ମୁମ୍ବାଇ: ମହାରାଷ୍ଟ୍ରର ଅମରାବତୀରେ ହୋଇଛି ଉଦୟପୁର ଭଳି ଜଘନ୍ୟ ହତ୍ୟାକାଣ୍ଡ । ଅମରାବତୀରେ ଜଣେ ଔଷଧ ଦୋକାନୀଙ୍କୁ କିଛି ଦୁବୃର୍ତ୍ତ ଗଳାକାଟି ହତ୍ୟା କରିଛନ୍ତି । ହତ୍ୟାର ଶିକାର ହୋଇଥିବା ବ୍ୟକ୍ତିଜଣଙ୍କ ଜଣେ ଔଷଧ ଦୋକାନୀ ଓ ତାଙ୍କର ବୟସ ୫୪ ବର୍ଷ । ଏହି ହତ୍ୟାକାଣ୍ଡ ଜୁନ ୨୧ ତାରିଖରେ ଘଟିଛି । ଏହି ଘଟଣାରେ ପୋଲିସ ୪ ଜଣଙ୍କୁ ଗିରଫ କରିଛି । ନିକଟରେ ରାଜସ୍ଥାନର ଉଦୟପୁରରେ ଜଣେ ଦରଜୀଙ୍କର ଲୋମହର୍ଷଣକାରୀ ହତ୍ୟା କରାଯାଇଥିଲା । ଏହି ହତ୍ୟା ପରେ ସାରା ଦେଶରେ ହିଂସା ଦେଖାଯାଇଥିଲା । ପୋଲିସ ଦୁଇଜଣଙ୍କୁ ଗିରଫ କରି ପଚରା ଉଚରା ଜାରି କରିଛି । ଏହି ଘଟଣା ଏବେ ସୁଦ୍ଧା ଥମିନଥିବା ବେଳେ ଅମରାବତୀରେ ଆଉ ଏକ ଘଟଣା ସାମ୍ନାକୁ ଆସିଛି ।

ସୂଚନା ଅନୁସାରେ, ଉଦୟପୁରରେ ଦର୍ଜୀ କହ୍ନୈୟାଲାଲଙ୍କୁ ହତ୍ୟା କରିବାର ଠିକ୍‌ ଗୋଟିଏ ସପ୍ତାହ ପୂର୍ବରୁ ମହାରାଷ୍ଟ୍ରର ଅମରାବତୀ ଜିଲ୍ଲାରେ ୫୪ ବର୍ଷୀୟ କେମିଷ୍ଟ ଉମେଶ ପ୍ରହଲ୍ଲାଦରାଓ କୋହ୍ଲେଙ୍କୁ ୨୧ ଜୁନରେ ହତ୍ୟା କରାଯାଇଥିଲା। ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି ସାମାଜିକ ଗଣମାଧ୍ୟମରେ ଦାବି କରାଯାଉଛି ଯେ, ନୁପୁର ଶର୍ମାଙ୍କ ସମର୍ଥନରେ ଏକ ପୋଷ୍ଟ କାରଣରୁ କୋହ୍ଲେଙ୍କ ନିର୍ମମ ହତ୍ୟା କରାଯାଇଛି । ଏବେ ଏହି ମାମଲାର ଯାଞ୍ଚ କରୁଥିବା ପୁଲିସ୍‌ ଏହାକୁ କହ୍ନୈୟାଲାଲ ହତ୍ୟାକାଣ୍ଡ ଭଳି ସନ୍ଦେହକୁ ଆଣିଛି।

ସେପଟେ ଏହି ହତ୍ୟାକାଣ୍ଡ ବାବଦରେ ଯାଂଚ କରିବାକୁ ଏନଆଇଏର ଗୋଟିଏ ଟିମ ଏବେ ଅମରାବତୀ ପହଞ୍ଚିଛି । ଗିରଫ ହୋଇଥିବା ୪ ଜଣ କହିଛନ୍ତି କି ଏଭଳି ହତ୍ୟା କରିବାକୁ ତାଙ୍କୁ ଅନ୍ୟଜଣେ ପରାମର୍ଶ ଦେଇଥିଲେ । ଏବେ ପୋଲିସ ସେହି ମାଷ୍ଟର ମାଇଣ୍ଡକୁ ଧରିବାକୁ ପ୍ରୟାଶ କରୁଛି ।