ଆମେରିକାକୁ ଚୀନ୍‌ର ଧମକ: ତାଇୱାନ ସ୍ବାଧୀନତାକୁ ସମର୍ଥନ କଲେ ହେବ ଯୁଦ୍ଧ

ବେଜିଂ(ଏଜେନ୍ସି): ୟୁକ୍ରେନ ଏବଂ ଋଷ ମଧ୍ୟରେ ଉତ୍ତେଜନା ଜାରି ରହିଛି। ଋଷ୍‌କୁ ଜବାବ ଦେବା ପାଇଁ ଆମେରିକା ନେତୃତ୍ବାଧୀନ ନାଟୋ ପ୍ରସ୍ତୁତ ହୋଇ ରହିଛି। ଏପରି ସମୟରେ ଆମେରିକାକୁ ଚୀନ୍‌ ଧମକ ଦେଇଛି। ତାଇୱାନ ସ୍ବାଧୀନତାକୁ ସମର୍ଥନ କଲେ ୨ ଦେଶ ମଧ୍ୟରେ ଯୁଦ୍ଧ ହୋଇପାରେ ବୋଲି ଚୀନ୍‌ ରାଷ୍ଟ୍ରଦୂତ କିନ ଗାଙ୍ଗ ଚେତାବନୀ ଦେଇଛନ୍ତି। ସେ ଏକ ସାକ୍ଷାତକାରରେ କହିଛନ୍ତି ଯେ ଚୀନ୍‌ ଏବଂ ଆମେରିକା ମଧ୍ୟରେ ତାଇୱାନ ସବୁଠାରୁ ବିସ୍ଫୋରକ ପ୍ରସଙ୍ଗ। ତାଇୱାନ ଅଧିକାରୀ ସ୍ବାଧୀନତା ଦିଗରେ ପ୍ରୟାସ ଜାରି ରଖିଲେ ଆମେରିକା ଏବଂ ଚୀନ୍‌ ସେନାମଧ୍ୟରେ ଯୁଦ୍ଧ ହେବାର ଆଶଙ୍କା ରହିଛି।

ଅନ୍ୟପକ୍ଷରେ ଏହାକୁ ନେଇ ଆମେରିକା ପ୍ରତିରକ୍ଷା ମନ୍ତ୍ରାଳୟ ପେଣ୍ଟାଗନ ବିବୃତି ଜାରି କରିଛି। ଏଥିରେ କୁହାଯାଇଛି ପେଣ୍ଟାଗନ ଏବେ ବି ‘ଏକ ଚୀନ୍‌ ନୀତି’ ଏବଂ ‘ଆମେରିକା ତାଇୱାନ ସମ୍ବନ୍ଧ’ ଆଇନ ଉପରେ କାଏମ ରହିଛି। ଆମେରିକା ଦୀର୍ଘ ବର୍ଷ ହେଲା ତାଇୱାନ ପରିବର୍ତ୍ତେ ଚୀନ୍‌କୁ ମାନ୍ୟତା ଦେଇ ଆସୁଥିଲା। କିନ୍ତୁ ତାଇୱାନ ସମ୍ବନ୍ଧ ଆଇନ ଅନୁଯାୟୀ ତାଇପେକୁ ପ୍ରତିରକ୍ଷା କ୍ଷେତ୍ରରେ ମଧ୍ୟ ସହୟତା କରୁଛି। ପେଣ୍ଟାଗନ ମୁଖପାତ୍ର କହିଛନ୍ତି ଯେ ତାଇୱାନର ସୁରକ୍ଷା ପାଇଁ ଆମେରିକା ଏହି ଦେଶକୁ ସହଯୋଗ କରିବା ଜାରି ରଖିବ। ବଳ ପ୍ରୟୋଗ କରି ତାଇୱାନ ଲୋକଙ୍କ ସୁରକ୍ଷାରେ ବିପଦ ସୃଷ୍ଟି କଲେ ତାହାର ଦୃଢ ଜବାବ ଦିଆଯିବ। ଏହା ପୂର୍ବରୁ ଚୀନ୍‌ ସରକାରଙ୍କ ମୁଖପତ୍ର ଗ୍ଲୋବାଲ ଟାଇମ୍ସ ମଧ୍ୟ ଆମେରିକାକୁ ଧମକ ଦେଇଥିଲା। ତାଇୱାନର ସୁରକ୍ଷା ପାଇଁ ସେନା ପଠାଇଲେ ସେମାନଙ୍କ ଉପରେ ଆକ୍ରମଣ ପାଇଁ ଚୀନ୍‌ ପଛଘୁଞ୍ଚା ଦେବନାହିଁ ବୋଲି କୁହାଯାଇଥିଲା।

ସୂଚନାଯୋଗ୍ୟ ଯେ ତାଇୱାନ ଚୀନ୍‌କୁ ଦୃଢ ଜବାବ ଦେଉଛି। ଏହି ଦେଶକୁ ଆମେରିକା ଏବଂ ଜାପାନ ସମର୍ଥନ କରୁଛନ୍ତି। କିଛି ଦିନ ତଳେ ତାଇୱାନର ସମ୍ଭାବ୍ୟ ଜରୁରୀକାଳୀନ ସ୍ଥିତିକୁ ନେଇ ମିଳିତ ଅଭିଯାନ ନିମନ୍ତେ ଏକ ଚିଠା ପ୍ରସ୍ତାବ କରିଥିବା ରିପୋର୍ଟ ପ୍ରକାଶ ପାଇଥିଲା। ଗଣତନ୍ତ୍ର ଦ୍ବାରା ପରିଚାଳିତ ତାଇୱାନକୁ ଚୀନ୍‌ ନିଜର ବୋଲି ଦାବି କରୁଛି। ନିଜର କର୍ତ୍ତୁତ୍ବ ଜାହିର କରିବା ପାଇଁ ଚୀନ୍‌ ବାୟୁ ସେନା ବିମାନ କ୍ରମାଗତ ଭାବେ ତାଇୱାନ ଆକାଶ ସୀମାରେ ଅନୁପ୍ରେବଶ କରୁଛି। ଏହାକୁ ଦେଖି ତାଇୱାନ ନିଜର ସାମରିକ କ୍ଷମତା ବଢ଼ାଇବାରେ ଲାଗିଛି।