍‌ ମନା କରି ଦେଇଛନ୍ତି। କେନ୍ଦ୍ର ସରକାର ଏହାର ଆବେଦନରେ ବିନା କୌଣସି ନିଲାମ ରେ କିଛି ସ୍ପେକ୍ଟ୍ରମର ପ୍ରଶାସନିକ ଆବଣ୍ଟନ ପାଇଁ ଅନୁମତି ମାଗିଥିଲେ। ସ୍ପେକ୍ଟ୍ରମ୍ ଆବଣ୍ଟନ ସହ ଜଡିତ ୨୦୧୨ ସୁପ୍ରିମକୋର୍ଟଙ୍କ ଆଦେଶ ଉପରେ ସ୍ପଷ୍ଟୀକରଣ ପାଇଁ କେନ୍ଦ୍ର ସରକାର ଏହି ଆବେଦନ କରିଥିଲେ। ୨ଜି ସ୍କାମ ସାମ୍ନାକୁ ଆସିବା ପରେ ସୁପ୍ରିମକୋର୍ଟଙ୍କ ଏହି ଆଦେଶ ଆସିଛି। ସେବେଠାରୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ସ୍ୱଚ୍ଛ ଏବଂ ସର୍ବସାଧାରଣ ନିଲାମ ମାଧ୍ୟମରେ ସ୍ପେକ୍ଟ୍ରମ୍ ଆବଣ୍ଟନ କରାଯାଇଥାଏ। ବର୍ତ୍ତମାନ ସରକାର ନିଲାମ ବିନା ପ୍ରଶାସନିକ ସ୍ତରରେ କିଛି ସ୍ପେକ୍ଟ୍ରମ ବଣ୍ଟନ କରିବାକୁ ଅନୁମତି ଚାହୁଁଛନ୍ତି। ହେଲେ ବିନା ନିଲାମରେ ସ୍ପେକ୍ଟ୍ରମ ଆବଣ୍ଟନ ହୋଇପାରିବନାହିଁ ବୋଲି ସୁପ୍ରିମକୋର୍ଟ କହିଛନ୍ତି। କେବଳ କେତେକ ସୀମିତ କ୍ଷେତ୍ରରେ ସ୍ପେକ୍‌ଟ୍ରମ୍‌ର ପ୍ରଶାସନିକ ଆବଣ୍ଟନ ହାଇପାରିବ। ସ୍ପଷ୍ଟୀକରଣ ନାମରେ ନିଷ୍ପତ୍ତିର ସମୀକ୍ଷା ଦାବି କରିବା କେନ୍ଦ୍ର ସରକାରଙ୍କ ଭୁଲ ବୋଲି ରେଜିଷ୍ଟ୍ରାର କହିଛନ୍ତି।

ବର୍ତ୍ତମାନ କେନ୍ଦ୍ର ସରକାର ଚାହୁଁଛନ୍ତି ଯେ ସୁପ୍ରିମକୋର୍ଟ ବିନା ନିଲାମରେ କେତେକ କ୍ଷେତ୍ରରେ ସ୍ପେକ୍ଟ୍ରମ ଆବଣ୍ଟନ କରିବାକୁ ଅନୁମତି ଦିଅନ୍ତୁ। ଏହି କାରଣରୁ ସରକାର ସୁପ୍ରିମକୋର୍ଟରେ ଏହି ଆବେଦନ କରିଥିଲେ, ଯାହାକୁ ରେଜିଷ୍ଟ୍ରାର ଗ୍ରହଣ କରିବାକୁ ମନା କରିଦେଇଛନ୍ତି। ବାସ୍ତବରେ, ଏଥିରେ କ ଣସି ଉପଯୁକ୍ତ କାରଣ ନ ଥିବାରୁ ରେଜିଷ୍ଟ୍ରାର ଏହି ଆବେଦନକୁ ପ୍ରତ୍ୟାଖ୍ୟାନ କରିପାରିବେ। ତଥାପି, ଆବେଦନକାରୀ ୧୫ ଦିନ ମଧ୍ୟରେ ପୁନର୍ବାର ଆବେଦନ କରିପାରିବେ। ଏହାର ଅର୍ଥ ହେଉଛି ସୁପ୍ରିମକୋର୍ଟରେ ଆବେଦନ କରିବାର କେନ୍ଦ୍ରର ବିକଳ୍ପ ରହିଛି। ଫେବୃଆରୀ ୨୦୧୨ ରେ, ୨ଜି ମାମଲାର ଶୁଣାଣି କରି ସୁପ୍ରିମକୋର୍ଟ କହିଥିଲେ ଯେ ସ୍ପେକ୍ଟ୍ରମ୍ ପରି ସର୍ବସାଧାରଣ ସମ୍ବଳ ଆବଣ୍ଟନ ସର୍ବସାଧାରଣ ନିଲାମ ମାଧ୍ୟମରେ କରାଯିବା ଉଚିତ୍। ସ୍ପେକ୍ଟ୍ରମ ପରି ଏକ ମୂଲ୍ୟବାନ୍‌ ପ୍ରାକୃତିକ ସମ୍ପଦ କେବଳ ସରକାରୀ ଏବଂ ସ୍ୱଚ୍ଛ ନିଲାମ ମାଧ୍ୟମରେ ଘରୋଇ କମ୍ପାନୀମାନଙ୍କୁ ଆବଣ୍ଟନ କରାଯାଇଥାଏ। ଏହି ପ୍ରସଙ୍ଗରେ ସୁପ୍ରିମକୋର୍ଟ ୧୨ ବର୍ଷ ପୂର୍ବରୁ ୨ ଜି ସ୍ପେକ୍ଟ୍ରମ୍ ମାମଲାରେ ତାଙ୍କର ଐତିହାସିକ ନିଷ୍ପତ୍ତି ଦେଇଥିଲେ, ଯାହା ବର୍ତ୍ତମାନ ଆଇନ ଭାବେ କାର୍ଯ୍ୟକାରୀ ହୋଇଛି। ନିୟମ ଅନୁଯାୟୀ ସୁପ୍ରିମକୋର୍ଟର ରେଜିଷ୍ଟ୍ରାର କୌଣସି ଆବେଦନକୁ ଏଥିରେ କୌଣସି ଉତ୍ତମ କାରଣ ନାହିଁ କିମ୍ବା ଏଥିରେ ଦୂରଭିସନ୍ଧୀ ରହିଥିବା ଦର୍ଶାଇ ମାମଲାକୁ ପ୍ରତ୍ୟାଖ୍ୟାନ କରିପାରିବେ। ତେବେ ଯଦି ଏହି ଆବେଦନକୁ ପ୍ରତ୍ୟାଖ୍ୟାନ କରାଯାଏ, ତେବେ ସରକାର ୧୫ ଦିନ ମଧ୍ୟରେ ସୁପ୍ରିମକୋର୍ଟରେ ଏ ନେଇ ଆବେଦନ କରିପାରିବେ। କେନ୍ଦ୍ର ସରକାରଙ୍କ ଦ୍ବାରା ଦାଖଲ ହୋଇଥିବା ଏହି ଆବେଦନରେ କୁହାଯାଇଛି ଯେ କେବଳ ବାଣିଜ୍ୟିକ ଟେଲିକମ୍ ସେବା ପାଇଁ ନୁହେଁ ବରଂ ସୁରକ୍ଷା ଏବଂ ବିପର୍ଯ୍ୟୟ ପ୍ରସ୍ତୁତି ଭଳି ଜନସାଧାରଣଙ୍କ ସମୂହ ସ୍ୱାର୍ଥ କାର୍ଯ୍ୟ କ୍ଷେତ୍ରରେ ସ୍ପେକ୍ଟ୍ରମ୍ ଆବଶ୍ୟକ। ଏହା ସହିତ ସୁପ୍ରିମକୋର୍ଟ ସ୍ପେକ୍ଟ୍ରମ୍ ଆବଣ୍ଟନରେ ‘ଫାଷ୍ଟ କମ୍ , ଫାଷ୍ଟ ସର୍ଭ’ ନିୟମକୁ ବାତିଲ କରିଦେଇଥିଲେ। ସେତେବେଳେ କେବଳ ଏହି ନିୟମ ଅନୁଯାୟୀ ୨ଜି ସ୍ପେକ୍ଟ୍ରମ୍ ଆବଣ୍ଟନ କରାଯାଇଥିଲା। କେବଳ ସୀମିତ ମାମଲାରେ ପ୍ରଶାସନିକ ଭିତ୍ତିରେ ସ୍ପେକ୍ଟ୍ରମ୍ ଯୋଗାଇ ଦିଆଯାଉଛି। ଏହି ମାମଲାଗୁଡ଼ିକରେ ପୋଲିସ୍ ସଂଗଠନଗୁଡ଼ିକ ପାଇଁ ୱାକି-ଟକିଜ୍, ପାଣିପାଗ ପୂର୍ବାନୁମାନ ପାଇଁ ରାଡାର୍, ଜାହାଜ ଏବଂ ଯୋଗାଯୋଗ ପାଇଁ ସ୍ପେସ୍ ଏବଂ ସାଟେଲାଇଟ୍ ପ୍ରୟୋଗ, ସେନା, ବାୟୁସେନା ଏବଂ ନୌସେନା ପାଇଁ ଯୋଗାଯୋଗ ଏବଂ ରାଡାର ଓ ବିଏସ୍‌ଏନ୍‌ଏଲ୍‌ ପରି ଜନସେବା କ୍ଷେତ୍ର ଏଥିରେ ଅନ୍ତର୍ଭୁକ୍ତ।