ମୁମ୍ବାଇ: ବିଶ୍ବକପ୍‌ ପୂର୍ବରୁ ଭାରତୀୟ କ୍ରିକେଟ୍ ଦଳ ପାଇଁ ଖୁସି ଖବର । ଟିମ୍ ଇଣ୍ଡିଆର ଷ୍ଟାର୍ ପେସ୍‌ ବୋଲର ଜଶପ୍ରୀତ ବୁମରା ଖୁବଶୀଘ୍ର ଦଳକୁ ଫେରିବେ। ବୁମରା ବର୍ତ୍ତମାନ ନ୍ୟାସନାଲ କ୍ରିକେଟ୍ ଏକାଡେମୀ (ଏନସିଏ)ରେ ରହି ଅଭ୍ୟାସ ଜାରି ରଖିଛନ୍ତି। କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) ନିକଟରେ ଜାରି କରିଥିବା ମେଡିକାଲ ଅପଡେଟ୍‌ ଅନୁସାରେ ଜଶପ୍ରୀତ ବୁମରା ଫିଟନେସ ହାସଲ କରିବାର ନିକଟତର ହୋଇଛନ୍ତି। ବର୍ତ୍ତମାନ ଅଭ୍ୟାସ ବେଳେ ଜଶପ୍ରୀତ ବୁମରା ପୂରା ଗତି ସହିତ ବୋଲିଂ କରୁଛନ୍ତି। ବିସିସିଆଇ ଡାକ୍ତରୀ ଦଳ ତାଙ୍କ ଅଗ୍ରଗତିରେ ଖୁସି ଅଛନ୍ତି ।

ବିସିସିଆଇ ସଚିବ ଜୟ ଶାହା ଦେଇଥିବା ବିବୃତ୍ତିରେ କୁହାଯାଇଛି ଯେ ବୁମରା ସୁସ୍ଥ ଅଛନ୍ତି। ବର୍ତ୍ତମାନ ବେଙ୍ଗାଲୁରୁର ନ୍ୟାସନାଲ କ୍ରିକେଟ୍ ଏକାଡେମୀ (ଏନସିଏ) ରେ ରହି ଅଭ୍ୟାସ କରୁଛନ୍ତି। ଅନ୍ୟପଟେ ପ୍ରସିଦ୍ଧ କ୍ରିଷ୍ଣା ମଧ୍ୟ ଫିଟନେସ ହାସଲ କରିବାର ନିକଟତର ହୋଇଛନ୍ତି। ଏହି ଯୋଡି ବର୍ତ୍ତମାନ କିଛି ଅଭ୍ୟାସ ମ୍ୟାଚ୍ ଖେଳିବେ, ଯାହା ଏନସିଏ ଦ୍ୱାରା ଆୟୋଜିତ ହେବ । ବିସିସିଆଇ ଡାକ୍ତରୀ ଦଳ ଅଭ୍ୟାସ ମ୍ୟାଚ୍ ପରେ ତାଙ୍କୁ ମୂଲ୍ୟାଙ୍କନ କରିବା ପରେ ଚୂଡ଼ାନ୍ତ ରିପୋର୍ଟ ଦେବେ।

ଟିମ୍ ଇଣ୍ଡିଆର ୨୯ ବର୍ଷୀୟ ଷ୍ଟାର୍ ପେସର୍ ଜଶପ୍ରୀତ ବୁମରା ଏକ ବର୍ଷ ହେବ ଦଳରୁ ଆଉଟ ହୋଇଛନ୍ତି।  ବୁମରାଙ୍କ ଅନୁପସ୍ଥିତିରେ ଟିମ୍ ଇଣ୍ଡିଆ ଟି -20 ବିଶ୍ୱକପ ଖେଳିଥିଲା ​​କିନ୍ତୁ ନିରାଶ ହୋଇଥିଲା। ସେହିପରି ବିଶ୍ୱ ଟେଷ୍ଟ ଚାମ୍ପିଅନସିପ୍‌ର ଫାଇନାଲ୍ (ଡବ୍ଲୁଟିସି ଫାଇନାଲ୍ -2023) ମଧ୍ୟ ବୁମରାଙ୍କ ବିନା ଖେଳିଥିଲା  ଯେଉଁଠାରେ ଭାରତୀୟ ଦଳ ଅଷ୍ଟ୍ରେଲିଆ ଦ୍ୱାରା ୨୧୩ ରନରେ ପରାସ୍ତ ହୋଇଥିଲା। ଗତ ବର୍ଷ ସେପ୍ଟେମ୍ବରରେ ହାଇଦ୍ରାବାଦରେ ଅଷ୍ଟ୍ରେଲିଆ ବିପକ୍ଷରେ ବୁମରା ଶେଷ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ।