ଭୋପାଳ: ମଧ୍ୟପ୍ରଦେଶର ସିଧି ଜିଲ୍ଲାରେ ବିଜେପି କର୍ମୀ ମଦ ନିଶାରେ ଜଣେ ମାନସିକ ଭିନ୍ନକ୍ଷମ ବ୍ୟକ୍ତିଙ୍କ ଉପରେ ପରିସ୍ରା କରିଛନ୍ତି । ଏହି ସମୟର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି । ମାନସିକ ବ୍ୟକ୍ତିଜଣଙ୍କ ଆଦିବାସୀ ସମ୍ପ୍ରଦାୟର ବୋଲି କୁହାଯାଉଛି । ତେବେ ଘଟଣା ସାମାଜିକ ଗଣମାଧ୍ୟମରେ ଭାଇରାଲ୍ ହେବା ସହ ଘଟଣାକୁ ନିନ୍ଦା କରାଯାଇ ଦୋଷୀ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରାଯାଇଛି । ତେବେ ଅଭିଯୁକ୍ତ ପ୍ରବେଶ ଶୁକ୍ଳା ସିଧି ଜିଲ୍ଲାରୁ ବିଜେପି ବିଧାୟକ କେଦାରନାଥ ଶୁକ୍ଳାଙ୍କ ପ୍ରତିନିଧି ମଧ୍ୟ ରହିସାରିଛନ୍ତି । ଭିଡିଓ ଟି ୯ ଦିନ ପୂରୁଣା ବୋଲି କୁହାଯାଉଛି, ଯାହା କି କୁବରି ବଜାରର ଅଟେ ।

ପ୍ରବେଶ ଶୁକ୍ଳା କୁବରି ଗାଁର ହିଁ ବାସିନ୍ଦା ଅଟେ । ଅତିରିକ୍ତ ଏସପି, ସିଧି ଅଞ୍ଜୁଲତା ପଟଲେ କହିଛନ୍ତି ଯେ ଅଭିଯୁକ୍ତ ଉପରେ ମାମଲା ରୁଜୁ କରାଯାଇଛି । ଏପଟେ, ମାମଲାରେ ରାଜନୀତି ମଧ୍ୟ ଆରମ୍ଭ ହୋଇଯାଇଛି । ପିସିସି ସଭାପତି କମଲନାଥ କହିଛନ୍ତି ସିଧି ଜିଲ୍ଲାରେ ଆଦିବାସୀ ଯୁବକଙ୍କ ଉପରେ ପରିଶ୍ରା କରିବାର କ୍ରୁରତାର ଭିଡିଓ ସାମ୍ନାକୁ ଆସିଛି । ଆଦିବାସୀ ଯୁବକଙ୍କ ସହ ଏପରି ଜଘନ୍ୟ ଏବଂ ନିନ୍ଦନୀୟ କାର୍ଯ୍ୟର ସଭ୍ୟ ସମାଜରେ କୌଣସି ସ୍ଥାନ ନାହିଁ ।

ମଧ୍ୟ ପ୍ରଦେଶ ପୂର୍ବରୁ ହିଁ ଆଦିବାସୀ ଅତ୍ୟାଚାରରେ ପ୍ରଥମ ସ୍ଥାନରେ ରହିଛି । ଏହି ଘଟଣା ସମ୍ପୂର୍ଣ୍ଣ ରାଜ୍ୟକୁ ଲଜ୍ଜିତ କରିଛି । ମୁଁ ମୁଖ୍ୟମନ୍ତ୍ରୀ ଶିବରାଜ ସିଂଙ୍କୁ ଅନୁରୋଧ କରୁଛି ଯେ ସେ ଅଭିଯୁକ୍ତ ବ୍ୟକ୍ତିଙ୍କ ଉପରେ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରନ୍ତୁ । ଅନ୍ୟପକ୍ଷରେ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହ୍ୱାନ କହିଛନ୍ତି ଯେ ଅପରାଧୀକୁ କୌଣସି ବି ସ୍ଥିତିରେ ଛଡ଼ାଯିବନାହିଁ । ତା ଉପରେ କଠୋରରୁ କଠୋର କାର୍ଯ୍ୟାନୁଷ୍ଠାନ ନିଆଯିବ । ଅଭିଯୁକ୍ତ ଉପରେ ଏନଏସଏ ମଧ୍ୟ ଲଗାଯିବ ।