'ଆର୍ଥିକ ଝଡ଼ ମୁଣ୍ଡ ଉପରେ, ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି': 'ମେଲୋଡି' ପ୍ରସଙ୍ଗରେ ମୋଦୀଙ୍କ ଉପରେ ବର୍ଷିଲେ ରାହୁଲ ଗାନ୍ଧୀ

"ଆର୍ଥିକ ଝଡ଼ ମୁଣ୍ଡ ଉପରେ ଅଛି, ଆଉ ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି।" କଂଗ୍ରେସ ନେତା ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ 'ମେଲୋଡି' ଟଫି ପ୍ରସଙ୍ଗରେ କଡ଼ା ସମାଲୋଚନା କରିଛନ୍ତି। ଦେଶର ଅର୍ଥନୈତିକ ସମସ୍ୟା ଓ ସାଧାରଣ ଜନତାଙ୍କ ଅସୁବିଧାକୁ ଦର୍ଶାଇ ସେ ଏହି ଟାର୍ଗେଟ କରିଛନ୍ତି। ନିକଟରେ ପ୍ରଧାନମନ୍ତ୍ରୀଙ୍କ ଇଟାଲୀ ଗସ୍ତ ସମୟରେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନୀଙ୍କୁ ଏକ 'ମେଲୋଡି' ଟଫି ପ୍ୟାକେଟ୍ ଉପହାର ଦେବାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା।

ନେତୃତ୍ୱ ନୁହେଁ, ଏହା ନୌଟଙ୍କି

ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ କରି ରାହୁଲ ଗାନ୍ଧୀ ଲେଖିଛନ୍ତି ଯେ, "ଆର୍ଥିକ ଝଡ଼ ମୁଣ୍ଡ ଉପରେ ଅଛି, ଏବଂ ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି! କୃଷକ, ଯୁବକ, ମହିଳା, ଶ୍ରମିକ ଏବଂ ଛୋଟ ବ୍ୟବସାୟୀ ସମସ୍ତେ କାନ୍ଦୁଛନ୍ତି - କିନ୍ତୁ ପ୍ରଧାନମନ୍ତ୍ରୀ ହସି ହସି ରିଲ୍ ବନାଉଛନ୍ତି, ଏବଂ ବିଜେପି ନେତାମାନେ ତାଳି ମାରୁଛନ୍ତି"। ସେ ପ୍ରଧାନମନ୍ତ୍ରୀଙ୍କ ଏହି କାର୍ଯ୍ୟକଳାପକୁ "ନେତୃତ୍ୱ ନୁହେଁ, ନୌଟଙ୍କି" ବୋଲି ଆଖ୍ୟା ଦେଇଛନ୍ତି।

କ'ଣ ଥିଲା ପୂରା ଘଟଣା?

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଇଟାଲୀ ଗସ୍ତ ବେଳେ ଇଟାଲୀୟ ସମକକ୍ଷ ଜର୍ଜିଆ ମେଲୋନୀଙ୍କୁ ଏକ 'ମେଲୋଡି' ଟଫି ପ୍ୟାକେଟ୍ ଉପହାର ଦେଇଥିଲେ। ଏହାକୁ ନେଇ ମେଲୋନୀ ସୋସିଆଲ ମିଡିଆରେ ଏକ ଭିଡିଓ ସେୟାର କରିଥିଲେ, ଯେଉଁଥିରେ ସେ କହୁଥିବାର ଶୁଣିବାକୁ ମିଳିଥିଲା, "ପ୍ରଧାନମନ୍ତ୍ରୀ ମୋଦୀ ଆମ ପାଇଁ ଏକ ଉପହାର ଆଣିଛନ୍ତି। ଏହା ହେଉଛି ମେଲୋଡି"। ଏହି ଘଟଣା ପରେ ଇଣ୍ଟରନେଟରେ ପୁଣି ଥରେ '#Melodi' ଟ୍ରେଣ୍ଡ୍ ଭାଇରାଲ ହେବାରେ ଲାଗିଥିଲା। ତେବେ ଏହି ହାଲୁକା ମୁହୂର୍ତ୍ତକୁ ନେଇ ଏବେ ଦେଶରେ ରାଜନୈତିକ ବୟାନବାଜି ତୀବ୍ର ହୋଇଛି。