ସ୍ପେନ୍ ଅଧୀନସ୍ଥ ସେଉଟା (Ceuta) ସୀମାରେ ଏକ ବଡ଼ ଧରଣର ମାନବିକ ସଙ୍କଟ ଦେଖାଦେଇଛି। ଉତ୍ତମ ଜୀବନ ଓ ନିଯୁକ୍ତି ଆଶାରେ ମୋରୋକ୍କୋରୁ ସ୍ପେନ୍ ସୀମାରେ ପ୍ରବେଶ କରିଥିବା ହଜାର ହଜାର ପ୍ରବାସୀ ମାତ୍ର ଗୋଟିଏ ଦିନ ପରେ ନିରାଶ ହୋଇ ନିଜ ଦେଶକୁ ଫେରିବା ଆରମ୍ଭ କରିଛନ୍ତି। ସେଠାରେ ଖାଦ୍ୟ ଏବଂ ଆଶ୍ରୟ ଅଭାବ ସାଙ୍ଗକୁ ସୁରକ୍ଷାକର୍ମୀଙ୍କ କଠୋର ବ୍ୟବହାର ଯୋଗୁଁ ସେମାନେ ଏହି ନିଷ୍ପତ୍ତି ନେଇଛନ୍ତି।

ଖାଦ୍ୟ ଅଭାବ ଓ ନିର୍ଦ୍ଦୟ ମାଡ଼

ସୂଚନା ଅନୁଯାୟୀ, ଅଳ୍ପ ସମୟ ମଧ୍ୟରେ ପ୍ରାୟ ୬୦,୦୦୦ ପ୍ରବାସୀ ସମୁଦ୍ର ଏବଂ ସ୍ଥଳଭାଗ ଦେଇ ସ୍ପେନ୍‌ର ସେଉଟାରେ ପ୍ରବେଶ କରିଥିଲେ। କିନ୍ତୁ ସେଠାରେ ପହଞ୍ଚିବା ପରେ ସେମାନଙ୍କୁ ଖାଦ୍ୟ କିମ୍ବା ଆଶ୍ରୟ ମିଳିନଥିଲା। ଅନେକ ପ୍ରବାସୀ ଅଭିଯୋଗ କରିଛନ୍ତି ଯେ ସେମାନଙ୍କୁ ଖାଇବାକୁ ଦିଆଯାଇନଥିଲା ଏବଂ ନିର୍ଦ୍ଦୟ ଭାବରେ ଗୋଇଠା ମାଡ଼ ମରାଯାଇଥିଲା। ଜଣେ ମୋରୋକ୍କୋ ଯୁବକ ଗଣମାଧ୍ୟମକୁ କହିଛନ୍ତି ଯେ, "ମୁଁ ଏଠାକୁ କାହିଁକି ଆସିଥିଲି ଜାଣିନାହିଁ, ଏବେ ଫେରିଯାଉଛି। ପାଖରେ ପଇସା ଥିଲେ ମଧ୍ୟ ଗତକାଲିଠାରୁ କିଛି ଖାଇବାକୁ ପାଇନାହିଁ"। ଏହି ଦୁର୍ଦ୍ଦଶା କାରଣରୁ କିଛି ଘଣ୍ଟା ମଧ୍ୟରେ ପ୍ରାୟ ୪୫,୦୦୦ରୁ ୪୮,୦୦୦ ପ୍ରବାସୀ ସ୍ୱଇଚ୍ଛାରେ ମୋରୋକ୍କୋ ଫେରିଯାଇଛନ୍ତି।

ସୀମାରେ ସଂଘର୍ଷ, ୫୭ ମୃତ

ଏହି ବେଆଇନ ଅନୁପ୍ରବେଶ ସମୟରେ ସୀମାରେ ହାହାକାର ପରିସ୍ଥିତି ସୃଷ୍ଟି ହୋଇଥିଲା। ଭିଡ଼କୁ ନିୟନ୍ତ୍ରଣ କରିବା ପାଇଁ ସ୍ପେନ୍ ଏବଂ ମୋରୋକ୍କୋ ସୁରକ୍ଷା ବାହିନୀ ପକ୍ଷରୁ ଲୁହବୁହା ଗ୍ୟାସ୍, ୱାଟର କ୍ୟାନନ୍ ଏବଂ ଲାଠିଚାର୍ଜ କରାଯାଇଥିଲା। ସମୁଦ୍ରରେ ପହଁରିକରି ଆସୁଥିବା ବେଳେ ବୁଡ଼ିଯାଇ ଏବଂ ସୀମା ପ୍ରାଚୀର ଡେଇଁବା ବେଳେ ଦଳାଚକଟାରେ ପ୍ରାୟ ୫୭ ଜଣ ପ୍ରବାସୀଙ୍କ ମୃତ୍ୟୁ ଘଟିଥିବା ସ୍ପେନ୍ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି।

ସ୍ପେନ୍ ପ୍ରଶାସନର କଡ଼ା ପଦକ୍ଷେପ

ସ୍ଥିତି ଅଣାୟତ୍ତ ହେବାରୁ ସ୍ପେନ୍ ସରକାର ସେଉଟାରେ ସେନା ମୁତୟନ କରିଛନ୍ତି। ସ୍ପେନ୍ ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ୍ ଏହି ଘଟଣାକୁ ସ୍ପେନ୍‌ର ଅଖଣ୍ଡତା ଉପରେ ଏକ ଆକ୍ରମଣ ବୋଲି ଅଭିହିତ କରିଛନ୍ତି ଏବଂ ଯଥାଶୀଘ୍ର ସ୍ଥିତି ସ୍ୱାଭାବିକ କରିବାକୁ ପ୍ରତିଶ୍ରୁତି ଦେଇଛନ୍ତି। ଅନ୍ୟପକ୍ଷରେ, ୟୁରୋପୀୟ ରାଷ୍ଟ୍ରଗୁଡ଼ିକ ମଧ୍ୟ ନିଜ ନିଜ ସୀମାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛନ୍ତି।