ବିଶ୍ବର ସବୁଠୁ ବଡ଼ ପରିବାର : ସଦସ୍ୟଙ୍କ ସଂଖ୍ୟା ୧୬୭

ଆପଣ ଜାଣି ଆଶ୍ଚର୍ଯ୍ୟ ହେବେ ଯେ, ବିଶ୍ବର ସବୁଠୁ ବଡ଼ ପରିବାର ଭାରତରେ ବସବାସ କରନ୍ତି। ମିଜୋରମ୍‌ର ରାଜଧାନୀ ଆଇଜଲ ନିକଟରେ ବକ୍‌ୱାଙ୍ଗ ଗ୍ରାମରେ ରହୁଥିବା ଏହି ପରିବାରର ମୋଟ ସଦସ୍ୟଙ୍କ ସଂଖ୍ୟା ୧୬୭ ଅଟେ । ସମସ୍ତ ସଦସ୍ୟ ଗୋଟିଏ ବିଲଡିଂରେ ରୁହନ୍ତି । ଘରର ମୁଖିଆ ଜିୟୋନା ଚାନାଙ୍କର ୩୯ ଜଣ ପତ୍ନୀ ଅଛନ୍ତି । ଚାନା ୯୪ଟି ସନ୍ତାନର ପିତା ହୋଇଥିବା ବେଳେ ତାଙ୍କର ୩୩ ଜଣ ନାତି ଓ ନାତୁଣି ଅଛନ୍ତି। ଘରର ସମସ୍ତ ସଦସ୍ୟଙ୍କ ପାଇଁ ଗୋଟିଏ ରୋଷେଇ ଘରେ ହିଁ ଖାଦ୍ୟ ପ୍ରସ୍ତୁତ କରାଯାଏ |

ଗୋଟିଏ ଡାଇନିଂ ରୁମରେ ହିଁ ସମସ୍ତେ ଖାଦ୍ୟ ଖାଆନ୍ତି | ୫୦ଟି ଟେବୁଲ୍ ଉପରେ ଖାଦ୍ୟ ପରଷା ଯାଏ | ଛୋଟ ପିଲାମାନେ ଭୂମି ଚଟାଣ ଉପରେ ବସି ଖାଦ୍ୟ ଖାଆନ୍ତି I ରାତ୍ରୀ ଭୋଜନ ସମୟ ସନ୍ଧ୍ୟା ୬ଟାରୁ ଆରମ୍ଭ ହୋଇଯାଏ | ପରିବାରର ସମସ୍ତ ସଦସ୍ୟ ମିଳିମିଶି ଚଳନ୍ତି ଏବଂ ପରସ୍ପର ମଧ୍ୟରେ ସ୍ନେହଶ୍ରଦ୍ଧା ମଧ୍ୟ ଦେଖିବାକୁ ମିଳିଥାଏ । ଜିୟୋନାଙ୍କ ପତ୍ନୀମାନେ ଖାଦ୍ୟ ପ୍ରସ୍ତୁତ କରିଥାନ୍ତି । ଏବଂ ଝିଅମାନେ ଘରର ଅନ୍ୟକାମ କରିଥାନ୍ତି ।

ଘରର ସଫା-ସୁତୁରା କାର୍ଯ୍ୟ ବୋହୂମାନେ କରିଥାନ୍ତି। ଜିୟୋନାଙ୍କ ପରିବାର ଏକ ଚାରି ମହଲା ଘରେ ରୁହନ୍ତି, ଯେଉଁଥରେ ୧୦୦ ରୁ ଅଧିକ ରୁମ୍ ଅଛି । ଗୋଟିଏ ଦିନରେ ଏହି ପରିବାରରେ ୪୫ କେଜି ଚାଉଳ, ୨୫ କେଜି ଡାଲି, ୨୦ କେଜି ଫଳ, ୩୦ରୁ ୪୦ଟି କୁକୁଡ଼ା, ୫୦ଟି ଅଣ୍ଡା ରୋଷେଇ କରାଯାଏ । ଏହି ପରିବାରର ନାମ ଗିନିଜ୍ ବ୍ଲକ୍ ଅଫ ୱାର୍ଡ ରେକର୍ଡରେ ମଧ୍ୟ ସ୍ଥାନ ପାଇଛି।